Pene 32
Te tāpena Moroni ’e te tāpa’o nō te ti’amāra’a
’Ua hina’aro te hō’ē ta’ata ’ino o Amalikia te i’oa ’ia riro ’ei ari’i i ni’a i te ’āti Nephi. E rave rahi ’āti Nephi tei fa’aru’e te ’Ēkālesia nō te pe’e iāna.
Mai te mea e riro mai Amalikia ’ei ari’i, e tāmata ’oia i te ha’amou i te ’Ēkālesia a te Atua ’e e ’īriti i te ti’amāra’a o te ta’ata.
I tō te tāpena Moroni, te ra’atira o te nu’u ’āti Nephi, fa’aro’ora’a i te fa’anahora’a a Amalikia ’ia riro ’ei ari’i, ’ua riri ’oia.
’Ua pāhae Moroni i tōna perēue nō te hāmani i te hō’ē reva. I ni’a iho ’ua pāpa’i ’oia i te poro’i nō te fa’aha’amana’o i te nuna’a ’ia pāruru i tā rātou ha’apa’ora’a fa’aro’o, te ti’amāra’a ’e te hau.
’Ua tu’u Moroni i te reva i ni’a i te hō’ē rā’au ’e e ’ua pi’i i te reira te tāpa’o nō te ti’amā. I muri iho ’ua ’ahu i tāna ha’ana tama’i, ’ua tūturi ’oia nō te pure.
’Ua ani ’oia i te Atua ’ia pāruru i te feiā e ti’aturi ia Iesu Mesia ’e ’ua pure nō te ti’amāra’a i roto i te fenua, ma te pi’i i te reira te fenua nō te ti’amā.
’Ua haere Moroni i rotopū i te nuna’a. Ma te tāhiri i te tāpa’o nō te ti’amāra’a, ’ua pi’i ’oia ia rātou ’ia haere mai ’e ’ia tauturu i te pārurura’a i tō rātou ti’amāra’a.
’Ua haere mai te nuna’a nā te mau vāhi ato’a o te fenua. ’Ua fafau rātou e ha’apa’o i te mau fa’auera’a a te Atua ’e ’ia ’aro nō te ti’amāra’a.
I tō Amalikia ’itera’a e rave rahi ’āti Nephi tei ’āmui atu ia Moroni, ’ua ri’ari’a ’oia. ’Ua fa’aru’e ’oia ’e tōna mau ta’ata nō te ’āmui atu i te ’āti Lamana.
’Ua tāmata Moroni ’e tōna nu’u e tāpe’a ia rātou, ’ua mahemo atu rā Amalikia ’e te tahi o tōna mau ta’ata.
’Ua tu’u Moroni i te tāpa’o nō te ti’amāra’a i ni’a i te mau pare ato’a o te fenua o te ’āti Nephi. ’Ua tāpe’a te ’āti Nephi i tō rātou ti’amāra’a ’e te hau ato’a.