Pene 31
Te tāpena Moroni e ’aro ra ia Zerahemana
E ra’atira Zerahemana nō te ’āti Lamana, tei hina’aro ’ia tāmau noa tōna nuna’a ’ia au ’ore i te ’āti Nephi ’e ’ia fa’ariro ia rātou ’ei mau tītī nā te ’āti Lamana.
’Ua hina’aro te ’āti Nephi ’ia tāpe’a ti’amā noa tō rātou fenua ’e tō rātou ’utuāfare. ’Ua hina’aro ato’a rātou ’ia vai ti’amā nō te ha’amori i te Atua.
E ra’atira ho’i Moroni nō te nu’u ’āti Nephi. I te haerera’a mai te ’āti Lamana e ’aro, ’ua fārerei Moroni ’e tāna nu’u ia rātou i roto i te ’oire nō Ierosona.
’Ua fa’aineine te tāpena Moroni i tāna nu’u faehau i te mau mauiha’a tama’i, te pāruru ’ōuma, te ha’ana ’e te ’ahu me’ume’u.
E nu’u rahi tā te ’āti Lamana, ’ua ri’ari’a rā rātou i te ’itera’a i te ha’ana o te ’āti Nephi---’aita a’e e ’ahu tō te ’āti Lamana.
’Aita te nu’u ’āti Lamana i hina’aro e ’aro atu i te nu’u a te tāpena Moroni. ’Ua horo te ’āti Lamana i roto i te medebara ’e ’ua fa’aoti e tāma’i i te tahi ’oire ’ē o te ’āti Nephi.
’Ua tono Moroni i te mau hi’o nō te hi’o i te ’āti Lamana. ’Ua ani ato’a ’oia ia Alama ’ia pure i te Fatu nō te tauturu. ’Ua parau te Fatu ia Alama i hea te ’āti Lamana e ’aro ai.
I tō Moroni fāri’ira’a i te parau poro’i a Alama, ’ua vaiiho ’oia te tahi mau fa’ehau nō te tīa’i ia Ierosona ’e ’ua ta’ahi atu te toe’a o rātou e fārerei i te ’āti Laman.
’Ua tāpuni te mau fa’ehau a te tāpena Moroni i nā pae e piti o te ’ānavai Sidona, ma te tīa’i ’ia mārei i te nu’u ’āti Lamana.
’Ua ha’amata te hō’ē tama’i, ’e ’ua tāmata te ’āti Lamana i te mahemo ma te nānu’a i te ’ānavai, tē tīa’i mai ra rā te tahi mau ’āti Nephi ia rātou i te tahi pae mai.
Ma te ’aro pūai atu i nā mua a’e, ’ua taparahi pohe Zerahemana ’e tāna nu’u e rave rahi ’āti Nephi. ’Ua tū’ou te ’āti Nephi i te Fatu nō te tauturu.
’Ua ha’apūai te Fatu i te nu’u ’āti Nephi. ’Ua ha’a’ati te nu’u i te ’āti Lamana, ’e ’ua fa’aue Moroni ’ia fa’aea te tāma’i.
’Ua parau Moroni ia Zerahemana ē ’aita te ’āti Nephi e hina’aro e taparahi pohe i te ’āti Lamana ’aore rā e rave ia rātou ’ei tītī.
’Ua parau Moroni ē ’aita e nehenehe i te ’āti Lamana e ha’amou i te fa’aro’o ia Iesu Mesia o te ’ati Nephi. ’Ua parau ’oia e tāmau noa te Atua i te tauturu i te ’āti Nephi ’ia ’aro i te mau taime ato’a e ha’apa’o rātou.
’Ua fa’aue Moroni ia Zerahemana ’ia vaiiho i tāna mauiha’a tama’i. ’Aita te ’āti Lamana e taparahi-pohe-hia mai te mea e fafau rātou ’eiaha e ’aro fa’ahou i te ’āti Nephi.
’Ua hōro’a Zerahemana i tāna mauiha’a ia Moroni ra ’aita rā ’oia i fafau e’ita ’oia e haere e ’aro. ’Ua fa’aho’i Moroni i te mau mauiha’a ’ia ti’a i te ’āti Lamana ’ia pāruru ia rātou.
’Ua horo Zerahemana i ni’a ia Moroni nō te taparahi pohe iāna, ’ua tā’iri rā te hō’ē fa’ehau ’āti Nephi ia Zerahemana ’e ’ua ’ōfati i te ’o’e a Zerahemana.
I muri iho, ’ua tāpū te fa’ehau i te ’iri upo’o o Zerahemana, ’e ’ua tu’u atu ra i ni’a i te auru o tāna ’o’e, fa’atoro atu ra i ni’a.
’Ua parau ’oia ia rātou, e topa te ’āti Lamana mai te ’iri upo’o i topa, maori ra ’ia tu’u mai rātou i tā rātou mau mauiha’a tama’i ’e ’ia fafau ’eiaha e ’aro fa’ahou.
E rave rahi ’āti Lamana tei tu’u i tā rātou mau mauiha’a tama’i i te ’āvae o Moroni ’e ’ua fafau ’eiaha e ’aro fa’ahou. ’Ua fa’ati’ahia rātou ’ia haere ma te ti’amā.
Ma te riri, ’ua tītau Zerahemana i te toe’a o tāna mau fa’ehau ’ia ’aro. E rave rahi tā te mau fa’ehau a Moroni i taparahi pohe.
I tō Zerahemana ’itera’a ē e taparahi-pohe-hia ’ōna ’e tōna mau ta’ata ato’a, ’ua tāparu ’oia ’ia Moroni ’ia fa’aherehere ia rātou. ’Ua fafau ’oia e’ita e tama’i fa’ahou i te ’āti Nephi.
’Ua tāpe’a Moroni i te tama’ira’a ’e ’ua rave i te mau mauiha’a tama’i a te ’āti Lamana. I muri iho tō rātou fafaura’a e’ita rātou e tama’i fa’ahou, ’ua tu’uhia te ’āti Lamana.