Pene 46
Iesu Mesia e ha’api’i ra ’e e pure ra ’e te ’āti Nephi
’Ua parau te mau ’āti Nephi tei ’ite ia Iesu Mesia i tō rātou mau hoa ē e ho’i fa’ahou mai ’oia i te mahana nō muri iho. E rave rahi ta’ata tei fa’aitoito ’ia tae i te vāhi i reira Iesu e haere mai ai.
I te po’ipo’i a’e, ’ua ha’api’i Nephi ’e te tahi atu mau pipi i te pupu tei putuputu mai. ’Ua pure te mau pipi i muri iho ’ia fāri’i rātou i te Vārua Maita’i.
’Ua haere Nephi i roto i te pape ’e ’ua bāpetizohia. I muri iho ’ua bāpetizo ’oia i te tahi mau pipi.
I muri a’e i tō rātou bāpetizora’ahia, ’ua fāri’i te mau pipi i te Vārua Maita’i. E au ra ’ua ha’a’atihia rātou e te auahi, ’e ’ua pou mai te mau melahi mai te ra’i mai, ’e ’ua tāvini ia rātou.
’A vai noa ai te mau melahi i te mau pipi ra, ’ua haere mai Iesu ’e ’ua ti’a i rotopū ia rātou.
’Ua parau te Mesia i te ’āti Nephi ato’a ’ia tūturi i ni’a i te repo. ’Ua parau ’oia i tāna mau pipi ’ia pure.
’A pure ai rātou, ’ua fa’aātea atu Iesu i te mau ta’ata ’e ’ua tūturi nō te pure i tōna Metua i te Ao ra.
’Ua ha’amāuruuru Iesu i te Metua i te Ao ra nō te hōro’ara’a mai i te Vārua Maita’i i tāna mau pipi. I muri iho, ’ua ani ’oia ’ia hōro’ahia te Vārua Maita’i i te ta’ata e ti’aturi i te mau parau a te mau pipi.
’Ua ha’amaita’i Iesu i tāna mau pipi ’a pure ai rātou. E mata ’ata’ata tōna ia rātou, ’e ’ua teatea rātou mai te hōho’a mata ’e te ’ahu o Iesu.
’Ua pure fa’ahou Iesu ’e tāna mau pipi. ’Ua ’oa’oa ’oia nō tō rātou fa’aro’o.
’Ua parau te Mesia i te nuna’a ’ia fa’aea i te pure, ’ia tāmau noa rā i te pure i roto i tō rātou ’ā’au. I muri iho, ’ua hōro’a ’oia ia rātou te ’ōro’a mo’a.
’Aita te ta’ata i hōpoi mai te faraoa ’aore rā te uaina, ’ua hōro’a mai rā te Fa’aora i te reira mai te hō’ē temeio.
’Ua parau Iesu Mesia i te ’āti Nephi ē e fa’aho’ihia mai tāna ’evanelia i te fenua nei i te mau mahana hope’a nei.
’Ua parau ’oia ia rātou ’ia tuatāpapa i te mau pāpa’ira’a mo’a, ’ua fa’aue ’oia ia Nephi ’ia pāpa’i i roto i te mau papa’a parau te tupura’a o te toe’a o te mau tohu a Samuela te ’āti Lamana.
I muri iho, ’ua ha’api’i Iesu i te nuna’a nā roto mai i te mau pāpa’ira’a mo’a. ’Ua parau ’oia ia rātou ’ia ha’api’i i te tahi ’e te tahi i te mau mea tāna i ha’api’i ia rātou.
’Ua ho’i atu Iesu i te ra’i ’e ’ua ha’api’i tāna mau pipi i te nuna’a. ’Ua bāpetizohia te feiā tei ti’aturi ’e ’ua fāri’i i te Vārua Maita’i.
’Ua ha’amata te ’āti Nephi i te ha’apa’o i te mau fa’auera’a ato’a.