Pene 6
Te moemoeā o Lehi
’Ua fa’ati’a o Lehi i tōna ’utuāfare i te hō’ē ’ōrama faufa’a roa tāna i fāri’i i roto i te hō’ē moemoeā. ’Ua fa’a’oa’oa te moemoeā o Lehi iāna nō Nephi ’e o Samu, ’ua ’oto rā nō Lamana ’e o Lemuela.
I roto i tōna moemoeā, ’ua ’ite Lehi i te hō’ē ta’ata tei ’ahuhia i te hō’ē ’ahu ’uo’uo tei parau ia Lehi ’ia pe’e iāna. ’Ua pe’e Lehi i te ta’ata i roto i te hō’ē medebara pōiri ’e te ri’ari’a.
I muri a’e i te rāterera’a nā roto i te pōiri e rave rahi hora, ’ua pure Lehi nō te tauturu.
I muri iho, ’ua ’ite ’oia i te hō’ē tumu rā’au e hōtu ’uo’uo tōna. E fa’a’oa’oa teie hotu monamona rahi i te feiā e ’amu i te reira.
’Ua ’amu Lehi i te hotu, e ’ua ’ī ’oia i te ’oa’oa rahi. ’Ua hina’aro ’oia i tōna ’utuāfare ’ia tāmata i te hotu nō te mea ’ua ’ite ’oia e fa’a’oa’oa ato’a te reira ia rātou.
’Ua ’ite Lehi i te hō’ē pape e tahe ra nā pīha’i iho i te tumu rā’au. I te upo’o o te anavai, ’ua ’ite atu ’oia ia Saria, Samu ’e o Nephi.
’Ua tū’ou o Lehi i tāna vahine ’e te mau tamāroa ’ia haere mai ’e ’ia tāmata i te hotu. ’Ua haere mai ’o Saria, Samu ’e ’o Nephi ’e ’ua tāmata i te hotu, ’aita rā ’o Lamana ’e ’o Lemuela.
’Ua ’ite ato’a o Lehi i te hō’ē mea ’āuri ’e te hō’ē ’ē’a tītī’aifaro ’e te piriha’o e arata’i atu i te tumu rā’au.
’Ua ’ite ’oia e rave rahi ta’ata e haere ra nā ni’a ’aore rā nā te ’ē’a ra. Nō te māhu pōiri ho’i, ’ua haere ’ē te tahi ’e ’ua mo’e roa atu ra.
Vetahi ’ua tāpe’a maita’i i te mea ’āuri ’e ’ua nene’i nā roto i te māhu pōiri e tae atu i te tumu rā’au. ’Ua tāmata rātou i te hotu.
Tē fa’a’o’ō’o ra te mau ta’ata i roto i te hō’ē fare rahi i tera pae mai o te ’ānavai i te feiā e ’amu ra i te hotu. ’Ua ha’amā vetahi o tei ’amu i te hotu ’e ’ua fa’aru’e i te tumu rā’au.
’Ua ’ite Lehi e rave rahi mau ta’ata i roto i tōna moemoeā. Vetahi ’ua tāpe’a pāpū i te mea ’āuri ’e ’ua nene’i nā roto i te māhu pōiri e tae roa i te tumu rā’au. ’Ua tāmata rātou i te hotu. Vetahi ’ua haere atu i roto i te fare rahi ’e te ’ā’ano ’aore rā ’ua paremo i roto i te ’ānavai ’aore rā ’ua mo’e roa atu. E’ita roa Lamana ’e ’o Lemuela e ’amu i te hotu. Tē pe’ape’a nei Lehi nō rāua ’e tē tāmata nei i te tauturu ia rāua ’ia ha’apa’o i te mau fa’auera’a a te Atua.