1 ’E nō reira e ti’a ia tātou ’ia ’ite i te hape ’e te pāpū ’ore o te ’ā’au o te mau tamari’i a te ta’ata nei ; ’oia ïa, e ’ite ato’a tātou ē, nā roto i tō te Fatu maita’i rahi ’e te fāito ’ore ’ua ha’amaita’i mai ’e ’ua ha’amanuia mai ’oia i te feiā i ti’aturi iāna.

2 ’Oia ïa, ’e tē ’ite ato’a nei tātou ē, i te tau i ha’amanuia mai ai ’oia i tōna mau ta’ata, ’oia ïa, i te fa’arahira’a i tā tō rātou mau ’āua, tā rātou mau nana māmoe ’e tā rātou mau nana pua’atoro, ’e te ’auro, ’e te ’ārio, ’e te mau mea maitata’i ato’a i tō rātou mau huru ato’a ra ; ’e i te fa’aorara’a ia rātou, ’e te ’īritira’a mai ia rātou i rāpae i te rima o tō rātou mau ’enemi ; i te ha’amarūra’a i te ’ā’au o tō rātou mau ’enemi ’ia ’ore rātou ’ia ’aro mai ia rātou ; ’oia ïa, i te ravera’a i te mau mea ato’a e maita’i ai ’e e ’oa’oa ai tōna mau ta’ata ; ’oia ïa, ’o te tau teie e fa’a’eta’eta ai rātou i tō rātou ’ā’au, ’e e ha’amo’e ai i te Fatu tō rātou Atua, ’e ’a ta’ata’ahi noa ai i Tei Mo’a i raro a’e i tō rātou ’āvae—’oia ïa, ’e te tumu nō te reira nō tō rātou ïa fa’aeara’a maita’i, ’e tō rātou mau manuia rahi.

3 ’E nō reira tē ’ite ato’a nei tātou ē, ’ia ’ore te Fatu ’ia tā’iri i tōna mau ta’ata i te mau ’ati e rave rahi ; ’oia ïa, ’ia ’ore ’oia ’ia fa’atae mai i te pohe ’e te mata’u i ni’a ia rātou, ’e te o’e ’e te mau huru ma’i rahi ato’a ra, ’aita roa rātou e ha’amana’o iāna.

4 ’Auē ho’i te ma’ama’a ē, ’auē ho’i te faufa’a ’ore ē, ’auē ho’i te ’ino ē, ’e te huru diabolo, ’e te ’oi’oi i te rave i te mau ’ohipa ’ī’ino, ’e te tāere i te rave i te ’ohipa maita’i, o te mau tamari’i a te ta’ata nei ; ’oia ïa, ’auē ho’i tō rātou ’oi’oi i te fa’aro’o i te mau parau a te diabolo, ’e i te tu’u i tō rātou ’ā’au i ni’a i te mau mea faufa’a ’ore nō teie nei ao !

5 ’Oia ïa, ’auē ho’i te ’oi’oi i te fa’ateiteihia i roto i te te’ote’o ; ’oia ïa, ’auē ho’i te ’oi’oi i te fa’aahaaha, ’e i te rave i te mau huru ’ohipa ’ī’ino ato’a ra ; e ’auē ho’i tō rātou tāere i te ha’amana’o i te Fatu tō rātou Atua, ’e i te fa’aro’o i tāna mau a’ora’a, ’oia ïa, ’auē ho’i te tāere i te haere nā te mau haere’a o te pa’ari ra !

6 Inaha, ’aita rātou i hina’aro i te Fatu tō rātou Atua, ’o tei hāmani ia rātou, ’ia fa’atere ’e ’ia ari’i i ni’a a’e ia rātou ; noa atu ā tōna maita’i rahi ’e tōna aroha ia rātou ; ’ua ha’afaufa’a ’ore rātou i tāna mau a’ora’a, ’e ’aita rātou i hina’aro ’ia riro ’oia ’ei arata’i nō rātou.

7 ’Auē ho’i te rahi o te faufa’a ’ore o te mau tamari’i a te ta’ata nei ; ’oia ïa, noa atu e mea iti a’e rātou i te repo puehu o te fenua.

8 Inaha ho’i, e haere te repo puehu o te fenua i terā vāhi ’e i terā vāhi, ē tae noa atu i te fa’ata’a-’ē-ra’a, ’ia au te fa’auera’a a tō tātou Atua mure ’ore rahi.

9 ’Oia ïa, inaha, i tōna reo e rurutaina ai ’e e ’āueue ai te mau ’āivi ’e te mau mou’a.

10 ’E nā roto i te mana o tōna reo e pararī rātou, ’e ’a riro ai ’ei fenua pāpū, ’oia ïa mai te peho ra te huru.

11 ’Oia ïa, nā roto i te mana o tōna reo, e ’āueue te fenua ato’a nei.

12 ’Oia ïa, nā roto i te mana o tōna reo, e ’āueue noa te mau niu ’ōfa’i, ē tae noa atu i roto roa.

13 ’Oia ïa, ’e ’ia parau atu ’oia i te fenua nei—’A fa’anu’u—’ua fa’anu’uhia ïa te reira.

14 ’Oia ïa, ’ia parau atu ’oia i te fenua nei—’A ho’i atu ’oe i muri, ’e ’ia fa’aroahia te mahana nō te mau hora e rave rahi—e nā-reira-hia ïa.

15 ’E nō reira, mai te au i tāna parau, ’ua ho’i te fenua i muri, ’e ’ua au atu ra i te mana’o o te ta’ata nei ē, ’ua fa’aea noa te mahana ; ’oia ïa, ’e inaha, e parau mau te reira ; ’oia mau roa ’o te fenua tei fa’anu’u, e ’ere te mahana.

16 ’E inaha, ’oia ato’a, mai te mea e parau atu ’oia i te mau pape rahi o te moana hōhonu—’ia marō ’oe—e nā-reira-hia ïa.

17 Inaha, mai te mea e parau atu ’oia i teie nei mou’a—’ia ’āfa’ihia ’oe i ni’a, ’e ’ia haere mai ’e ’ia ma’iri ho’i i ni’a i terā ’oire ’e ’ia tāpo’ihia te reira—inaha, e nā-reira-hia ïa.

18 ’E inaha, mai te mea e huna te hō’ē ta’ata i te tao’a rahi i roto i te repo, ’e ’ia parau mai te Fatu ē—’ia ’anatemahia te reira, nō te mau ’ohipa ’ī’ino a te ta’ata i huna i te reira, inaha, e ’anatemahia te reira.

19 ’E mai te mea e parau mai te Fatu ē—’ia ’anatemahia ’oe, ’ia ’ore te ta’ata ’ia ’ite ia ’oe mai teie nei taime ē a muri noa atu—inaha, e ’ore roa te ta’ata e ’ite fa’ahou i te reira ē a muri noa atu.

20 ’E inaha, mai te mea e parau mai te Fatu i te hō’ē ta’ata ē—Nō tā ’oe mau ’ohipa ’ī’ino, e ’anatemahia ’oe ē a muri noa atu—e nā-reira-hia ïa.

21 ’E mai te mea e parau mai te Fatu ē—Nō tā ’oe mau ’ohipa ’ī’ino, e tāpū-’ē-hia ’oe mai mua atu i tō’u nei aro—e fa’atupu mau iho ā ’oia i te reira.

22 E ’ati ho’i tōna ’o tāna e parau atu i te reira, ’e e tupu ho’i te reira iāna ’o tē rave i te mau ’ohipa ’ī’ino, ’e ’aita roa ’oia e fa’aorahia ; nō reira, ’o teie te tumu i a’ohia ai te parau nō te tātarahapara’a, ’ia ti’a i te mau ta’ata ’ia fa’aorahia.

23 Nō reira, e ao tō rātou ’o tē tātarahapa ’e ’o tē ha’apa’o i te reo o te Fatu tō rātou Atua ; ’e ’o rātou ho’i teie ’o tē fa’aorahia.

24 ’E ’ia fa’ati’a mai te Atua, nā roto i tōna ra ’īra’a rahi, ’ia arata’ihia te mau ta’ata i te tātarahapara’a ’e i te mau ’ohipa maitata’i, ’ia ti’a ia rātou ’ia fa’aho’ihia i raro a’e i te maita’i nō te maita’i, mai te au i tā rātou ra mau ’ohipa.

25 ’E ’ua hina’aro vau i te mau ta’ata ato’a ’ia fa’aorahia. ’Āre’a rā ’ua tai’o tātou ē, ’ia tae i te mahana hope’a tē vai ra te tahi pae ’o tē hurihia i rāpae, ’oia ïa, ’o tē hurihia i rāpae mai mua mai i te aro o te Fatu.

26 ’Oia ïa, ’o tē tu’uhia i te vāhi nō te mamae hope ’ore, nō te fa’atupu i te mau parau e parau nei ē : ’O rātou ’o tei rave i te ’ohipa maita’i ra, e fāri’i ïa i te ora mure ’ore ; ’e ’o rātou ’o tei rave i te ’ohipa ’ino ra, e fāri’i ïa i te pohe mure ’ore. ’E ’ua nā-reira-hia. ’Āmene.