Pene 47
Iesu Mesia e ha’amaita’i ra i tāna mau pipi
I te hō’ē mahana ’a putuputu ai te mau pipi nō te ha’apaera’a mā’a ’e te pure, ’ua haere mai Iesu Mesia ia rātou ra.
’Ua ani te mau pipi iāna e aha te i’oa tā rātou e pi’i i te ’Ēkālesia. ’Ua parau Iesu ē e ti’a ’ia pi’ihia i tōna i’oa nō te mea nāna teie ’Ēkālesia.
’Ua fa’ata’a atu Iesu i tāna mau pipi ē, ’ua tono mai te Metua i te Ao ra iāna i te fenua nei nō te hōro’a i tōna ora nō te mau ta’ata ato’a.
’Ua parau ’oia i te feiā ato’a ’o tei tātarahapa, tei bāpetizohia i tōna ra i’oa, ’e tei ha’apa’o i tāna mau fa’auera’a, e ’ore rātou e fa’ahapahia i mua i te Metua i te Ao ra.
’Ua parau te Fa’aora i tāna mau pipi ’ia rave i te mau mea tā rātou i ’ite iāna i te ravera’a. ’Ua hōro’a ’oia ia rātou te hi’ora’a.
’Ua parau ato’a ’oia ia rātou ’ia pāpa’i i te mea tā rātou i ’ite ’e i fa’aro’o, ’ia nehenehe ia vetahi ’ē ’ia ’ite i te reira.
’Ua ani Iesu i tāna mau pipi e aha tā rātou e hina’aro nā roto mai iāna. E iva o rātou tei hina’aro e fa’aea iāna ra i muri a’e tō rātou orara’a i te fenua nei.
’Ua fafau mai Iesu ia rātou i te 72ra’a o tō rātou matahiti, e haere rātou iāna ra i te ra’i.
’Aita nā pipi to’otoru i tītau e ani atu i te mea tā rātou i hina’aro, ’ua ’ite rā Iesu. ’Ua hina’aro rātou e fa’aea mai i te fenua nei ’e ’ia ha’api’i i te ’evanelia e tae roa te ho’ira’a mai o Iesu.
’Ua fafau te Fa’aora ia rātou e ’ore roa rātou e māuiui ’aore rā e ’oto ’e e pohe. E ha’api’i rātou i te mau ta’ata i te ’evanelia e tae roa e ho’i mai ’oia.
’Ua fa’atiaia atu ra Iesu i te pipi tāta’itahi, maori ra nā to’otoru ’o te fa’aea mai i te fenua nei. I muri iho reva atu ra ’oia.
’Ua rave-’ē-hia nā pipi to’otoru i te ra’i, i reira ’ua ’ite rātou ’e ’ua fa’aro’o e rave rahi mau mea fa’ahiahia. ’Ua ti’a ia rātou ’ia māramarama maita’i i te mau mea a te Atua.
’Ua tauihia tō rātou tino ’ia ’ore te reira ’ia pohe.
’Ua ho’i mai nā pipi to’otoru i te fenua nei ’e ’ua ha’amata i te poro ’e i te bāpetizo.
’Ua tu’u te ’āti Nephi ’ino i nā to’otoru pipi i roto i te fare tāpe’ara’a ’e i roto i te ’āpo’o hōhonu, ’ua tauturu rā te mana o te Atua ia rātou ’ia ora mai.
I tō rātou tūra’ira’ahia i roto i te auahi ura ’e i roto i te ’āua pua’a ’ōviri, ’ua pāruru-ato’a-hia rātou e te mana o te Atua.
’Ua tāmau noa nā pipi to’otoru i te poro i te ’evanelia a Iesu Mesia i te ’āti Nephi. ’Ua poro noa rātou i tāna ’evanelia.