1 I teienei, i muri a’era, i te toru ’ahuru o te matahiti nō te fa’aterera’a a te mau ha’avā i ni’a i te mau ta’ata o Nephi, i muri a’e i tō Moroni fāri’ira’a ’e te tai’ora’a i te ’episetole a Helamana, ’ua ’oa’oa roa ihora ’oia nō te ’ohipa maita’i, ’oia ïa, nō te manuia rahi o Helamana i te ravera’a mai i taua mau fenua i mahere mai iāna ra.

2 ’Oia ïa, ’e ’ua fa’a’ite atu ’oia i te reira i tōna mau ta’ata ato’a, i te mau fenua ato’a ē ’ati noa a’e i te vāhi tāna e pārahi ra, ’ia ’oa’oa ato’a rātou.

3 ’E i muri a’era, ’ua hāpono ’oi’oi atu ra ’oia i te hō’ē ’episetole ia Pahorana, ma te ani iāna ’ia ha’aputuputu ’āmui mai i te tahi mau ta’ata nō te ha’apūai ia Helamana, ’oia ho’i i te mau nu’u fa’ehau o Helamana, ’ia ti’a iāna ’ia tāpe’a ’ōhie noa i taua pae o te fenua i roa’a iāna ma te manuia nā roto i te hō’ē semeio rahi.

4 ’E i muri a’era, ’ia hāpono atu ra Moroni i teie nei ’episetole i te fenua ra nō Zarahemela, ’ua ha’amata fa’ahou ihora ’oia i te fa’atupu i te hō’ē ’ōpuara’a ’ia ti’a iāna ’ia fāri’i i te toe’a o taua mau fenua ra ’e te mau ’oire ho’i ’o tā te mau ’āti Lamana i haru atu mai ia rātou ra.

5 ’E i muri a’era, ’a fa’aineine ai Moroni nō te haere atu e ’aro i te mau ’āti Lamana, inaha, ’ua ’aro atu te mau ’āti Lamana i te mau ta’ata o Nephiha, ’o tei ha’aputuputu-’āmui-hia mai nō roto mai i te ’oire ra nō Moroni, ’e te ’oire ra nō Lehi, ’e te ’oire ra nō Morianetona.

6 ’Oia ïa, ’o rātou ato’a tei tīahihia i rāpae i te fenua ra nō Maniti, ’e te fenua ē ’ati noa a’e, ’ua haere mai ïa rātou e tauturu i te mau ’āti Lamana i teie pae atu o te fenua.

7 ’E nō te mea e mea rahi roa rātou, ’oia ïa, ’e nō te mea ho’i ’ua fāri’i rātou i te pūai i terā mahana ’e i terā mahana, nā roto i te fa’aterera’a a Amorona, ’ua haere mai ra rātou e ’aro i te mau ta’ata o Nephiha, ’e ’ua ha’amata ihora rātou i te taparahi ia rātou i te taparahira’a rahi ’ū’ana.

8 ’E e mea rahi roa tō rātou mau nu’u fa’ehau, ’e ’ua horo ’ē atu ra te toe’a o te feiā o Nephiha mai mua atu ia rātou ; ’e ’ua haere mai ho’i rātou ’e ’ua ’āmui atu ra i te nu’u fa’ehau o Moroni.

9 ’E teienei, nō te mea ’ua mana’o Moroni ē, e mea ti’a ’ia tonohia te mau ta’ata i te ’oire ra nō Nephiha nō te tauturu i te mau ta’ata ’ia tāpe’a noa i taua ’oire ra, ’e nō te mea ho’i ’ua ’ite ’oia ē, e mea ’ōhie a’e ’ia tāpe’a noa i te ’oire ’ia ’ore te reira ’ia ma’iri atu i roto i te rima o te mau ’āti Lamana, i te haru fa’ahou mai i te reira mai ia rātou, ’ua mana’o ihora ’oia ē, e mea ’ōhie ia rātou ’ia tāpe’a noa i taua ’oire ra.

10 Nō reira, ’ua tāpe’a noa ’oia i tōna nu’u fa’ehau pā’āto’a nō te pāruru i te mau vāhi tāna i haru fa’ahou mai.

11 I teienei, ’ia ’ite a’era Moroni ē, ’ua riro te ’oire ra nō Nephiha, ’ua ’oto roa ihora ’oia, ’e ’ua ha’amata ihora ’oia i te tapitapi, ’o te ma’iri atu rātou i roto i te rima o tō rātou mau taea’e, nō te parauti’a ’ore o te mau ta’ata.

12 I teienei, ’ua nā reira ho’i tōna ra mau ra’atira rahi pā’āto’a. ’Ua tapitapi ihora ’e ’ua māere ato’a ihora ho’i rātou nō te mau ’ohipa ’ī’ino a te mau ta’ata ; ’e ’o teie ïa te tumu, ’oia ho’i, nō te manuiara’a te mau ’āti Lamana i ni’a ia rātou.

13 ’E i muri a’era, ’ua riri ihora Moroni i te hau fenua, nō tō rātou ha’apa’o ’ore i te ti’amāra’a o tō rātou fenua.