Pene 30
Alama e a’o ra i tāna mau tamaiti
’Aita Alama i ’oa’oa nō te ’ino o te ’āti Nephi. ’Ua paraparau ’oia i tāna mau tamaiti tāta’itahi nō ni’a i te orara’a ma te parau-ti’a.
’Ua parau Alama ia Helamana, tāna tamaiti matahiapo, ’ia ti’aturi i te Atua. ’Ua parau ’oia nō ni’a i te melahi tā te Atua i tono mai nō te parau ia Alama ’ia fa’aea i te ha’amou i te ’Ēkālesia.
’Ua māuiui Alama e toru mahana nō tāna hara. I muri iho, ’ua ha’amana’o ’oia i te mau ha’api’ira’a a tōna metua tāne nō ni’a ia Iesu, ’e ’ua ’ite ’oia i tāna mau hara i te fa’a’orera’ahia.
’Ua pure Alama ’ia fa’a’orehia tāna mau hara, e ’ua mono te māuiui o tōna vārua i te ’oa’oa. ’Ua fa’a’orehia tāna mau hara nō te mea e fa’aro’o tōna ia Iesu Mesia ’e ’ua tātarahapa.
I reira, ’ua ha’api’i Alama i te ’evanelia ia vetahi ’ē ’ia ti’a ia rātou ’ia ’ite i taua ā ’oa’oa ra tāna i fāri’i. ’Ua ha’amaita’i te Atua ia Alama nō tōna ti’aturi i te Atua.
’Ua hōro’a Alama i te mau papa’a parau mo’a ia Helamana ’e ’ua parau iāna ’ia tāmau noa i te pāpa’i i te ’ā’amu o tō rātou nuna’a.
’Ua parau Alama iāna ē mai te mea e ha’apa’o ’oia i te mau fa’auera’a, e ha’amaita’i te Atua iāna ’e e tauturu iāna ’ia pāruru i te mau papa’a parau.
’Ua parau ato’a Alama ia Helamana ’ia pure i te po’ipo’i ’e te pō ’e ’ia paraparau i te Atua nō te mau mea ato’a tāna e rave ra ’ia nehenehe i te Atua ’ia tauturu iāna ’ia arata’ihia ’oia.
’Ua ’oa’oa Alama i tāna tamaiti o Sibelona, tei riro ’ei hō’ē misiōnare itoito i te ’āti Zorama. ’Ua vai ha’apa’o maita’i o Sibelona noa atu te pehira’ahia rātou i te ’ōfa’i.
’Ua fa’aha’amana’o Alama ia Sibelona ē hō’ē ana’e rāve’a ’ia fa’aorahia nā roto ia Iesu Mesia. ’Ua fa’aitoito Alama i muri iho i tāna tamaiti ’ia tāmau noa i te ha’api’i i te ’evanelia.
’Aita te tamaiti a Alama ’o Korianotona i ha’apa’o i te mau fa’auera’a. ’Aita ’oia i riro ’ei misiōnare ha’apa’o i te ha’api’ira’a i te ’āti Zorama.
Nō te ’ohipa tā Korianotona i rave, ’aita te ’āti Zorama i ti’aturi i te mau ha’api’ira’a a Alama.
’Ua parau Alama ia Korianotona ē e’ita te mau ta’ata e nehenehe e huna i tā rātou mau hara i te Atua ’e e ti’a ia Korianotona ’ia tātarahapa.
’Ua ha’api’i Alama i tāna tamaiti ē e ti’afa’ahou te mau ta’ata ato’a, ’o te mau ta’ata parau-ti’a ana’e te ora i pīha’i iho i te Atua.
Tei teie orara’a nei te taime nō te mau ta’ata ’ia tātarahapa ’e ’ia tāvini i te Atua, ’ua parau Alama.
Ma te fa’aha’amana’o ia Korianotona ē ’ua pi’ihia ’oia ’ei misiōnare, ’ua parau Alama iāna ’ia ho’i i te ’āti Zorama ra ’e ’ia ha’api’i i te nuna’a ’ia tātarahapa.
Alama ’e tāna mau tamaiti e tāmau noa ra i te ha’api’i i te ’evanelia. Tē ha’api’i ra rātou nā roto i te mana o te autahu’ara’a.