Pene 24
Amona e fārerei ra i te metua tāne o te ari’i Lamoni
’Ua hina’aro te ari’i Lamoni e rave ia Amona e fārerei i tōna metua tāne. ’Ua fa’aara te Fatu ia Amona ’eiaha e haere nō te mea e tāmata te metua tāne o Lamoni e taparahi pohe iāna.
’Ua parau te Fatu ia Amona ’ia haere ra i te fenua Midoni, i reira tei roto tōna taea’e ’o Aarona i te fare tāpe’ara’a. ’Ua haere te ari’i Lamoni nā muri ia Amona.
’A rātere ai rātou ’ua fārerei atu rātou i te metua tāne o Lamoni, e ari’i ’oia i ni’a i te mau fenua ato’a. ’Ua ani ’oia ia Lamoni, tē haere nei ’oia i hea e teie nei ’āti Nephi ha’avare.
’Ua parau te ari’i Lamoni i tōna metua tāne nō Amona ’e tōna taea’e i roto i te fare tāpe’ara’a. Ma te riri, ’ua fa’aue te metua tāne o Lamoni ia Lamoni ’ia taparahi pohe ia Amona ’e ’eiaha e haere i Midoni.
’Ua pāto’i Lamoni i te taparahi pohe ia Amona ’e ’ua parau e haere ’oia ’e o Amona e fa’aora ia Aarona. ’Ua riri te metua tāne o Lamoni ’e ’ua huti mai tāna ’o’e nō te taparahi pohe ia Lamoni.
’Ua haere atu Amona i mua nō te pāruru ia Lamoni. I muri iho, ’ua tāmata te metua tāne o Lamoni i te taparahi ’pohe ia Amona, ’ua pāruru rā Amona iāna iho ’e ’ua ha’apēpē i te rima o te metua tāne o Lamoni.
I te ’itera’a te metua tāne o Lamoni ē e nehenehe Amona e taparahi pohe iāna, ’ua parau atu ’oia e hōro’a ’ōna i te ’āfara’a o tōna bāsileia nō Amona mai te mea e fa’aherehere Amona i tōna ora.
’Ua parau Amona, hina’aro ’ōna ’ia tātarahia mai Aarona ’e tōna mau hoa i te fare tāpe’ara’a ’e ’ia tāpe’a noa Lamoni i tōna bāsileia.
’Ua ’ite te metua tāne o Lamoni, ’aita o Amona i hina’aro e ha’apēpē iāna. ’Ua māere ’oia i te here rahi o Amona nō tāna tamaiti. ’Ua ani manihini ’oia ia Amona ’ia ha’api’i iāna i te ’evanelia.
’Ua haere Amona ’e te ari’i Lamoni i te ari’i ra nō Midoni. ’Ua paraparau Lamoni ’e te ari’i i reira, ’e ’ua tu’uhia mai Aarona ’e tōna mau hoa mai roto mai i te fare tāpe’ara’a.
’Ua ’oto Amona i te ’ite nāhea rātou i te hāmani-’ino-ra’a-hia. ’Ua māuiui rahi rātou tera rā ’ua fa’aoroma’i.