Pene 18
Alama tamaiti e tātarahapa ra
’Ua tu’u te ari’i Mosia ia Alama ’ei ta’ata fa’atere nō te ’Ēkālesia i Zarahemela. I muri iho ’ua mā’iti Alama i te tahi mau ta’ata nō te tauturu iāna ’ia ha’api’i i te ’āti Nephi.
’Ua pe’ape’a Alama ’e te ari’i Mosia, nō te mea te hāmani ’ino nei te feiā ti’aturi ’ore i te mau melo o te ’Ēkālesia nō tā rātou ha’apa’ora’a.
E tamaiti tā Alama ’o Alama te i’oa. ’Aita Alama tamaiti i ti’aturi i te mau ha’api’ira’a a tōna metua tāne ’e ’ua riro ’ei ta’ata ’ino.
’Ua ’aro Alama tamaiti ’e e maha tamaiti a te ari’i Mosia i te ’Ēkālesia. ’Ua ’ume mai rātou e rave rahi mau ta’ata ’ia fa’aru’e i te ’Ēkālesia ’e ’ia riro ’ei ta’ata ’ino.
’Ua pure Alama ’ia ’apo mai tāna tamaiti i te parau mau ’e ’ia tātarahapa.
’Ua tāmau noa Alama tamaiti ’e te mau tamaiti a te ari’i Mosia i te tāmata i te ha’amou i te ’Ēkālesia.
I te hō’ē mahana ’ua fā mai te hō’ē melahi ia rātou. ’Ua parau te melahi mā te hō’ē reo pūai tei fa’a’āueue i te fenua.
Nō te ri’ari’a o nā feiā ’āpī tamāroa e pae, ’ua mā’iri rātou i raro. I te ha’amatara’a, ’aita rātou i hāro’aro’a mai i te mea tā te melahi e parau ra.
’Ua haere mai te melahi ’ei pāhonora’a i te mau pure a te mau melo o te ’Ēkālesia. ’Ua ani te melahi ia Alama tamaiti nō te aha ’oia i ’aro ai i te ’Ēkālesia.
’Ua ’āueue te fenua i te fa’auera’a te melahi ia Alama tamaiti ’ia fa’aea i te tāmata i te ha’amou i te ’Ēkālesia.
’Ua mā’iri Alama tamaiti ’e te mau tamāroa a Mosia i ni’a i te fenua. ’Ua ’ite rātou i te hō’ē melahi, ’e ’ua ’ite rātou i te mana o te Atua i te fa’a’āueuera’a i te fenua.
’Ua māere roa Alama tamaiti ē ’aita ’oia i nehenehe e paraparau. ’Ua paruparu roa ’oia ē ’aita ato’a ’oia e nehenehe e hauti tōna nā rima.
’Ua amo te mau tamaiti a Mosia ia Alama tamaiti i tōna metua tāne ra ’e ’ua parau iāna i te mau mea ato’a tei tupu i ni’a ia rātou.
’Ua ’oa’oa Alama. ’Ua ’ite ’oia ē ’ua pāhono te Atua i tāna mau pure.
’Ua ha’aputuputu Alama e rave rahi mau ta’ata nō te hi’o i te mea tā te Fatu i rave nō tāna tamaiti, ’e nō te mau tamaiti a Mosia.
’Ua ha’apae Alama ’e te tahi atu mau feiā fa’atere o te ’Ēkālesia i te mā’a ’e ’ua pure ’e ’ua ani i te Atua ’ia tauturu ia Alama tamaiti ’ia pūai fa’ahou mai.
I muri ae e piti mahana ’e te pō, ’ua nehenehe ia Alama tamaiti ’ia paraparau ’e ’ia hā’uti’uti.
’Ua parau ’oia i te nuna’a ē ’ua tātarahapa ’oia i tāna mau hara ’e ’ua fa’a’ore mai te Atua i tāna mau hara.
’Ua ha’api’i ’oia ē e ti’a i te mau ta’ata ato’a ’ia riro ’ei mea parau-ti’a nō te tomo i roto i te bāsileia o te Atua. ’Ua parau ato’a ’oia nō te māuiui rahi tāna i fa’aruru nō tāna mau hara.
’Ua ’oa’oa Alama tamaiti nō te mea ’ua tātarahapa ’oia ’e ’ua fa’a’ore mai te Atua i tāna mau hara. ’Ua ’ite ’oia ē ’ua here te Atua iāna.
’Ua ha’amata a’era Alama tamaiti ’e te mau tamaiti a te ari’i Mosia i te ha’api’i i te parau mau ’ati a’e te fenua ma te fa’ati’a i te mea tā rātou i ’ite ’e i fa’aro’o.
’Ua tāmata rātou i te tātā’i i te hape tā rātou i rave. ’Ua tātara rātou i te mau pāpa’ira’a mo’a i te nuna’a ’e ’ua ha’api’i ia rātou nō ni’a ia Iesu Mesia.
’Ua ha’amaita’i te Atua ia Alama tamaiti ’e te mau tamaiti a Mosia ’a ha’api’i ai rātou i te ’evanelia. E rave rahi mau ta’ata tei fa’aro’o ’e tei ti’aturi.