Pene 23
Amona : Hō’ē tāvini pūai
’Ua fa’aru’e nā tamaiti e maha a Mosia ia Zarahemela nō te ha’api’i i te ’āti Lamana i te ’evanelia. ’Ua haere rātou tāta’itahi i te hō’ē ’oire ta’a ’ē.
’Ua haere Amona i te fenua ’Īsema’ela. I tōna tomora’a i roto i te ’oire, ’ua ru’uru’uhia ’oia e te ’āti Lamana ’e ’ua ’āfa’i iāna i tō rātou ari’i Lamoni.
’Ua parau Amona i te ari’i Lamoni ē ’ua hina’aro ’oia e ora i rotopū i te ’āti Lamana. ’Ua māuruuru Lamoni ’e ’ua fa’aue i tōna mau ta’ata e tātara te tāpe’a o Amona.
’Ua parau Amona ē ’ia riro ’oia ’ei hō’ē o te mau tāvini o te ari’i. ’Ua tono te ari’i iāna ’ia ha’apa’o i tāna nana.
I te hō’ē mahana tē arata’i ra Amona ’e te tahi mau tāvini i te nana i te hō’ē vāhi pape, tē haere mai nei te mau ’eiā ’āti Lamana e ha’apurara i te mau animara ’e ’ua tāmata i te ’eiā te reira.
’Ua ri’ari’a te mau tāvini ia Amona ra. ’Ua taparahi pohe te ari’i Lamoni i te tahi o tāna mau tāvini i te mo’era’a te mau animara nā roto i teie mau ’eiā.
’Ua ’ite Amona teie tāna rāve’a nō te fa’a’ohipa i te mana o te Fatu nō te ’ume mai te ’ā’au o te ’āti Lamana. I muri iho e fa’aro’o rātou i tāna ha’api’ira’a.
’Ua parau Amona i te mau tāvini ē mai te mea e ha’aputuputu rātou i te mau animara tei ha’apurarahia, e’ita te ari’i e taparahi pohe ia rātou.
’Ua ’ite ’oi’oi mai Amona ’e te tahi mau tāvini i te mau animara ’e ’ua arata’i atu ia rātou i te vāhi pape.
’Ua ho’i fa’ahou mai te mau ’eiā ’āti Lamana. ’Ua parau Amona i te tahi atu mau tāvini ’ia tīa’i i te nana, ’a ’aro ai ’oia i te mau ’eiā.
’Aita te mau ’eiā ’āti Lamana i mata’u ia Amona. ’Ua mana’o rātou ē e mea ’ōhie nō te taparahi pohe iāna.
Tei ia Amona ra te mana o te Atua. ’Ua tūpa’i ’e ’ua taparahi pohe ’oia i te mau ’eiā i te ’ōfa’i, nā te reira i fa’ariri atu i te toe’a o te mau ’eia.
’Ua tāmata rātou i te taparahi pohe ia Amona i tā rātou rā’au teiaha, i te mau taime ato’a e ’āfa’i te ’eiā i tāna rā’au nō te tā’iri ia Amona, e tāpū ’oia i te rima o te ’eiā. ’Ua horo te mau ’eiā nō tō rātou ri’ari’a.
’Ua ’āfa’i te mau tāvini i te mau rima tei tāpūhia i te ari’i Lamoni ’e ’ua fa’a’ite iāna i te ’ohipa tā Amona i rave.
’Ua māere te ari’i i te mana rahi o Amona. ’Ua hina’aro ’oia e hi’o ia Amona, ’ua taiā rā ’oia nō te mea tē mana’o nei ē ’o te Vārua Rahi o Amona.
I tō Amona haerera’a e hi’o iāna, ’aita te ari’i i ’ite e aha te mea e parau. ’Aita ’oia i paraparau hō’ē hora te maoro.
’Ua tauturu te Vārua Maita’i ia Amona ’ia ’ite e aha te mea tā te ari’i e feruri ra. ’Ua fa’ata’a atu Amona ē e ’ere ’oia te Vārua Rahi. E ta’ata noa ’oia.
’Ua pupu te ari’i nā Amona i te mau mea ato’a tāna i hina’aro mai te mea e fa’a’ite mai ’oia e aha te mana tāna i fa’a’ohipa nō te upo’oti’a i ni’a i te mau ’eiā ’e ’ia ’ite i te mau mana’o o te ari’i.
’Ua parau Amona te mea noa tāna i hina’aro ’ia ti’aturi te ari’i Lamoni i te mea tāna e parau. ’Ua parau te ari’i e ti’aturi ’oia i te mau mea ato’a tā Amona e parau iāna.
’Ua ui Amona i te ari’i Lamoni tē ti’aturi ra ānei ’oia i te Atua. ’Ua parau te ari’i tē ti’aturi nei ’oia i te hō’ē Vārua Rahi.
’Ua parau Amona ē te Vārua Rahi o te Atua ïa, tei poiete i te mau mea ato’a i ni’a i te ra’i ’e i ni’a i te fenua, ’e ’ua ’ite ’oia i te mau mana’o o te mau ta’ata.
’Ua parau Amona te mau ta’ata ’ua hāmanihia i te hōho’a o te Atua. ’Ua parau ato’a ’oia ’ua pi’i te Atua iāna ’ia ha’api’i i te ’evanelia ia Lamoni ’e tōna nuna’a.
Ma te fa’a’ohipa i te mau pāpa’ira’a mo’a, ’ua ha’api’i Amona i te ari’i Lamoni nō ni’a i te poietera’a, ia Adamu, ’e ia Iesu Mesia.
’Ua ti’aturi te ari’i Lamoni ia Amona ’e ’ua pure ’ia fa’a’orehia tāna mau hara. I muri iho, ’ua topa ’oia i raro i te repo ’e e au ra ’ua pohe.
’Ua amo te mau tāvini i te ari’i i tāna vahine ra ’e ’ua tu’u i ni’a i te hō’ē ro’i. E piti mahana i muri iho, ’ua mana’o te mau tāvini ē ’ua pohe ’oia ’e ’ua fa’aoti e huna iāna.
’Aita te ari’i vahine i ti’aturi ē ’ua pohe tāna tāne fa’aipoipo. ’Ua fa’aro’o rā ’oia nō te mana rahi o Amona, ’ua ani ’oia ia Amona ’ia tauturu i te ari’i.
’Ua ’ite Amona tei raro a’e Lamoni i te mana o te Atua. ’Ua parau ’oia i te ari’i vahine ē e ara mai Lamoni i te mahana nō muri iho.
’Ua fa’aea noa te ari’i vahine i pīha’i iho ia Lamoni i te pō tā’āto’a. Te mahana i muri iho, ’ua ti’a mai Lamoni ’e ’ua parau ’ua ’ite ’oia ia Iesu Mesia. ’Ua ’ī te ari’i ’e te ari’i vahine i te Vārua Maita’i.
’Ua ha’api’i Lamoni i tōna nuna’a nō ni’a i te Atua ’e ia Iesu Mesia. ’Ua tātarahapa te feiā tei ti’aturi i tā rātou mau hara ’e ’ua bāpetizohia.