Pene 52
Te ha’amoura’ahia te ’āti Iareda
’Ua rahi te ’āti Iareda ma te numera ’e ’ua monihia. ’Ua mā’iti rātou i te hō’ē ari’i ’ei arata’i nō rātou.
’Ua tere e rave rahi matahiti, ’e ’ua riro mai te ’āti Iareda ’ei mau ta’ata ’ino. ’Ua tono te Fatu i te mau peropheta nō te parau ia rātou ’ia tātarahapa ’aore rā e ha’amouhia rātou.
’Aita te nuna’a i fa’aro’o i te mau peropheta. ’Ua tāmata rātou i te taparahi pohe i te mau peropheta
’Ua tupu te mau tama’i ’e te mau o’e i roto i te fenua. E rave rahi ’āti Iareda tei pohe.
’Ua tono te Fatu i te hō’ē atu peropheta, ’o Etera te i’oa. ’Ua poro ’oia mai te po’ipo’i e tae roa i te pō, i te paraura’a i te ’āti Iareda ’ia ti’aturi i te Atua ’e ’ia tātarahapa.
’Ua parau Etera i te ’āti Iareda ē, mai te mea e ti’aturi rātou i te Atua, i te hō’ē mahana e ora rātou i pīha’i iho i te Metua i te Ao ra i roto i te hō’ē ao maita’i a’e.
’Ua parau Etera i te ’āti Iareda e rave rahi mau mea faufa’a rahi, ’aita rā rātou i ti’aturi iāna. ’Ua tīahi ’ē rātou iāna i te ’oire.
’Ua tāponi Etera i roto i te hō’ē ’āpo’o mato i te ao ’ia ’ore ’oia ’ia taparahi-pohe-hia. I te pō e haere ’oia ’e e ’ite i te mau ’ohipa e tupu ra i te ’āti Iareda.
’Ua fa’aoti ’oia i te pāpa’i i te ’ā’amu o te ’āti Iareda ’a tāponi noa ai ’oia.
’Ua tono atu te Fatu ia Etera iō Korianetumera, te hō’ē ari’i ’āti Iareda ’ino. ’Ua parau Etera iāna ’ia tātarahapa ’aore rā e ora ’oia nō te ’ite i tōna nuna’a ato’a i te taparahi-pohe-hia.
’Aita Korianetumera ’e tōna nuna’a i tātarahapa. ’Ua tāmata ’oia i te taparahi pohe ia Etera, ’ua horo ra Etera ’e ’ua tāponi i roto i te ’āpo’o mato.
Nō te ’ino rahi o te nuna’a ’ua tuhi te Fatu i te fenua. ’Aita rātou e nehenehe e tu’u i tā rātou mau mauiha’a ’aore rā tā rātou ’o’e i raro, nō te mea e reva ’ē te mau tauiha’a i te mahana i muri iho.
’Ua ’aro te ’āti Iareda ato’a i roto i te mau tama’i, ’oia ato’a te mau vahine ’e te mau tamari’i. ’Ua arata’i Korianetumera i te hō’ē nu’u ’e te hō’ē ta’ata ’o Siza te i’oa ’ua arata’i te tahi.
E nā ta’ata ’ino ’o Korianetumera ’e ’o Siza. ’Ua fa’aru’e te Vārua Maita’i i te ’āti Iareda nō tō rātou ’ino. E mana rahi tō Sātane i ni’a ia rātou.
’Ua ’aro te ’āti Iareda e tae roa ’ua toe noa mai ’o Korianetumera ’e ’o Siza. I te matapōirira’ahia Siza nō te mani’i rahi o tōna toto, ’ua tāpū Korianetumera i tōna upo’o.
’Ua tupu mau te tohu a Etera : ’O Korianetumera te ’āti Iareda hōpe’a tei ’ora mai. ’Ua ’itehia ’oia e te nuna’a nō Zarahemela.
’Ua fa’aoti Etera i te pāpa’ira’a i te ’ā’amu o te ’āti Iareda. ’Ua ha’amouhia rātou nō tō rātou ’ino. ’Ua ’itehia mai te mau papa’a parau o te ’āti Iareda i muri iho e te ’āti Nephi.