Pene 8
Te rāterera’a nā te moana
’Ua parau te Fatu ia Lehi ’ia ’āfa’i i tōna ’utuāfare i ni’a i te pahī tā rātou i hāmani. ’Ua huri atu rātou i roto te mau hotu, te ’i’o pua’a, te meli ’e i te mau huero nō te tanu i te fenua i parauhia.
’Ua puhi te mau mata’i pūai i te pahī i te fenua i parauhia.
Ha’amata a’era Lamana, Lemuela, ’e te tahi mau ta’ata i te ’ohipa ’ī’ino. ’A parau ai Nephi ia rātou ’ia fa’aea, ’ua riri rātou ’e ’ua ru’uru’u iāna i te taura.
Nō tō rātou ’ino, ’ua fa’aea te Liahona i te ’ohipara’a. ’Aita rātou i ’ite nāhea e arata’i i te pahī. ’Ua fa’aho’i te vero rahi i te pahī i muri e toru mahana.
’Ua parau o Lehi ia Lamana ’e ia Lemuela ’ia tātara ia Nephi, ’aita rā rāua i fa’aro’o. Nō te riri rahi o Lehi ’e o Saria, ’ua ma’i-roa-hia rāua.
’Ua ’oto te vahine ’e te mau tamari’i a Nephi. ’Ua tāparu rātou ia Lamana ’e ia Lemuela ’ia tātara ia Nephi, ’ua pāto’i rā rāua.
I te maha o te mahana ’ua rahi roa atu te vero. ’Ua fātata roa te pahī i te tomo.
’Ua ’ite Lamana ’e o Lemuela ē ’ua tono mai te Atua i te vero. ’Ua mata’u rātou ’ia paremo rātou.
I te pae hopea, ’ua tātarahapa o Lamana ’e o Lemuela ’e ’ua tātara ia Nephi. Noa atu ’ua ’ō’oru ’e te māuiui o tōna ’apu’apu rima ’e te fatira’a ’āvae i te taura, ’aita o Nephi i amuamu.
’A rave mai ai Nephi i te Liahona, ’ua ’ohipa fa’ahou te reira. ’Ua pure Nephi, ’e ’ua fa’aea te mata’i. ’Ua mania te miti.
’Ua fa’atere Nephi i te pahī, ’e tei fano atu i te fenua i parauhia ra.