Pene 49
Moromona ’e tāna mau ha’api’ira’a
E rave rahi matahiti i muri mai i tō Iesu Mesia fārereira’a i te ’āti Nephi, ’ua fa’aru’e te hō’ē pupu ta’ata na’ina’i i te ’Ēkālesia ’e ’ua pi’i ia rātou iho te ’āti Lamana.
I te pae hōpe’a fātata te nuna’a ato’a ’ua riro ’ei mau ta’ata ’ino, te ’āti Nephi ’e te ’āti Lamana.
Tei ia Amarona ra, te hō’ē ta’ata parau-ti’a te mau papa’a parau mo’a. ’Ua parau te Vārua Maita’i iāna ’ia huna i te reira ’ia pāruruhia te reira.
’Ua parau Amarona ia Moromona, hō’ē tamaiti e 10 matahiti, tei hea te mau papa’a parau i te hunara’ahia. ’Ua ’ite Amarona e nehenehe ’oia e ti’aturi ia Moromona.
’Ia tae i te 24ra’a o tōna matahiti, ’ia haere Moromona e ti’i i te mau papa’a parau a Nephi ’e ’ia pāpa’i i ni’a iho nō tōna nuna’a.
I te 11ra’a o te matahiti o Moromona, ’ua ha’amata te hō’ē tama’i i rotopū i te ’āti Nephi ’e te ’āti Lamana. ’Ua upo’oti’a mai te ’āti Nephi, ’e ’ua tupu fa’ahou te hau.
’Ua vai noa ra rā te ’āti Nephi i roto i te ’ino i rave ’ē atu ai te Fatu i nā pipi e toru, nā te reira i fa’ahope te mau temeio ’e te fa’aorara’a. ’Aita te Vārua Maita’i i arata’i fa’ahou i te nuna’a.
I te 15ra’a o te matahiti o Moromona, ’ua haere mai Iesu Mesia e fārerei iāna. ’Ua ha’api’i rahi mai Moromona nō ni’a i te Fa’aora ’e tōna maita’i.
’Ua hina’aro Moromona e poro i te nuna’a, ’ua parau rā Iesu iāna ’aita nō te ’ino rahi o te nuna’a. ’Ua ’eta’eta tō rātou ’ā’au i mua i te Atua.
’Aita i maoro roa, ’ua ha’amata te tahi atu tama’i. E ta’ata rahi ’e te pūai ’o Moromona, ’e ’ua mā’iti te ’āti Nephi iāna ’ei fa’atere i tō rātou nu’u.
’Ua ’aro te ’āti Nephi i te ’āti Lamana e rave rahi matahiti. ’Ua tāmata Moromona i te fa’aitoito i tōna nuna’a ’ia ’aro nō tō rātou mau ’utuāfare ’e tō rātou nohora’a.
’Are’a rā, nō te ’ino rahi o te ’ati Nephi, ’aita te Fatu i tauturu ia rātou.
’Ua parau Moromona i te ’āti Nephi e fa’ahereherehia rātou mai te mea noa e tātarahapa rātou ’e e bāpetizohia. ’Ua pāto’i ra te nuna’a.
’Ua te’ote’o rātou nō tō rātou pūai, ma te parau ē e taparahi pohe rātou i te ’āti Lamana. Nō te ’ino o te ’āti Nephi, ’ua pāto’i Moromona i te arata’i ā ia rātou.
’Ua ha’amata te ’āti Lamana i te ha’apau i te ’āti Nephi i roto i te mau ’arora’a ato’a. ’Ua fa’aoti Moromona e arata’i fa’ahou i te mau nu’u ’āti Nephi.
’Ua ’ite ’oia e’ita te ’āti Nephi ’ino e ’upo’oti’a i te tama’i. ’Aita rātou i tātarahapa ’aore rā i pure nō te tauturu e hina’aohia ra e rātou.
’Ua rave mai Moromona i te mau papa’a parau ato’a mai te ’āivi i reira tō Amarona hunara’a i te reira ’e ’ua pāpa’i nō te nuna’a e tai’o i te papa’a parau i te hō’ē mahana.
’Ua hina’aro ’oia i te mau ta’ata ato’a, tae noa atu te mau ’āti Iuda, ’ia ’ite nō ni’a ia Iesu Mesia, ’ia tātarahapa ’e ’ia bāpetizohia, ’e ’ia ora i te ’evanelia, ’e ’ia ha’amaita’ihia.
’Ua fa’auru te Vārua ia Moromona ’ia tu’u i te mau ’api na’ina’i a Nephi, tei roto ho’i te mau parau tohu nō te haerera’a mai o te Mesia, ’e te mau papa’a a Moromona.
’Ua arata’i Moromona i te ’āti Nephi i te fenua Kumora, i reira ’ua ineine rātou nō te tama’i fa’ahou i te ’āti Lamana.
Moromona, te ta’ata pa’ari. ’Ua ’ite ’oia ’o teie te ’arora’a hope’a. ’Aita ’oia i hina’aro ’ia ’ite te ’āti Lamana i te papa’a parau mo’a ’e ’ia ha’amou i te reira.
Nō reira ’ua hōro’a ’oia i te mau papa’a a Moromona i tāna tamaiti, ia Moroni, e ’ua huna te toe’a o te mau papa’a i te ’āivi nō Kumora.
’Ua aro te ’āti Lamana ’e ’ua taparahi pohe te tā’āto’ara’a, ’eiaha ra e 24 ’āti Nephi. ’Ua pēpē Moromona.
’Ua ’oto Moromona, ē ’ua pohe e rave rahi ’āti Nephi, ’ua ’ite rā ’oia ’ua pohe rātou nō tō rātou fa’aru’era’a ia Iesu.
’Ua tāmata Moromona i te ha’api’i i te ’āti Nephi i te parau mau. ’Ua parau ’oia ia rātou i te faufa’a rahi nō te roa’ara’a te fa’aro’o ia Iesu Mesia.
’Ua tāmata ’oia i te ha’api’i ia rātou ’ia vai te ti’aturi i te Tara’ehara a Iesu Mesia ’e ’ia roa’a te aroha, ’o te here mau ïa o te Mesia.
’E ’ua pāpa’i Moromona i te mau rata i tāna tamaiti, Moroni, tei ha’api’i ato’a i te ’evanelia i te ’āti Nephi.
’Ua pāpa’i Moromona nō ni’a i te ’ino ri’ari’a o te ’āti Nephi. ’Ua parau ’oia ia Moroni ’ia vai ti’aturi noa ia Iesu Mesia.
’Ua taparahi pohe te ’āti Lamana ia Moromona ’e te ’āti Nephi ato’a, nā Moroni rā i fa’aoti i te pāpa’i i te mau papa’a parau.