Pene 5
Te rāterera’a nā roto i te medebara
’Ua hina’aro te Fatu i te mau tamaiti a Lehi ’ia roa’a te mau vahine fa’aipoipo nō te ha’api’i atu i tā rātou mau tamari’i i te ’evanelia. ’Ua parau ’oia ia Lehi ’ia fa’aho’i i tāna mau tamaiti i Ierusalema nō te ti’i mai i te ’utuāfare o ’Īsemaela.
’Ua ho’i fa’ahou Nephi ’e tōna mau taea’e i Ierusalema. ’Ua parau rātou ia ’Īsemaela e aha tā te Fatu e hina’aro ’ia rave ’oia. ’Ua ti’aturi ’Īsemaela ia rātou, ’e ’ua haere atu ’oia ’e tōna ’utuāfare nā muri i te mau tamaiti a Lehi.
’A rātere ai rātou nā roto i te medebara, ’ua riri Lamana, Lemuela ’e te tahi mau melo o te ’utuāfare o ’Īsemaela. ’Ua hina’aro rātou e ho’i i Ierusalema.
’Ua fa’aha’amana’o Nephi ia Lamana ’e ia Lemuela i te mau mea ato’a tā te Fatu i rave nō rātou. ’Ua parau ’oia ia rātou ’ia rahi atu ā tō rātou fa’aro’o. ’Ua riri rātou ia Nephi ’aita rā i ho’i i Ierusalema.
I muri mai, ’ua fa’aipoipo Nephi, tōna mau taea’e ’e o Zorama i te mau tamāhine a ’Īsemaela.
’Ua parau te Fatu ia Lehi ’ia tāmau i tōna tere. I te po’ipo’i a’e, ’ua ’ite Lehi i te hō’ē poro veo, tei pi’ihia te Liahona i mua i tōna ti’ahapa. E fa’a’ite te reira i te ’ē’a nō te haere nā roto i te medebara.
’Ua ha’aputu te ’utuāfare o Lehi i te mā’a ’e te mau huero ’e ’ua rave i tō rātou mau ti’ahapa. ’Ua rātere rātou nā roto i te medebara e rave rahi mahana ma te pe’e i te mau arata’ira’a o te Liahona.
E fa’a’ohipa Nephi ’e tōna mau taea’e i te mau fana ’e te mau te’a ’ia roa’a te mā’a ’a rātere ai rātou.
’Ua fati te fana ’āuri a Nephi, ’e ’ua paruparu tā tōna mau taea’e mau fana. ’Aita tā te mau taea’e e nehenehe e taparahi pohe i te mau animara, nō reira ’ua po’ia te mau ta’ata ato’a. ’Ua riri Lamana ’e o Lemuela.
’Ua hāmani Nephi i hō’ē fana rā’au ’e ’ua ani i tōna metua tāne i hea e haere nō te a’uau. ’Ua fāri’i o Lehi i te mau arata’ira’a i roto i te Liahona. ’Ua pe’e Nephi i te mau arata’ira’a ’e ’ua roa’a te tahi mau animara.
E ’ohipa noa te Liahona ’ia vai ana’e te fa’aro’o, te itoito ’e te ha’apa’o o te ’utuāfare o Lehi.
’Ua ho’i Nephi ’e te mau animara tāna i roa’a mai. ’Ua ’oa’oa te mau ta’ata ato’a i te roa’ara’a te mā’a. ’Ua tātarahapa rātou nō tō rātou ririra’a ’e ’ua ha’amāuruuru i te Atua nō te ha’amaita’ira’a ia rātou.
E ’ere te tere i te mea ’ōhie. Pinepine te ’utuāfare o Lehi i te rohirohi, i te po’ia ’e i te po’ihā. ’Ua pohe o ’Īsemaela ’e ’ua ’oto tāna mau tamāhine. ’Ua amuamu rātou ia Lehi.
’Ua amuamu ato’a Lamana ’e o Lemuela. ’Aita rāua i ti’aturi ē ’ua paraparau te Fatu ia Nephi. ’Ua hina’aro rāua e taparahi pohe ia Lehi ’e ia Nephi ’e e ho’i i Ierusalema.
’Ua parau te reo o te Fatu ia Lamana ’e ia Lemuela. ’Ua parau ia rāua ’eiaha e riri ia Lehi ’e ia Nephi. ’Ua tātarahapa o Lamana ’e o Lemuela.
’Ua tāmau te ’utuāfare o Lehi i tō rātou tere fifi. ’Ua tauturu te Atua ia rātou ’e ’ua ha’apūai ia rātou. ’Ua fānauhia mai te mau tamari’i. E piti fa’ahou tamāroa tā Lehi ’e Saria, o Iakoba ’e o Iosepha te i’oa.
I muri a’e e va’u matahiti i te rāterera’a nā roto i te medebara, ’ua tae te ’utuāfare o Lehi i te pae tahatai. I reira ’ua ’ite mai rātou te mau hotu ’e te meri. ’Ua pi’i rātou i te vāhi Bounetifula.