Pene 17
Alama ’e tōna mau ta’ata e horo ’ē ra
I te hō’ē mahana, ’a ’ohipa noa ai te nuna’a o Alama i roto i tā rātou mau fa’a’apu, ’ua haere mai te ’āti Lamana nā te ’ōti’a fenua nō te tomo mai i roro i tō rātou fenua.
’Ua ri’ari’a roa te ’āti Nephi ’e ’ua horo atu i roto i te ’oire ’ia pāruruhia. ’Ua parau Alama ia rātou ’ia ha’amana’o i te Atua ’e e tauturu mai ’oia ia rātou. ’Ua ha’amata te ’āti Nephi i te pure.
’Ua tāmaru te Fatu i te ’ā’au o te ’āti Lamana, ’e ’aita rātou i tāparahi i te ’āti Nephi. ’Ua mo’e te ’āti Lamana i te tāmatara’a e ’imi i te nuna’a o te ari’i Limehi.
’Ua fafau te ’āti Lamana ia Alama ē e’ita rātou e ha’ape’ape’a i tōna nuna’a mai te mea e fa’a’ite ’oia ia rātou nāhea ’ia ho’i i tō rātou fenua. ’Ua fa’a’ite Alama ia rātou i te ’ē’a.
’Aita roa rā te ’āti Lamana i tāpe’a i tā rātou fafau. ’Ua tu’u rātou i te mau tīa’i ’ati a’e te fenua, ’e ’aita o Alama ’e tōna nuna’a i ti’amā fa’ahou.
’Ua tu’u te ari’i ’āti Lamana ia Amulona ’ei fa’atere i ni’a i te nuna’a o Alama. E ’āti Nephi o Amulona ’e e tahu’a ’ino nā te ari’i Noa.
’Ua fa’arave rahi Amulona i te ’ohipa i te nuna’a o Alama. ’Ua pure rātou ’ia tauturuhia mai, ’ua parau rā Amulona te ta’ata e ’itehia tē pure ra e taparahi-pohe-hia ’oia. ’Ua tāmau noa te nuna’a i te pure i roto i tō rātou ’ā’au.
’Ua fa’aro’o te Atua i tā rātou pure ’e ’ua fa’apūai i te nuna’a ma te fa’a’ōhie i tā rātou ’ohipa. ’Ua ’oa’oa te mau ta’ata ’e ’ua fa’a’oroma’i.
’Ua ’oa’oa te Atua ē ’ua ha’apa’o itoito te nuna’a. ’Ua parau ’oia ia Alama ē e tauturu ’oia ia rātou ’ia mahemo i te ’āti Lamana.
I te roara’a o te pō ’ua ha’aputuputu te nuna’a i tā rātou mau mā’a ’e te mau animara. I te po’ipo’i a’e ’ua fa’ataoto te Atua i te ’āti Lamana ’a fa’aru’e ai Alama ’e tōna nuna’a i te ’oire.
I muri a’e i te rāterera’a e 12 mahana, ’ua tae te nuna’a i Zarahemela, i reira ’ua fāri’ihia rātou e te ari’i Mosia ’e tōna nuna’a.