Pene 26
Te nuna’a o Amona
’Ua ha’api’i te mau tamaiti a Mosia i te ’evanelia i te ’āti Lamana. E rave rahi tauatini ’āti Lamana tei tātarahapa ’e tei tomo mai i roto i te ’Ēkālesia.
’Ua pi’i te mau ’āti Lamana tei tomo mai i roto i te ’Ēkālesia ia rātou iho te mau Aniti-Nephi-Lehi, ’aore rā te nuna’a o Amona. E mau ta’ata maita’i rātou ’e te rave ’ohipa itoito.
’Ua riri te mau ’āti Lamana tei ’ore i tātarahapa i te nuna’a o Amona ’e ’ua fa’aineine nō te ’aro atu ia rātou.
’Ua ’ite te nuna’a o Amona tē haere mai ra te ’āti Lamana ’ino e taparahi pohe ia rātou ’ua fa’aoti rā rātou ’eiaha e ’aro atu. ’Ua tātarahapa rātou nō te taparahi-pohe-ra’a.
’Ua huna rātou i tā rātou mau mauiha’a tāma’i i roto roa i te repo ’e ’ua fafau i te Atua e ’ore roa rātou e taparahi pohe fa’ahou i te ta’ata.
I te haerera’a mai te ’āti Lamana ’ino ’e ’ua ha’amata e taparahi pohe ia rātou, ’ua tāhopu atu rātou ’e ’ua pure.
I te hi’ora’a ē ’aita te nuna’a o Amona e ’aro ra, e rave rahi ’āti Lamana ’ino tei fa’aea i te taparahi pohe ia rātou.
’Ua pe’ape’a roa te ’āti Lamana i te taparahi-pohe-ra’a ia rātou. ’Ua fa’aru’e rātou i tā rātou mau mauiha’a tāma’i ’e ’ua ’āmui atu i te nuna’a o Amona. ’Aita rātou i tāma’i fa’ahou.
E rave rahi ’āti Lamana tei haere mai nō te taparahi pohe i te nuna’a o Amona. ’Aita roa rātou i hina’aro e ’aro atu ’e e rave rahi tei pohe.
’Aita ’oia i hina’aro ’ia ha’amouhia te mau ta’ata tāna i here, ’ua pure Amona nō te tauturu. ’Ua parau te Fatu iāna ’ia rave i tōna nuna’a ’e ’ia fa’aru’e i te fenua.
’Ua hōro’a te ’āti Nephi nō Zarahemela ia Amona ’e tōna nuna’a i te fenua nō Ieresona ’e ’ia pāruru ia rātou. ’Ua riro rātou ’ei mau hoa.