Pene 10
Iakoba ’e o Serema
’Ua parau o Nephi ia Iakoba ’ia pāpai i te mau mea e tauturu i te mau ta’ata ’ia ti’aturi ia Iesu Mesia.
’Ua hōro’a Nephi ia Iakoba te mana ’ia riro ’ei tahu’a i roto i te ’Ēkālesia ’e nō te ha’api’i i te ’āti Nephi i te parau a te Atua.
I muri a’e i te pohera’a o Nephi, e rave rahi mau ’āti Nephi tei riro mai ’ei ta’ata ’ino. ’Ua ha’api’i Iakoba i te nuna’a ’e ’ua parau ia rātou ’ia tātarahapa nō te mau ’ohipa ’ino tā rātou i rave ra.
’Ua haere te hō’ē ta’ata ’ino o Serema te i’oa nā roto i te mau ’āti Nephi,’ua ha’api’i ia rātou ’eiaha e ti’aturi ia Iesu Mesia.
’Ua parau Serema i te nuna’a ē, ’aita e Mesia e vai ra. E rave rahi ta’ata tei ti’aturi ia Serema.
’Ua ha’api’i Iakoba i te nuna’a ’ia ti’aturi i te Mesia. ’Ua hina’aro Serema e paraparau ia Iakoba ’e ’ia ti’aturi ’oia ē e ’aita e Mesia.
’Aita te fa’aro’o ia Iesu Mesia o Iakoba i ’āueue. ’Ua ’ite ’oia i te mau melahi, ’e ’ua fa’aro’o i te reo o te Fatu. ’Ua ’ite ’oia e tae mai Iesu.
Tē vai ra te Vārua Maita’i ia Iakoba ra ’a fa’a’ite ai ’oia i tōna ’itera’a pāpū nō Iesu Mesia ia Serema .
’Ua ani o Serema ’ia hi’o i te hō’ē tāpa’o. ’Ua hina’aro ’oia ia Iakoba ’ia fa’a’ite tē vai ra hō’ē Atua. ’Ua hina’aro ’oia ’ia ’ite i te hō’ē temeio.
’Aita o Iakoba i ani atu i te Atua i te hō’ē tāpa’o. ’Ua parau ’oia ē, ’ua ’ite a’ena Serema e parau mau te mau mea tā Iakoba i ha’api’i.
’Ua parau Iakoba mai te mea e ta’iri te Atua ia Serema, e riro ïa ’ei tāpa’o nō te mana o te Atua.
’Ua topa ’oi’oi Serema i raro. ’Aita ’oia e nehenehe e ti’a fa’ahou e rave rahi mahana.
’Ua paruparu o Serema ’e ’ua ’ite e pohe ’oia. ’Ua pi’i ’oia i te nuna’a ’ia ha’aputuputu mai.
’Ua parau ’oia ia rātou ’ua ha’avare ’oia. ’Ua parau ’oia ’ia ti’aturi rātou ia Iesu Mesia.
I muri a’e i te otira’a Serema i te paraparau i te nuna’a, pohe ihora ’oia. ’Ua ’ite te nuna’a i te mana o te Atua, ’e ’ua ma’iri ihora rātou i ni’a i te repo.
’Ua ha’amata te nuna’a i te tātarahapa ’e i te tai’o i te mau pāpa’ira’a mo’a. ’Ua ora rātou i roto i te hau ’e te here. ’Ua ’oa’oa o Iakoba ’e ’ua ’ite ē ’ua pāhono te Atua i tāna mau pure.