Pene 15
Alama e ha’api’i ra ’e e bāpetizo ra
’Ua horo Alama nā mua atu i te mau tāvini o te ari’i Noa ’e ’ua tāpuni e rave rahi mahana. ’A tāpuni ai ’oia, ’ua pāpa’i ’oia i te mea tā te peropheta Abinadi i ha’api’i.
’Ua tātarahapa Alama i tāna mau hara ’e ’ua haere huna atu i te ’āti Nephi ra, i te ha’api’ira’a ia rātou i te poro’i a Abinadi. ’Ua parau Alama i te nuna’a ’ia roa’a te fa’aro’o ia Iesu Mesia ’e ’ia tātarahapa.
I te roara’a o te ao, e tāpuni o Alama i roto i te hō’ē ’uru rā’au ri’i i pīha’i iho i te hō’ē piha’a vai o Moromona tei i’oa.
’Ua haere mai te feiā tei ti’aturi i te mau ha’api’ira’a a Alama i te pape o Moromona ’e ’ua bāpetizohia. ’Ua bāpetizo Alama 204 ta’ata i roto i te ’Ēkālesia a te Mesia.
’Ua fa’atōro’a Alama i te mau tahu’a nō te ha’api’i i te nuna’a. ’Ua parau ’oia i te mau tahu’a ’ia ha’api’i i te tātarahapa ’e te fa’aro’o ia Iesu Mesia. ’Ua parau ato’a ’oia ’eiaha rātou e mārō ’ia vai tāhō’ē rā.
E nuna’a here ’e te tāvini te tahi i te tahi tō Alama. ’Ua hōro’a rātou i te mau mea ato’a tā rātou e vai ra ’e ’ua māuruuru i te ha’api’ira’a mai nō ni’a ia Iesu Mesia, tō rātou Fa’aora.
’Ua ’ite te mau tāvini o te ari’i Noa ia Alama i te ha’api’ira’a i te mau ta’ata. ’Ua parau te ari’i ē tē fa’ati’arepu ra Alama i te ’āti Nephi ’ia fa’aru’e iāna, nō reira ’ua tono atu ’oia i te hō’ē nu’u nō te taparahi pohe ia rātou.
’Ua fa’aara te Atua ia Alama ē tē haere mai ra te nu’u a te ari’i Noa. ’Ua ha’aputuputu te nuna’a i tō rātou ’utuāfare, te mau animara, ’e te tahi atu mau tauiha’a ’e ’ua reva atu i roto i te medebara.
’Ua ha’apūai te Atua i te nuna’a o Alama ’ia nehenehe ia rātou ’ia mahemo i te nu’u a te ari’i Noa. ’Ua ’imi te nu’u ’aita roa atu ra rātou i ’itehia.
I muri a’e i te rāterera’a nā roto i te medebara e va’u mahana, ’ua tae te nuna’a o Alama i te hō’ē vāhi nehenehe ’e tē vai ra te pape maita’i i reira. I reira ’ua fa’a’apu rātou ’e ’ua hāmani i te mau fare patu.
’Ua hina’aro te nuna’a ’ia riro Alama ’ei ari’i nō rātou, ’ua parau rā Alama ē ’aita te Atua i hina’aro e ari’i tō rātou. ’Ua hina’aro te Atua ’ia vai ti’amā rātou.