1 ’E i muri a’era, i te va’u ’ahuru ’e ma ono o te matahiti, ’ua vai noa ā te mau ’āti Nephi i roto i te parauti’a ’ore, ’oia ïa, i roto i te parauti’a ’ore rahi, ’āre’a te mau ’āti Lamana ra tē ha’apa’o maita’i noa ra ïa rātou i te mau fa’auera’a a te Atua, mai te au i te ture a Mose ra.

2 ’E i muri a’era, i teie nei matahiti tē vai ra te hō’ē ta’ata ’o Samuela, e ’āti Lamana ’oia, ’e ’ua haere mai ra ’oia i te fenua ra nō Zarahemela, ’e ’ua ha’amata ihora i te a’o atu i te mau ta’ata. ’E i muri a’era, ’ua a’o atu ’oia i te mau mahana e rave rahi i te parau nō te tātarahapara’a i te mau ta’ata, ’e ’ua ti’avaru atu rātou iāna i rāpae, ’e ’ua fātata roa ’oia i te ho’i atu i tōna ihora fenua.

3 Inaha rā, ’ua tae mai ra te reo o te Fatu iāna ra, ’ia ho’i fa’ahou atu ’oia, ’e ’ia tohu atu i te mau ta’ata i te mea ’o tē tae mai i roto i tōna ra ’ā’au.

4 ’E i muri a’era, ’aita roa rātou i fa’ati’a ’ia tomo mai ’oia i roto i te ’oire ; nō reira ’ua haere atu ra ’oia ’e ’ua pa’uma atu ra i ni’a i te patu o te ’oire, ’e ’ua fa’atoro atu ra i tōna rima ’e ’ua pi’i atu ra ma te reo pūai, ’e ’ua tohu ihora i te mau ta’ata i te mau mea tā te Fatu i tu’u mai i roto i tōna ra ’ā’au.

5 ’E ’ua parau atu ra ’oia ia rātou : Inaha, tē parau atu nei au, ’o Samuela, te ’āti Lamana, ’ia ’outou i te mau parau a te Fatu ’o tāna i tu’u mai i roto i tō’u nei ’ā’au ; ’e inaha, ’ua tu’u mai ’oia i te reira i roto i tō’u nei ’ā’au nō te parau atu i teie nei feiā ē, tē tautau nei te ’o’e nō te parauti’a i ni’a i teie nei feiā ; e ’ore e ma’iri te mau matahiti e maha hānere ra, e ma’iri mai ai te ’o’e nō te parauti’a i ni’a i teie nei feiā.

6 ’Oia mau, tē vai atu ra te pohe rahi e tae mai i ni’a i teie nei feiā, ’e e tae mai iho ā te reira i ni’a i teie nei feiā, ’e ’aita atu e rāve’a e ora ai teie nei feiā, maori rā nā roto i te tātarahapara’a ’e te fa’aro’o i te Fatu ra ia Iesu Mesia, ’o tē haere mai iho ā i roto i te ao nei, ’e ’o tē fāri’i i te ’ati nō te mau mea e rave rahi, ’e ’o tē taparahihia nō tōna ra mau ta’ata.

7 ’E inaha, nā te hō’ē melahi a te Fatu i fa’a’ite mai i te reira iā’u nei, ’e ’ua fa’atae mai ’oia i te mau parau ’oa’oa i tō’u nei vārua. ’E inaha, ’ua tonohia mai au ia ’outou na nō te fa’a’ite ato’a atu ho’i ia ’outou, ’ia roa’a ia ’outou te mau parau ’oa’oa ; inaha rā, ’aita roa ’outou i fāri’i mai iā’u.

8 Nō reira, tē nā ’ō mai ra te Fatu : Nō te ’eta’eta o te ’ā’au o te mau ta’ata o te mau ’āti Nephi, e rave ’ē atu vau i tā’u nei parau mai ia rātou, ’e e fa’aātea ’ē atu vau i tō’u Vārua ia rātou, ’e e ’ore roa vau e fa’a’oroma’i ā ia rātou, ’e e fa’afāriu vau i te ’ā’au o tō rātou mau taea’e ’ia ’ino’ino mai ia rātou, maori rā ’ia tātarahapa rātou.

9 ’E e ’ore e ma’iri te maha hānere matahiti, e fa’ati’a vau ’ia tā’irihia rātou ; ’oia ïa, e tāho’o vau ia rātou i te ’o’e ’e te o’e ’e te mau ma’i rahi.

10 ’Oia ïa, e tāho’o vau ia rātou i roto i tō’u riri ’ū’ana, ’e tē vai ra te tahi pae o tō ’outou mau ’enemi nō te maha o te u’i ’o tē ora noa nō te ’ite atu i tō ’outou ha’amou-roa-ra’a-hia ; ’e e tupu mau iho ā teie, maori rā ’ia tātarahapa ’outou, tē nā reira mai ra te Fatu ; ’e nā tō te maha o te u’i e tāho’o ia ’outou ’ia ha’amou-roa-hia.

11 ’Āre’a rā, mai te mea e tātarahapa ’outou ma te fāriu mai i te Fatu ra i tō ’outou Atua, e fa’afāriu ’ē atu ïa vau i tō’u riri, tē nā reira mai ra te Fatu ; ’oia ïa, tē nā ’ō mai ra te Fatu : E ao tō rātou ’o tē tātarahapa ’e ’o tē fāriu mai iā’u ra, ’āre’a rā e ’ati tōna ’o tē ’ore e tātarahapa.

12 ’Oia ïa, ’auē ho’i tō teie nei ’oire rahi o Zarahemela ; inaha ho’i, nō te feiā parauti’a i roto ra i fa’ahereherehia ai te reira ; ’oia ïa, tē nā ’ō mai ra te Fatu, ’auē ho’i tō teie nei ’oire rahi nō te mea tē ’ite nei au ē, tē vai nei e rave rahi, ’oia ïa, te pae rahi o teie nei ’oire rahi, ’o tē fa’a’eta’eta i tō rātou ’ā’au i mua iā’u nei, tē nā reira mai ra te Fatu.

13 ’Āre’a rā e ao tō rātou ’o tē tātarahapa, ’e ’o rātou ho’i tā’u e fa’aora. Inaha rā, ’āhiri ho’i ’aita e feiā parauti’a i roto i teie nei ’oire rahi, inaha, ’ua riro ïa vau i te ha’ama’iri mai i te auahi mai ni’a mai i te ra’i nō te ha’amou i te reira.

14 Inaha rā, nō te ta’ata parauti’a i fa’ahereherehia ai te reira. Inaha rā, tē vai ra te taime, tē nā reira mai ra te Fatu, ’ia tīahi ’ē atu ’outou i te feiā parauti’a mai rotopū atu ia ’outou, i reira ’ua ineine ’outou nō te pohe, ’oia ïa, e ’ati tō teie nei ’oire rahi, nō te mau ’ohipa ’ī’ino ’e te mau ’ohipa vi’ivi’i i roto i taua ’oire ra.

15 ’Oia ïa, e ’ati tō taua ’oire ra nō Gideona, nō te mau ’ohipa ’ī’ino ’e te mau ’ohipa vi’ivi’i i roto i taua ’oire ra.

16 ’Oia ïa, e ’ati tō te mau ’oire ato’a o te mau ’āti Nephi ē ’ati noa a’e te fenua, nō te mau ’ohipa ’ī’ino ’e te mau ’ohipa vi’ivi’i i roto i taua mau ’oire ra.

17 ’E inaha, e tae mai te ’anatemara’a i ni’a i te fenua, tē nā reira mai ra te Fatu Sabaota, nō te mau ta’ata i ni’a i te fenua nei ; ’oia ïa, nō tā rātou mau ’ohipa ’ī’ino ’e tā rātou mau ’ohipa vi’ivi’i.

18 ’E i muri a’era, tē nā ’ō mai ra te Fatu Sabaota, ’oia ïa, tō tātou Atua rahi mau, ’o tē huna i te mau tao’a rahi i roto i te repo, e ’ore roa ïa te reira e ’itea-fa’ahou-hia iāna, nō te ’anatemara’a rahi i ni’a i te fenua, maori rā ’ia riro ’oia ’ei ta’ata parauti’a ’e ’ia huna ’oia i te reira i te Fatu ra.

19 Tē nā ’ō mai ra ho’i te Fatu, ’o tō’u ïa hina’aro ’ia huna rātou i tā rātou mau tao’a rahi nō’u nei ; ’e ’ia ’anatemahia rātou ’o tē ’ore e huna i tā rātou mau tao’a rahi nō’u nei ; ’e ’aita ho’i e ta’ata e huna i tā rātou mau tao’a rahi nō’u nei ; maori rā, ’o te ta’ata parauti’a ; ’e ’o ’oia ’o tē ’ore e huna i tāna mau tao’a rahi nō’u nei, e ’anatemahia ïa ’oia, ’e te tao’a rahi ato’a, ’e ’aita roa te hō’ē e fa’aorahia nō te ’anatemara’a i fa’ataehia i ni’a i te fenua nei.

20 ’E tē vai ra te mahana e huna ’ē atu ai rātou i tā rātou mau tao’a rahi, nō te mea ’ua ha’amau rātou i tō rātou ’ā’au i ni’a i te mau tao’a rahi ; ’e nō te mea ’ua ha’amau rātou i tō rātou ’ā’au i ni’a i tā rātou mau tao’a rahi, ’e ’a huna ’ē atu ai i tā rātou mau tao’a rahi, ’ia horo atu ai rātou nā mua i tō rātou ra mau ’enemi ; nō te mea ’aita rātou e huna i te reira nō’u nei, e ’anatemahia rātou ’e tā rātou ato’a mau tao’a rahi ; ’e i taua mahana ra e tā’irihia ai rātou, tē nā reira mai ra te Fatu.

21 Hi’o mai ’outou te mau ta’ata o teie nei ’oire rahi, ’e ’a ha’apa’o mai i tā’u nei mau parau ; ’oia ïa, ’a ha’apa’o i te mau parau ’o tā te Fatu i parau mai ; inaha ho’i, ’ua parau mai ’oia ē, ’ua ’anatemahia ’outou nō tā ’outou mau tao’a rahi, ’e ’ua ’anatema-ato’a-hia tā ’outou mau tao’a rahi, nō te mea ’ua ha’amau ’outou i tō ’outou ’ā’au i ni’a i te reira, ’e ’aita ho’i i ha’apa’o i te mau parau a tei hōro’a mai i te reira ia ’outou na.

22 ’Aita ’outou i ha’amana’o i te Fatu ra i tō ’outou Atua i roto i te mau mea ’o tāna i ha’amaita’i mai ia ’outou na, ’āre’a rā ’ua ha’amana’o noa ’outou i tā ’outou mau tao’a rahi, ’e ’aita i ha’amāuruuru i te Fatu ra i tō ’outou Atua nō te reira ; ’oia ïa, ’aita tō ’outou ’ā’au e tītau nei i te Fatu, ’āre’a rā tē rahi ra te te’ote’o, te fa’aahaaha, te fa’arahi-atu-ā-ra’a, te fe’i’i, te mārōra’a, te tāiroiro, te hāmani ’ino, te taparahira’a ta’ata, ’e te mau huru ’ohipa ’ī’ino ato’a ra.

23 Nō te reira ho’i te Fatu te Atua i fa’atae mai ai i te ’anatemara’a i ni’a iho i te fenua nei, ’e i ni’a ato’a iho i tā ’outou mau tao’a rahi, nō tā ’outou ïa mau ’ohipa ’ī’ino.

24 ’Oia ïa, e ’ati tō teie nei feiā, nō teie tau i taehia mai nei, ’e ’ua tīahi ’ē atu ’outou i te mau peropheta, ’e ’ua vahavaha atu ia rātou, ’e ’ua pēhi atu ia rātou i te ’ōfa’i, ’e ’ua taparahi atu ia rātou, ’e ’ua rave i te mau huru ’ohipa ’ī’ino ato’a i ni’a ia rātou, mai tā rātou i nā reira i te ’anotau tahito ra.

25 ’E i teienei, ’ia paraparau ’outou, e nā ’ō ïa ’outou ē : ’Āhiri tō mātou mau mahana i riro na mai te mau mahana o tō mātou mau metua i tahito ra, e’ita paha ïa mātou e taparahi i te mau peropheta ; ’e e’ita paha ïa mātou e pēhi ia rātou i te ’ōfa’i, ’e e’ita paha ïa mātou e tīahi atu ia rātou i rāpae.

26 Inaha, e mea ’ino roa atu ’outou ia rātou ; mai te Fatu e ora ra, ’āhiri ē haere mai te hō’ē peropheta i rotopū ia ’outou na ma te a’o mai ia ’outou i te parau a te Fatu, ’o tē fa’a’ite pāpū mai ia ’outou i tā ’outou mau hara ’e tā ’outou mau ’ohipa ’ī’ino, e tupu ïa tō ’outou riri iāna, ’e e tīahi ’ē atu ’outou iāna ma te ’imi i te rāve’a ’ia pohe ’oia ; ’oia ïa, e riro ho’i ’outou i te parau ē, e peropheta ha’avare ’oia, ’e e ta’ata hara ’oia, ’e nō te diabolo ’oia, nō te mea ’ua fa’a’ite pāpū mai ’oia ē, e ’ohipa ’ino ana’e tā ’outou.

27 Inaha rā, mai te mea e haere mai te hō’ē ta’ata i rotopū ia ’outou na, e riro ïa ’outou i te parau ē : ’A rave i teie, e ’ere ïa i te mea ’ino ; ’a rave i terā, ’e ’aita ’outou e fa’autu’ahia ; ’oia ïa, e riro ho’i ’oia i te parau mai ē : ’A haere noa nā roto i te te’ote’o o tō ’outou iho ’ā’au ; ’oia ïa, ’a haere noa nā roto i te te’ote’o o tō ’outou mata, ’e ’a rave noa i te hina’aro o tō ’outou ’ā’au—’e mai te mea e haere mai te hō’ē ta’ata i rotopū ia ’outou ma te parau mai i te reira, e fāri’i ïa ’outou iāna, ma te parau ē, e peropheta ’oia.

28 ’Oia ïa, e fa’ateitei ’outou iāna, ’e e ’ōpere ’outou i tā ’outou tao’a iāna ; e hōro’a atu ’outou i te tahi tufa’a nō tā ’outou ’auro ’e te ’ārio nāna, ’e e fa’a’ahu ’outou iāna i te ’ahu moni rahi ; ’e nō te mea tē parau mai ra ’oia i te mau parau tāvaimanino ia ’outou, ’e tē parau mai ra ’oia ē, ’ua maita’i tātou, ’e nō reira ’aita atu ra ’outou i ’ite i te hapa i roto iāna ra.

29 ’Auē ho’i ’outou e te u’i parauti’a ’ore ’e te ha’api’o ē ; ’o ’outou e te feiā ’ā’au pa’ari ’e te feiā ’ā’au ’eta’eta, e aha ïa te maorora’a ’o tā ’outou i mana’o ē, e fa’a’oroma’i noa te Fatu ia ’outou na ? ’Oia ïa, e aha ïa te maorora’a tā ’outou i ’ōpua ’ia vaiiho noa ia ’outou ’ia arata’ihia e te feiā arata’i ma’ama’a ’e te matapō ra ? ’Oia ïa, e aha ïa te maorora’a tā ’outou i hina’aro nō te mā’iti ’ia fa’aea noa i roto i te pōiri ’e ’eiaha i roto i te māramarama ?

30 ’Oia ïa, inaha, ’ua tupu a’ena te riri o te Fatu ia ’outou na ; inaha, ’ua ’anatema ’oia i te fenua nō tā ’outou mau ’ohipa ’ī’ino.

31 ’E inaha, e tae mai te taime e ’anatema ai ’oia i tā ’outou mau tao’a rahi, ’e e mahere ’ē noa atu te reira ia ’outou, ’e ’aita atu ra e ti’a ia ’outou ’ia tāpe’a noa i te reira ; ’e i te mau mahana nō tō ’outou vevera’a, e ’ore roa e ti’a ia ’outou ’ia tāpe’a noa i te reira.

32 ’E i te mau mahana nō tō ’outou vevera’a, e ti’aoro atu ’outou i te Fatu ; ’e e faufa’a ’ore tā ’outou ra ti’aorora’a, nō te mea ’ua tae a’ena mai tō ’outou fa’aanora’a i ni’a ia ’outou, ’e ’ua pāpū maita’i tō ’outou ha’amoura’a ; ’e i reira ’outou e ’oto ai ’e e ’auē ai i taua mahana ra, tē nā reira mai ra te Fatu Sabaota ra. ’E i reira ho’i ’outou e ’oto ai, ’e e parau mai ai ē :

33 ’Āhiri vau i tātarahapa na, ’e ’āhiri ’aita vau i taparahi na i te mau peropheta, ’e i pēhi ia rātou i te ’ōfa’i ra, ’e i tīahi ’ē atu ia rātou. ’Oia ïa, i taua mahana ra, e riro ai ’outou i te parau mai ē : ’Āhiri tātou i ha’amana’o na i te Fatu i tō tātou Atua i te mahana ’oia i hōro’a mai ai i tā tātou mau tao’a rahi, ’aita ïa te reira i riro ’ei mea mahere noa ’e mo’e atu ai ia tātou nei ; inaha ho’i, ’ua reva ’ē roa tā tātou ra mau tao’a ia tātou nei.

34 Inaha, ’ia ha’apae tātou i te mauha’a rave ’ohipa i teie nei vāhi, e ananahi ’ua mo’e roa te reira ; ’e inaha, ’ua rave-’ē-hia tā tātou mau ’o’e ia tātou i te mahana i ’imi ai tātou i te reira nō te ’arora’a.

35 ’Oia ïa, ’ua huna tātou i tā tātou mau tao’a rahi ’e ’ua rave-’ē-hia atu te reira ia tātou nei, nō te ’anatemara’a i tae mai i ni’a i te fenua nei.

36 ’Āhiri ho’i tātou i tātarahapa i te mahana i tae mai ai te parau a te Fatu ia tātou nei ; inaha ho’i, ’ua ’anatemahia te fenua nei, ’e ’ua riro te mau mea ato’a ’ei mea mahere noa, ’e ’aita roa e ti’a ia tātou ’ia tāpe’a noa mai i te reira.

37 Inaha, ’ua ha’a’atihia tātou e te mau demoni, ’oia ïa, ’ua ha’a’atihia tātou e te mau melahi a te diabolo ’o tei tītau ’ia ha’amou i tō tātou vārua. Inaha, ’ua rahi roa tā tātou mau ’ohipa ’ī’ino. E te Fatu, ’aita ānei e ti’a ia ’oe ’ia fa’afāriu ’ē atu i tō ’oe riri ia mātou nei ? ’E nā reira ho’i ’outou i te parau i taua mahana ra.

38 Inaha rā, ’ua ma’iri tō ’outou mau mahana tāmatara’a ; ’ua fa’atāere noa ’outou i te mahana nō tō ’outou fa’aorara’a e tae roa ’ua tāere roa, ’e ’ua pāpū tō ’outou pohe ; ’oia ïa, ’e ’ua tītau noa ’outou i te tā’āto’ara’a o te mau mahana nō tō ’outou orara’a i te mau mea ’o tē ’ore e noa’a ia ’outou ; ’e ’ua tītau ’outou i te ’oa’oa nā roto i te ravera’a i te mau ’ohipa ’ī’ino, ’e ’aita ho’i te reira i au i te huru nō taua parauti’a nei i roto i tō tātou Upo’o Fa’atere mure ’ore rahi.

39 E te mau ta’ata nō teie nei fenua ē, ’ia fa’aro’o mai ’outou i tā’u nei mau parau ! ’E tē pure nei au ’ia fa’afāriu-’ē-hia atu te riri o te Fatu ia ’outou na, ’e ’ia tātarahapa ’outou ’e ’ia fa’aorahia.