Pene 7
Hāmanira’a i te pahī
I muri a’e i tō te ’utuāfare o Lehi pūhapara’a i te pae tahatai e rave rahi mahana, ’ua parau te Fatu ia Nephi. ’Ua parau ’oia iāna e hāmani i te hō’ē pahī nō te ’āfa’i i tōna ’utuāfare i te fenua i parauhia.
’Aita o Nephi i ’ite nāhea ’ia hāmani i te hō’ē pahī, ’ua parau rā te Fatu e fa’a’ite ’oia i te reira iāna. ’Ua parau ’oia ia Nephi i hea e roa’a ai te metalo nō te hāmani i te mau mauha’a tāna e hina’aro.
’Ua fa’a’o’ō’o Lamana ’e ’o Lemuela ia Nephi nō te hina’arora’a e hāmani i te hō’ē pahī. ’Aita rāua i ti’aturi ē, ’ua fa’a’ite te Fatu ia Nephi nāhea ’ia hāmani i te reira. ’Ua pāto’i rāua nō te tauturu.
’Ua parau Nephi ia Lamana ’e ia Lemuela ’ia tātarahapa ’e eiaha e ’ōrurehau. ’Ua fa’aha’amana’o ’oia ia rāua ē ’ua ’ite rāua i te hō’ē melahi. ’Ua parau ato’a ’oia ia rāua ē e mana tō te Atua nō te rave i te mau mea ato’a.
’Ua riri Lamana ’e o Lemuela ia Nephi ’e ’ua hina’aro e tāora iāna i roto i te moana.
’A haere mai ai rāua i ni’a ia Nephi, ’ua fa’aue ’oia ia rāua ’eiaha e tāpe’a mai iāna nō te mea ’ua ’ī ’oia i te mana o te Atua. ’Ua mata’u Lamana ’e o Lemuela e rave rahi mahana.
I muri iho ’ua parau te Fatu ia Nephi ’ia tāpe’a atu ia Lamana ’e ia Lemuela. I tō Nephi nā-reira-ra’a, ’ua fa’a’ete’ete te Fatu ia rāua. ’Ua ’ite Lamana ’e o Lemuela tei ia Nephi ra te mana o te Atua.
’Ua parau Nephi ia Lamana ’e ia Lemuela ’ia ha’apa’o i te parau a tō rāua nā metua ’e e ha’apa’o i te parau a te Atua. ’Ua parau Nephi mai te mea e nā reira rāua, e ha’amaita’ihia rāua.
’Ua tātarahapa Lamana ’e o Lemuela ’e ’ua tauturu ia Nephi ’ia hāmani i te pahī.
’Ua haere Nephi i ni’a i te mou’a e rave rahi taime nō te pure ’ia roa’a te tauturu. ’Ua ha’api’i te Fatu iāna nāhea ’ia hāmani i te pahī.
I te otira’a te pahī i te hāmanihia e Nephi ’e e tōna mau taea’e, ’ua ’ite rātou e pahī maita’i te reira. ’Ua ha’amāuruuru rātou i te Atua nō te tauturura’a ia rātou.