Pene 43
’Ua fā mai Iesu Mesia i te ’āti Nephi
’Ua ha’aputuputu mai e rave rahi ’āti Nephi i te hiero nō Bounetifula. ’Ua māere rātou i te mau tauira’a rahi i roto i te fenua.
Tē paraparau ra te nuna’a nō ni’a ia Iesu Mesia ’e te tāpa’o nō tōna pohera’a.
’A paraparau noa ai rātou, ’ua fa’aro’o rātou i te hō’ē reo marū nō te ra’i mai. ’Ua ahu roa te reira i roto i tō rātou ’ā’au.
I te ha’amātara’a, ’aita rātou i ta’a maita’i i te reo, i te toru rā o te taime, ’ua ta’a maita’i rātou.
E reo nō te Metua i te Ao ra. ’Ua fa’a’ite mai ’oia ia Iesu Mesia ’e ’ua parau i te mau ta’ata ’ia fa’aro’o iāna.
’Ua pou mai Iesu Mesia nā ni’a mai i te ra’i ’e ’ua fa’aea i rotopū i te nuna’a. ’Ua mata’u rātou ’ia parau nō te mea ’aita rātou i māramarama i te ’ohipa e tupu ra. ’Ua manaʼo rātou ia Iesu mai te hō’ē melahi.
’Ua parau ’oia ia rātou ’o ’oia Iesu Mesia, ’o tā te mau peropheta i parau e haere mai.
’Ua parau Iesu i te nuna’a ’ia haere mai ’e ’ia fāfā mai te mau tāpa’o i roto i tōna ’ao’ao ’e mau rima ’e te mau ’āvae, i te vāhi i reira ’oia i te pātitira’ahia i ni’a te sātauro.
’Ua hina’aro Iesu ’ia ’ite te nuna’a ē ’o ’oia tō rātou Atua ’e ’ua pohe ’oia nō tā rātou mau hara.
Hō’ē ’e hō’ē, ’ua fāfā te mau ta’ata i te mau tāpa’o i te ’ao’ao, te mau rima ’e te mau ’āvae o Iesu. ’Ua ’ite te nuna’a ’o te Fa’aora ’oia.
I muri iho, ’ua ’ārue te nuna’a ia Iesu ’e ’ua topa i tōna ’āvae ’e ’ua ha’amori iāna.
’Ua pi’i Iesu ia Nephi ’e 11 ’ē atu mau tāne. ’Ua hōro’a ’oia ia rātou i te mana nō te autahu’ara’a ’e ’ua ha’api’i ia rātou i te rāve’a tano nō te bāpetizo.
’Ua parau ’oia i te ’āti Nephi ’ia ti’aturi iāna, ’ia tātarahapa ’e ’ia ha’apa’o i te mau fa’auera’a. Mai te mea ’aita rātou e nā reira, e’ita rātou e tomo i roto i tōna bāsileia.
’Ua ha’api’i ’oia i te ’āti Nephi nāhea ’ia pure i te Metua i te Ao ra. ’Ua ha’api’i ato’a ’oia rātou nō ni’a i te ha’apaera’a mā’a ’e ’ua parau e fa’a’orehia tā rātou hara mai te mea e fa’a’ore rātou i te hara te tahi ’e te tahi.
I muri a’e i te ha’api’ira’a i te nuna’a e rave rahi ’ohipa, ’ua parau Iesu ia rātou e ho’i i te fare ’e ’ia feruri ’e ’ia pure nō ni’a i te mau mea tāna i parau.
’Ua ha’amata te ’āti Nephi i te ta’i. ’Aita rātou i hina’aro ia Iesu ’ia vaiiho mai ia rātou.
’Ua here Iesu i te ’āti Nephi. ’Ua parau ’oia ia rātou ’ia hōpoi mai iāna ra te mau ta’ata ma’i ’aore rā tei pēpē, ’ia fa’aora ’oia ia rātou.
’Ua fa’aora Iesu i teie feiā. ’Ua ha’api’o te mau ta’ata ato’a i raro ’e ’ua ha’amori iāna.