Pene 13
Zenifa
’Ua fa’aru’e o Zenifa ’e hō’ē pupu ’āti Nephi i tō rātou fare i Zarahemela ’e ’ua rātere atu i te fenua o Nephi, i reira na ho’i te tahi mau ’āti Nephi i te orara’a.
’Ua ’ite rātou i te ’āti Lamana i te orara’a i reira. ’Ua haere o Zenifa ’e e maha o tōna mau ta’ata i roto i te ’oire nō te paraparau i te ari’i. ’Ua ani rātou i te ari’i Lamana e nehenehe ānei rātou e ora i roto i tōna fenua.
’Ua parau te ari’i Lamana e nehenehe rātou e fāri’i e piti o tōna mau ’oire. ’Ua hina’aro te ari’i ’ia ora rātou i roto i tōna fenua ’ia fa’ariro ’ia rātou ’ei tītī nāna.
’Ua patu te nuna’a o Zenifa i te mau fare ’e ’ua hāmani i te mau patu ’ati a’e tō rātou ’oire. ’Ua tanu rātou i te mau huru huero ato’a ’e te hotu. E mau nana animara ato’a tā rātou.
’Ua parau te ari’i Lamana i tōna nuna’a e te pūai roa mai ra te ’āti Nephi. ’Aita i maoro roa, e rave rahi ’āti Lamana tei haere e ’aro i te ’āti Nephi ’e ’ua ’eiā i tā rātou mau animara ’e te mau ’auhune.
’Ua horo te mau ’āti Nephi i te ’oire o Nephi. I reira Zenifa i te ha’anara’a i te nuna’a i te mau fana ’e te mau te’a, te mau ’o’e, te mau ma’a. ’Ua haere rātou e ’aro i te ’āti Lamana.
Hou rātou e tāma’i ai, ’ua pure te mau ’āti Nephi, i te anira’a i te tauturu a te Atua. ’Ua ha’amaita’i te Atua i te ’āti Nephi ma te pūai rahi atu, ’e ’ua upo’oti’a rātou i ni’a i te ’āti Lamana.
I muri a’e i te arora’a, ’ua tu’u Zenifa i te mau tīa’i ’ati a’e te mau ’oire o te ’āti Nephi. ’Ua hina’aro ’oia e pāruru i tōna nuna’a ’e tā rātou mau animara i te ’āti Lamana.
’Ua ora te ’āti Nephi i roto i te hau e rave rahi matahiti. E ’ohipa te mau tāne i roto i te mau fa’a’apu, ’e te mau vahine e fa’a’ohu i te taura ’e e hāmani i te ’ahu.
’Ua pohe te ari’i Lamana ’e ’ua riro mai tāna tamaiti ’ei ari’i. ’Ua tono te ari’i ’āpī i tōna mau nu’u nō te ’aro i te ’āti Nephi.
’Ua fāri’i fa’ahou te ’āti Nephi i te pūai nō ō mai i te Fatu ra. ’Ua taparahi pohe rātou e rave rahi ’āti Lamana, ’e ’ua horo ’ē atu te toe’a.