Pene 38
Te TAPARAHI-POHE-RA’A-HIA te ha’avā rahi
’Ua riro mai te feiā ’ī’ino ’ei mau ha’avā i ni’a i te ’āti Nephi. ’Ua fa’autu’a rātou i te feiā parau-ti’a ’eiaha rā te feiā ’ī’ino.
’Ua pe’ape’a roa Nephi i te ’itera’a i te ’ino rahi i rotopū i te nuna’a.
I te hō’ē mahana, tē pure ra ’oia i ni’a i te pare i roto i tāna ’ō. Tei pīha’i iho tāna ’ō i te purumu e haere atu i te mātete i Zarahemela.
’Ua fa’aro’o te feiā e haere ra nā ni’a te purumu ia Nephi e pure ra. ’Ua putuputu mai te naho’a ta’ata, ma te uiui nō te aha ’oia i ’oto rahi ai.
I tō Nephi ’itera’a i te nuna’a, ’ua parau ’oia ia rātou te ’oto ra ’oia nō tō rātou ’ino. ’Ua parau ’oia ia rātou ’ia tātarahapa.
’Ua fa’aara ’oia ia rātou ē, mai te mea ’aita rātou e tātarahapa, e rave tō rātou mau ’enemi i tō rātou mau fare ’e tō rātou mau ’oire ’e e’ita te Fatu e tauturu ia rātou ’ia ’aro i tō rātou mau ’enemi.
’Ua parau Nephi e mea ’ino a’e te ’āti Nephi i te ’āti Lamana nō te mea ’ua ha’api’ihia te ’āti Nephi i te mau fa’auera’a ’aita rā e ha’apa’o nei i te reira.
’Ua parau ’oia ē mai te mea ’aita te ’āti Nephi e tātarahapa, e ha’amouhia rātou.
Tei reira te tahi mau ha’avā ’ino. ’Ua hina’aro rātou i te nuna’a ’ia fa’autu’a ia Nephi nō te fa’ahapara’a ia rātou ’e tā rātou ture.
’Ua tū vetahi o te nuna’a ’e te mau ha’avā ’ī’ino. ’Ua ti’aturi vetahi ia Nephi ; ’ua ’ite rātou e peropheta ’oia ’e ’ua parau i te parau mau.
’Ua parau Nephi i te nuna’a, ’ua fa’aru’e rātou i te Atua ’e ’aita e maoro roa, e fa’autu’ahia rātou mai te mea ’aita rātou e tātarahapa.
’Ua parau Nephi i te nuna’a e haere i tō rātou ha’avā rahi ra. Tē tārava ra ’oia i roto i tōna iho toto, ’ua taparahi-pohe-hia ’oia e te hō’ē taea’e o tei hina’aro i tōna ti’ara’a.
’Ua horo atu e pae ta’ata i roto te naho’a e hi’o i te ha’avā rahi. ’Aita rātou i ti’aturi ē e peropheta Nephi nā te Atua.
I tō rātou ’itera’a ia Zeezorama, te ha’avā rahi, e tārava ra i roto i tōna toto, ’ua ma’iri rātou i raro i te ri’ari’a. I teienei ’ua ’ite rātou e peropheta Nephi.
’Ua ’ite a’ena te mau tāvini o Zeezorama i te ha’avā rahi ’e ’ua horo e fa’aara i te nuna’a. ’Ua ho’i mai rātou ’e ’ua ’ite atu i nā ta’ata e pae e tārava ra i reira.
’Ua mana’o te nuna’a na nā ta’ata e pae i taparahi pohe ia Zeezorama.
’Ua tu’u rātou i nā ta’ata e pae i roto i te fare tāpe’ara’a ’e i muri iho ’ua fa’aara nā roto i te ’oire ē ’ua taparahi-pohe-hia te ha’avā rahi ’e ’ua tu’uhia te feiā tei taparahi pohe i roto i te fare tāpe’ara’a.
Te mahana i muri iho ’ua haere atu te mau ta’ata i te vāhi i reira te ha’avā rahi e hunahia ai. ’Ua ani te mau ha’avā tei reira rātou i te ’ō a Nephi tei hea nā ta’ata to’opae.
’Ua ani te mau ha’avā e hi’o i te feiā tei fa’ahapahia.
Te feiā tei fa’ahapahia ’o nā ta’ata to’opae ïa tei horo atu mai te ’ō a Nephi i te pārahira’a o te ha’avā rahi.
’Ua parau nā ta’ata to’opae ’ua ’ite rātou i te ha’avā rahi i te tāravara’a i roto i te toto, mai tā Nephi i parau. I muri iho, ’ua fa’ahapa te mau ha’avā ia Nephi i te tonora’a i te hō’ē ta’ata nō te taparahi pohe ia Zeezorama.
Ma te ’itera’a e peropheta Nephi, ’ua tāparu nā ta’ata to’opae i te mau ha’avā, ’aita rā rātou i fa’aro’ohia. ’Ua ru’uru’u rātou ia Nephi.
’Ua pūpū te mau ha’avā ia Nephi te moni ’e tōna ora mai te mea e parau ’oia ē ’ua ’ōpua ’oia e taparahi pohe i te ha’avā rahi.
’Ua parau Nephi i te mau ha’avā ’ia tātarahapa nō tō rātou ’ino. I muri iho, ’ua parau ’oia ia rātou e haere i ō Seanatuma, te taea’e o Zeezorama.
’Ua parau Nephi ia rātou ’ia ani ia Seanatuma ’ua ’ōpua ānei ’oia ’e o Nephi e taparahi pohe ia Zeezorama. ’Ua parau o Nephi e parau mai Seanatuma ē « ’aita ».
I muri iho, e ui te mau ha’avā ia Seanatuma nāna ānei i taparahi pohe i tōna taea’e. E parau fa’ahou Seanatuma ē « ’aita », e ’ite atu te mau ha’avā i te toto i ni’a i tōna ’ahu.
’Ua parau Nephi ē e rūrūta’ina o Seanatuma ’e e māhe’ahe’a ’e nō te fā’i mai i te hōpe’a ē nāna i taparahi pohe i tōna taea’e.
’Ua haere te mau ha’avā i te fare o Seanatuma, ’e ’ua tupu te mau mea atoa tā Nephi i parau. ’Ua tu’uhia Nephi ’e nā ta’ata to’opae.
’A fa’aru’e ai te nuna’a ia Nephi, ’ua parau vetahi e peropheta ’oia ; te tahi ’ua parau e atua ’oia. ’Ua ho’i Nephi i te fare, mā te ’oto noa nō tō rātou ’ino.