Pene 16
Te ari’i Limehi ’e tōna mau ta’ata e horo ’ē ra
’Ua haru te ’āti Lamana e rave rahi ’āti Nephi tei ’ore i horo ’ē nā muri i te ari’i Noa. ’Ua ’āfa’i te ’āti Lamana ia rātou ’e ’ua hōro’a nā rātou i te mau fenua, ’ua fa’a’aufau rā ia rātou i te mau tute teimaha.
’Ua rave te ’āti Nephi ia Limehi ’ei ari’i ’āpī nō rātou. E tamaiti Limehi nā te ari’i Noa, e ’ere rā ’oia i te ta’ata ’ino mai tōna metua tāne. E ta’ata maita’i ’oia.
’Ua tāmata te ari’i Limehi ’ia hau ’e te ’āti Lamana, ’ua tāmau noa rā rātou i te pāruru i te ’āti Nephi ’e i te hāmani ’ino ia rātou.
I te hō’ē mahana ’ua ’ite te ari’i Limehi i te tahi mau ta’ata ’e’ē i rāpae i te ’oire. ’Ua tu’u ’oia ia rātou i roto i te fare tāpe’ara’a. E ’āti Nephi teie mau ta’ata ’e’ē nō Zarahemela mai.
’O Amona te i’oa o tō rātou ti’a fa’atere. ’Ua ’oa’oa te ari’i Limehi i te ’itera’a iāna. ’Ua ’ite ’oia ē e nehenehe Amona e tauturu i tōna nuna’a ’ia mahemo i te ’āti Lamana.
’Ua pi’i te ari’i Limehi ’ia putuputu mai tōna nuna’a. ’Ua fa’aha’amana’o ’oia ia rātou ē tō rātou ’ino ’o te tumu ïa rātou i tāpe’ahia ai e te ’āti Lamana.
’Ua parau ’oia i tōna nuna’a ’ia tātarahapa, ’ia ti’aturi i te Atua, ’e ’ia ha’apa’o i te mau fa’auera’a. I muri iho ’ua tauturu te Atua ia rātou ’ia mahemo.
’Ua ha’api’i mai te ’āti Nephi ē te ’āti Lamana e pāruru ra i te ’oire e inu pinepine rātou i te ’ava i te pō.
I taua pō ra, ’ua ’āfa’i te ari’i Limehi e rave rahi uaina nā te mau tīa’i ’ei tao’a hōro’a.
’Ua ti’a i te ari’i Limehi ’e tōna nuna’a ’ia haere nā mua i te mau tīa’i tei taero ’e ’ia mahemo atu.
’Ua arata’i Amona i te ari’i Limehi ’e tōna nuna’a nā roto i te medebara e tae atu i Zarahemela, i reira ’ua fāri’i-maita’i-hia rātou.