Pene 39
’Ua fāri’i Nephi i te mana rahi
’A haere ai Nephi i tōna fare ma te feruri i te mea tā te Fatu i fa’a’ite iāna ’e i te ’ino o te ’āti Nephi. ’Ua ’oto ’oia nō tō rātou ’ino.
’Ua parau te Fatu ia Nephi ’e ’ua ha’apoupou iāna nō te ha’apa’ora’a ’e te ’ohipa-itoito-ra’a nō te ha’api’i i te ’evanelia.
E mana tō Nephi nō te rave i te mau mea ato’a. ’Ua ’ite te Fatu e fa’a’ohipa ’oia i teie mana ma te parau-ti’a.
’Ua parau te Fatu ia Nephi ’ia fa’aara i te ’āti Nephi ē, mai te mea ’aita rātou e tātarahapa, e ha’amou ’oia ia rātou. ’Ua haere ’oi’oi Nephi e fa’aara i te nuna’a.
’Aita te ’āti Nephi i ti‘aturi ia Nephi. ’Ua tāmata rātou i te huri iāna i roto i te fare tāpe’ara’a, ’ua pāruru rā te mana o te Atua iāna.
’Ua fa’aara Nephi i te parau a te Atua i te mau ’āti Nephi ato’a.
’Ua rahi atu ā rā te ’ino o te mau ta’ata ’e ’ua ha’amata i te ’aro te tahi ’e te tahi.
’Ua pure Nephi nō te o’e, ma te ti’aturi ē nā te mā’a ’ore e fa’aha’eha’a te ’āti Nephi ’e e tauturu te reira ia rātou ’ia tātarahapa.
’Ua tae mai te o’e. ’Aita i ua, ’ua marō te fenua ’e ’aita te mau fa’a’apu i tupu. ’Ua fa’aea te mau ta’ata i te ’aro.
’Ua po’ia te ’āti Nephi ’e e rave rahi o rātou tei pohe. ’O rātou tei ora mai ’ua ha’amata i te ha’amana’o i te Fatu ’e i te mea tā Nephi i ha’api’i ia rātou.
’Ua tātarahapa te nuna’a i tā rātou mau hara ’e i muri iho ’ua tāparu i tō rātou mau ha’avā ’ia ani ia Nephi ’ia fa’aea te o’e. ’Ua haere te mau ha’avā iō Nephi.
I tō Nephi ’itera’a ’ua fa’aha’eha’a te nuna’a ’e ’ua tātarahapa, ’ua ani ’oia i te Fatu ’ia fa’aea te o’e.
’Ua pāhono te Fatu i te pure a Nephi, ’e ’ua ha’amata i te ua. ’Aita i maoro, ’ua tupu fa’ahou te mau mā’a hotu. ’Ua fa’ahanahana te nuna’a i te Atua ’e ’ua ’ite ē e peropheta rahi o Nephi.
E rave rahi ’āti Nephi tei ’āmui mai i te ’Ēkālesia. ’Ua monihia rātou, ’e ’ua rarahi atu tō rātou mau ’oire. Tē vai ra te hau i ni’a i te fenua.
I muri iho, te mau ’āti Nephi tei ’āmui atu nā mua a’e i te ’āti Lamana ’ua ’aro i te ’āti Nephi.
’Ua tāmata te ’āti Nephi i te ’upo’oti’a i ni’a i tō rātou mau ’enemi, tei riro ’ei feiā ’eiā nō Gadianetona, ’aita rā i ti’a ia rātou nō te mea ’ua riro fa’ahou mai rātou ’ei mau ta’ata ’ino.
I tō te ’āti Nephi rirora’a ’ei mea parau-ti’a, ’ua ha’amaita’i te Fatu ia rātou. I tō rātou rirora’a ’ei ta’ata te’ote’o ’e ’ua ha’amo’e i te Fatu, ’ua hōro’a ’oia ia rātou te mau pe’ape’a nō te tauturu ia rātou ’ia ha’amana’o iāna.