Pene 51
Te ’āti Iareda e tere ra i te fenua i parauhia ra
Mai te taime ’a puhapa ai te ’āti Iareda i te pae miti, ’ua mo’e i te taea’e o Iareda ’ia pure. ’Ua haere mai te Fatu nā roto i te hō’ē ata nō te parau iāna ’ia tātarahapa.
’Ua tātarahapa te taea’e o Iareda ’e ’ua pure. ’Ua fa’a’ore te Fatu i te hara a te taea‘e o Iareda ’ua parau rā ’eiaha ’oia ’ia hara fa’ahou.
’Ua parau te Fatu i te taea’e o Iareda ’ia hāmani i te mau pahī nō te ’āfa’i ia rātou i te fenua i parauhia.
’Ua parau te Fatu i te taea’e o Iareda nāhea ’ia hāmani i te pahī.
’Ua hāmani-piri-maita’i-hia te mau pahī ’eiaha te pape ’ia tomo i roto.
’Ua feruri te taea’e o Iareda e nāhea te mau ta’ata ’ia fāri’i i te mata’i nō te huti i te aho i roto i te pahī. ’Ua ui atu ’oia i te Fatu e aha tā rātou e rave.
’Ua parau te Fatu iāna ’ia hāmani ’oia hō’ē ’āpo’o i ni’a ’e i raro o te mau pahī ato’a. E ti’a i te ’āpo’o ’ia ’īritihia ’ia tomo mai te mata’i ’e ’ia ’ōpanihia ’ia tomo mai te pape.
’Ua parau te taea’e o Iareda i te Fatu ē e mea pōiri roa i roto i te mau pahī. ’Ua ani te Fatu iāna ’ia feruri i te hō’ē rāve’a nō te fāri’i i te māramarama i roto i te pahī.
E’ita te māramarama e tae mai i roto i te pahī nā roto i te auahi ’aore rā nā te mau ha’amāramarama nō te mea e pārari te reira.
’Ua haere te taea’e o Iareda i te hō’ē mou’a ’e ’ua hāmani e 16 ’ōfa’i nainai nō roto mai i te papa. ’Ia hi’ohia te mau ’ōfa’i mai te hi’o ’ana’ana ra. ’Ua hāmani ’oia e piti ’ōfa’i nō te pahī tāta’itahi.
’Ua hōpoi te taea’e o Iareda i te mau ’ōfa’i i ni’a i te tupua’i mou’a. I reira ’ua pure ’oia i te Fatu.
’Ua ani te taea’e o Iareda i te Fatu ’ia fa’ati’a’ia i te mau ’ōfa’i ’ia nehenehe te reira ’ia ’ana’ana i roto i te mau pahī.
’Ua fa’ati’a’ia te Fatu i te mau ’ōfa’i tātata’itahi i tōna manimani rima.
Nō te fa’aro’o rahi o te taea’e o Iareda, ’ua ’ite ’oia i te manimani rima o te Fatu. ’Ua hi’o ’oia mai te manimani rima o te ta’ata tino.
I muri iho, ’ua fa’a’ite mai te Fatu iāna iho i te taea’e o Iareda.
’Ua parau Iesu ē, te mau ta’ata ’o te ti’aturi iāna, e fāri’i ïa i te ora mure ’ore.
’Ua ha’api’i Iesu ’e ’ua fa’a’ite i te taea’e o Iareda e rave rahi mau mea. ’Ua parau Iesu iāna ’ia pāpa’i i te mea tāna i ’ite ’e i fa’aro’o.
’Ua amo mai te taea’e o Iareda i te mau ’ōfa’i nā ni’a mai i te mou’a. ’Ua tu’u ’oia hō’ē ’ōfai i roto i nā poro e piti o te mau pahī. ’Ua hōro’a mai te reira i te māramarama i roto i te mau pahī.
’Ua haere te ’āti Iareda i roto i te mau pahī ’e tā rātou mau animara ’e te mā’a. ’Ua fa’atupu te Fatu i te hō’ē mata’i pūai tei pūpuhi i te mau pahī i te fenua i parauhia.
’Ua pāruru te Fatu ia rātou i ni’a i te miti rahi. ’Ua ha’amāuruuru rātou i te Fatu ’e ’ua hīmene ’ārue iāna.
I muri a’e e 344 mahana i ni’a i te pape, ’ua tāpae te mau pahī i te pae tāhatai nō te fenua i parauhia.
I te haerera’a te ’āti Iareda i rāpae i te mau pahī, ’ua tūturi rātou i raro ’e ’ua tū’ou ma te roimata nō te ’oa’oa.
’Ua patu te ’āti Iareda i te mau fare ’e ’ua tanu i te mau huero i ni’a i te fenua i parauhia. ’Ua ha’api’i rātou i tā rātou mau tamari’i ’ia fa’aro’o i te Fatu ’e ’ia ha’apa’o i tāna mau parau.