Pene 53
Moroni ’e tāna mau ha’api’ira’a
I muri a’e i te pohera’a o Moromona, ’ua vai ’ōtahi noa Moroni. ’Ua fa’aoti ’oia i te mau papa’a parau tā tōna metua tāne i hōro’a iāna.
’Ua ’ite Moroni ē i te hō’ē mahana e ’īritihia mai te mau papa’a ’auro nā roto mai i te fenua.
Tē parau nei te mau papa’a ’auro nō ni’a ia Iesu Mesia. Tē fa’a’ite pāpū nei te reira ’e tē ha’api’i nei nāhea ’ia ora parau-ti’a.
’Ua taparahi pohe te ’āti Lamana ’ino i te mau ’āti Nephi ato’a tei ’ore i huna ia Iesu Mesia.
’Aita roa Moroni i huna ia Iesu Mesia. ’Ua haere ’oia nā te mau vāhi, nō te tāpuni i te ’āti Lamana.
’Ua pāpa’i rahi Moroni i ni’a i te mau papa’a ’auro, nō te mau ’āti Lamana ihoā ra o te mau mahana hope’a nei.
’Ua pāpa’i ’oia e rave rahi mau mea faufa’a, tae noa atu te mau parau nō te pure o te ’ōro’a mo’a.
’Ua pāpa’i Moroni ē, te mau ta’ata ana’e o te nehenehe ’ia bāpetizohia ’o rātou ïa tei hina’aro ’ia tātarahapa i tā rātou mau hara ’e ’ia tāvini ia Iesu Mesia.
’Ua hina’aro Moroni i te mau ta’ata ato’a ’ia ti’aturi ia Iesu Mesia ’e ’ia ’ite mai iāna. ’Ua parau ’oia te mau mea maita’i ato’a nō ō mai i te Mesia ra.
’Ua pāpa’i Moroni ē, mai te mea ’ua here te nuna’a i te Atua ’e ’e pe’e iāna, e nehenehe rātou e riro mai e mea maita’i roa.
’Ua ’ite Moroni ē, i muri a’e tōna pohera’a e ti’afa’ahou mai ’oia ’e e ora i pīha’i iho i te Metua i te Ao ra ’e ia Iesu Mesia.