Peni 11
Enosa
E tamaiti Enosa nā Iakoba. ’Ua ha’apa’o ’oia i te mau papa’a parau ’e ’ua pāpa’i i ni’a i te reira i muri a’e te pohera’a tōna metua tāne.
I te hō’ē mahana, tē a’ua’u ra Enosa i roto i te uru rā’au. ’Ua ha’amana’o ’oia i te mau ha’api’ira’a a tōna metua tāne ’e ’ua hina’aro ’ia fa’a’orehia tāna mau hara.
’Ua tūturi Enosa ’e ’ua pure i te Atua. ’Ua pure ’oia i te mahana tā’āto’a ’e ’ua pure e pō noa atu ra.
’Ua parau te Atua ia Enosa ē, nō tōna fa’aro’o ia Iesu Mesia, ’ua fa’a’orehia tāna mau hara.
’Ua hina’aro Enosa i muri iho ’ia ha’amaita’i te Fatu i te ’āti Nephi. ’Ua pure ’oia nō rātou, ’e ’ua parau te Fatu e ha’amaita’i ’oia ia rātou mai te mea e ha’apa’o rātou i tāna mau fa’auera’a.
’Ua hina’aro ato’a Enosa ’ia ha’amaita’i te Fatu i te ’āti Lamana. ’Ua pure ’oia ma te fa’aro’o rahi, ’e ’ua fafau mai te Fatu e rave i te mea tā Enosa i ani iāna.
Noa atu tē ’aro ra te ’āti Lamana i te ’āti Nephi ’e e tāmata ra i te ha’amou i tā rātou mau papa’a parau, ’ua pure Enosa ’ia riro mai rātou ’ei hō’ē nuna’a parau-ti’a.
’Ua pure Enosa ē ’ia pāruruhia te mau papa’a parau tāna e ha’apa’o ra. ’Ua fafau mai te Fatu ē i te hō’ē mahana e hōro’a ’oia i te ’āti Lamana i te mau ha’api’ira’a e vai ra i roto i te mau papa’a parau.
’Ua poro Enosa i te ’āti Nephi. ’Ua hina’aro ’oia ia rātou ’ia ti’aturi i te Atua ’e ’ia ha’apa’o i te mau fa’auera’a.
’Ua tāmata te ’āti Nephi i te ha’api’i i te ’evanelia i te ’āti Lamana, ’aita rā rātou i fa’aro’o. ’Ua au ’ore te ’āti Lamana i te ’āti Nephi.
I te roara’a o tōna orara’a, ’ua ha’api’i Enosa i te nuna’a nō ni’a ia Iesu ’e te ’evanelia. ’Ua tāvini ’oia i te Atua ’e ’ua here iāna i tōna pue mahana ato’a.