Pene 35
Te tāpena Moroni ’e ’o Pahorana
’Ua ’oa’oa te tāpena Moroni i te fa’aro’ora’a ē ’ua roa’a fa’ahou mai te rahira’a o te tuha’a fenua o te ’āti Nephi ’ia Helamana ’e tōna nu’u.
’Ua hina’aro rā o Helamana ’e tōna nu’u i te tauturu. ’Aita i nava’i te mau fa’ehau nō te pāruru i te mau ’oire e rave rahi.
’Ua pāpa’i te tāpena Moroni i te hō’ē rata ia Pahorana, te ha’avā ’e te tāvana rahi. ’Ua ani ’oia ia Pahorana ’ia tono hau atu i te mau fa’ehau nō te tauturu i te nu’u a Helamana.
’Ua ’aro te ’āti Lamana i te hō’ē ’oire ’āti Nephi tā Helamana i haru mai. ’Ua taparahi pohe rātou e rave rahi ’āti Nephi ’e ’ua tīahi atu te toe’a i rāpae i te ’oire.
Ma te riri i te mau fa’atere o te hau nō tō rātou ’orera’a e tono i te tauturu, ’ua pāpa’i Moroni i te hō’ē atu rata ia Pahorana.
’Ua pāpa’i te tāpena Moroni ē ’ua pohe e rave rahi mau ta’ata nō tō Pahorana ’orera’a i tono hau atu i te mau fa’ehau.
Mai te mea ’aita Pahorana e tono ’oi’oi i te mau ta’ata ’e te mā’a, e haere mai Moroni ’e tōna nu’u i Zarahemela ’e ’ia rave i te mea tā te nu’u e hina’aro.
’Aita i maoro roa ’ua fāri’i Moroni i te rata a Pahorana. ’Ua ’oto roa ’oia nō te mamae tā Moroni ’e tōna nu’u i fāri’i.
’Ua parau Pahorana ia Moroni, ’aita te hō’ē pupu ’āti Nephi tei pi’ihia te ta’ata-hina’aro-ari’i, e hina’aro ’ia riro ’oia ’ei ha’avā rahi. ’Ua fa’ahepo rātou iāna ’e tōna mau tauturu ’ia fa’aru’e ia Zarahemela.
’Ua parau ato’a Pahorana ē, ’ua ha’aputuputu ’oia i te hō’ē nu’u nō te tāmata i te haru mai ia Zarahemela.
’Ua mā’iti te mau ta’ata-hina’aro-ari’i i te hō’ē ari’i ’ei arata’i nō rātou ’e ’ua ’āmui atu i te ’āti Lamana.
’Aita Pahorana i riri i te mea tā Moroni i pāpa’i. ’Ua hina’aro ’oia ’ia ti’amā ato’a te ’āti Nephi.
’Ua ani ’oia ia Moroni ’ia ’āfa’i mai te tahi mau ta’ata nō te tauturu iāna ’e ’ua parau, mai te mea e ha’aputuputu mai Moroni e rave rahi mau ta’ata nā ni’a i te arati’a, e roa’a i te nu’u ’ia ’āmuihia ’ia haru mai ia Zarahemela.
’Ua ’oa’oa te tāpena Moroni ē ’ua vai ha’apa’o noa Pahorana i tōna fenua ’e ’ua hina’aro noa ’ia ti’amā tōna nuna’a.
’Ua haere atu Moroni ’e te tahi o tōna mau ta’ata e fārerei ia Pahorana. ’Ua amo ’oia i te tāpa’o nō te ti’amāra’a ’e e tauasini ta’ata tei ’āmui atu ia rātou nā ni’a i te ’ē’a.
’Ua ta’ahi te nu’u ’āmui a Moroni ’e a Pahorana i Zarahemela. ’Ua taparahi pohe rātou te ari’i o te ’āti Nephi ’ino ’e ’ua haru i tōna mau ta’ata.
I muri iho ’ua tono Moroni i te mā’a ’e e 12 000 faehau nō te tauturu i te mau nu’u ’āti Nephi. ’Ua tīahi teie mau nu’u i te ’āti Lamana i rāpae, ’e ’ua tupu fa’ahou te hau i te fenua.