Pene 3
’Ua fa’aru’e Lehi ia Ierusalema
’Ua māuruuru te Fatu ia Lehi ’e i te hō’ē pō, ’ua paraparau ’oia iāna i roto i te hō’ē moemoeā. ’Ua parau ’oia ia Lehi ’ia rave i tōna ’utuāfare ’e ’ia fa’aru’e ia Ierusalema. ’Ua ha’apa’o Lehi i te parau a te Fatu.
’Ua ’āfa’i te ’utuāfare o Lehi i te mā’a ’e te fare ie. ’Ua vaiiho rātou i tō rātou fare ’e tā rātou ’auro ’e te ’ārio, ’e ’ua rātere i roto i te medebara.
E maha tamaiti tā Lehi ’e tā tāna vahine, o Saria. Teie tō rātou mau i’oa ’o Lamana, Lemuela, Samu ’e Nephi.
I muri a’e e toru mahana i te rāterera’a, ’ua pātia te ’utuāfare o Lehi i te ti’ahapa i te hō’ē peho i te pae o te hō’ē ’ānāvai.
’Ua patu Lehi i te hō’ē fata ’ōfa’i ’e ’ua pūpū i te hō’ē tusia i te Atua. ’Ua ha’amāuruuru ’oia i te Atua nō te fa’aorara’a i tōna ’utuāfare i te ha’amoura’a.
’Ua pi’i Lehi i te ’ānāvai ’o Lamana ’e i te ’āfa’a o Lemuela. ’Ua hina’aro Lehi i tāna nā tamaiti ’ia riro mai te ’ānāvai ’e te peho, e tāmau noa i te tahe i te Atua ra ’e te ha’apa’ora’a ma te ’āueue ’ore i te mau fa’auera’a.
’Ua mana’o Lamana ’e ’o Lemuela ’ua ma’ama’ahia tō rāua metua tāne i te fa’aru’era’a ia Ierusalema ’e tā rātou mau tao’a. ’Aita rāua i ti’aturi ē e ha’amouhia Ierusalema.
’Ua hina’aro Nephi e hāro’aro’a i te mau mea tā Lehi i ’ite. ’Ua pure ’oia nō te ’ite ē ’ua tāno ānei te mea tā tōna metua tāne i rave i te fa’aru’era’a ia Ierusalema.
’Ua fārerei Iesu Mesia ia Nephi ’e ’ua parau iāna e parau mau te mau parau a Lehi. ’Ua ti’aturi Nephi ’e ’aita ’oia i ’ōrure mai ia Lamana ’e o Lemuela.
’Ua parau Nephi i tōna mau taea’e i te mea tā Iesu i parau iāna. ’Ua ti’aturi Samu ia Nephi, ’aita rā Lamana ’e o Lemuela i ti’aturi.
’Ua fafau te Fatu ia Nephi ē, e ha’amaita’ihia ’oia nō tōna fa’aro’o. E riro ’oia ’ei ta’ata fa’atere nō tōna mau taea’e.