1 ’E i muri a’era, ’ia tae a’era i te maha ’ahuru ’e ma piti o te matahiti nō te fa’aterera’a a te mau ha’avā, i muri iho i tō Moroniha fa’atupu-fa’ahou-ra’a i te hau i rotopū i te mau ’āti Nephi ’e te mau ’āti Lamana, inaha ’aita roa e ta’ata nō te pārahi i ni’a i te pārahira’a ha’avāra’a ; nō reira ’ua tupu fa’ahou a’era te mārōra’a i rotopū i te mau ta’ata ē ’o vai te pārahi i ni’a i te pārahira’a ha’avāra’a.

2 ’E i muri a’era, ’ua mā’itihia ’o Helamana, ’oia te tamaiti a Helamana, nā roto i te reo o te mau ta’ata ’ia pārahi i ni’a i te pārahira’a ha’avāra’a.

3 Inaha rā, ’ua tāmoemoe Kisakumena, ’o tei taparahi ia Pahorana, ’ia taparahi ato’a ia Helamana ; ’e ’ua tauturuhia ’oia ’e tōna pupu ta’ata, ’o tei fa’aoti i te fafaura’a ē ’eiaha roa te hō’ē ta’ata ’ia ’ite i tāna ’ohipa ’ino.

4 Tei reira ho’i te hō’ē ta’ata ’o Gadianetona tōna i’oa, ’e e ta’ata ’aravihi roa ’oia i te mau parau e rave rahi, ’e ’oia ato’a i roto i tāna iho ’ohipa ’ino, nō te rave i te ’ohipa huna nō te taparahi ta’ata ’e te ’eiā tao’a ; nō reira ’ua riro mai ra ’oia ’ei ta’ata fa’atere nō te pupu ta’ata o Kisakumena.

5 Nō reira ’ua tāvaimanino ’oia ia rātou ’e ia Kisakumena ato’a ho’i, ’oia ho’i, mai te mea e tu’u rātou iāna i ni’a i te pārahira’a ha’avāra’a, e hōro’a atu ’oia i te mana ’e te ha’amanara’a i te mau ta’ata i roto i tāna pupu ta’ata i ni’a te mau ta’ata ; nō reira ’ua tītau Kisakumena ’ia taparahi ia Helamana.

6 ’E i muri a’era, ’a haere atu ai ’oia i te pārahira’a ha’avāra’a nō te taparahi ia Helamana, inaha, tē vai ra te hō’ē tāvini o Helamana ’o tei haere i rāpae i te pō ma te fa’ahua ta’ata ’ē, ’e ’ua roa’a iāna te ’ite nō taua mau ’ōpuara’a i fa’anahonahohia e teie pupu ta’ata nō te taparahi ia Helamana—

7 ’E i muri a’era, ’ua fārerei ihora ’oia ia Kisakumena, ’e ’ua fa’a’ite atu ra ’oia i te hō’ē tāpa’o iāna ; nō reira ’ua fa’a’ite mai ra Kisakumena iāna i te ’ōpuara’a ’o tāna e hina’aro ra, ma te hina’aro ho’i ’ia arata’i atu ’oia iāna i te pārahira’a ha’avāra’a, ’ia ti’a iāna ’ia taparahi ia Helamana.

8 ’E ’ia ’ite a’era te tāvini o Helamana i te mau mana’o ato’a i roto i te ’ā’au o Kisakumena, ’e i tāna ’ōpuara’a nō te taparahi ta’ata, ’e ’oia ato’a i tāna ’ōpuara’a nō ni’a i te mau ta’ata ato’a i roto i tāna pupu ta’ata nō te taparahi ta’ata, ’e te ’eiāra’a i te tao’a, ’e te tītaura’a i te mana (’o teie ho’i tā rātou ’ōpuara’a huna, ’e tā rātou pupu ’ohipa huna) ’ua nā ’ō atu ra te tāvini o Helamana ia Kisakumena : Mai e haere taua i te pārahira’a ha’avāra’a.

9 I teienei, ’ua māuruuru roa atu ra Kisakumena, i mana’o ho’i ’oia ē, e manuia tāna ’ōpuara’a ; inaha rā, ’a haere atu ai rāua i te pārahira’a ha’avāra’a, ’ua pātia ihora te tāvini o Helamana ia Kisakumena i te māfatu, ’e ’ua ma’iri ihora ’oia i raro ’e pohe roa atu ra ma te autā ’ore. ’E ’ua horo atu ra ’oia ’e ’ua fa’a’ite atu ra ia Helamana i te mau mea ato’a tāna i ’ite mata, i fa’aro’o, ’e i rave.

10 ’E i muri a’era, ’ua tono atu ra Helamana i te tahi mau ta’ata nō te haru mai i taua pupu ta’ata ’eiā ra ’e te mau ta’ata taparahi huna, ’ia taparahihia rātou mai te au i te ture.

11 Inaha rā, ’ia ’ite a’era Gadianetona ē, ’aita Kisakumena i ho’i mai, ’ua mata’u ihora ’oia ’o te pohe roa ’oia ; nō reira ’ua fa’aue ’oia ’ia pe’e mai tāna pupu ta’ata iāna. ’E ’ua horo atu rātou i rāpae i te fenua nā te hō’ē ’ē’a mo’e ē tae atu ra i te mēdēbara ; ’e nō reira ’ia tono atu Helamana nō te haru ia rātou, ’aita roa rātou i ’itehia.

12 E riro te tahi atu ā mau parau i te parauhia nō ni’a i teie Gadianetona a muri atu. ’E ’o te hope’a teie nō te maha ’ahuru ’e ma piti o te matahiti nō te fa’aterera’a a te mau ha’avā i ni’a i te mau ta’ata o Nephi.

13 ’E inaha, ’ia tae i te hope’a o teie nei buka, e ’ite ai ’outou ē, ’o taua Gadianetona nei, ’o te tumu mau ïa i pau ai, ’oia ïa, i pau ai fātata te tā’āto’ara’a nō te mau ta’ata o Nephi.

14 Inaha, ’aita vau e parau nei nō te hope’a o te buka a Helamana, ’āre’a rā tē parau nei au nō te hope’a o te buka a Nephi, ’e nō reira mai ho’i te mau ’ā’amu ato’a tā’u i pāpa’i.