Pene 12
Te ari’i Beniamina
E ari’i ’āti Nephi parau ti’a te ari’i Beniamina. Mā te tauturu a te tahi atu mau ta’ata parau-ti’a, ’ua hōpoi mai ’oia i te hau i te fenua.
’Ua pa’ari te ari’i Beniamina ’e ’ua hina’aro e paraparau i tōna nuna’a. ’Ua hina’aro ’oia e parau ia rātou ē e riro mai tāna tamaiti o Mosia ’ei ari’i i muri iho.
’Ua haere mai te nuna’a nā te mau vāhi ato’a o te fenua ’e ’ua ha’aputuputu mai i pīha’i iho i te hiero. ’Ua tu’u rātou i tō rātou fare ’ie ’ia vai te mau ’ūputa i mua i te hiero.
’Ua paraparau mai te ari’i Beniamina mai te hō’ē pare mai ’ia nehenehe te ’āti Nephi ’ia fa’aro’o iāna.
’Ua parau ’oia i tōna nuna’a ē, ’ua tāmata itoito ’oia i te tāvini ia rātou. ’Ua parau ’oia te rāve’a nō te tāvini i te Atua ’o te tāvinira’a ïa i te tahi ’e te tahi.
’Ua parau te ari’i Beniamina i te nuna’a ’ia ha’apa’o i te mau fa’auera’a a te Atua. Te feiā e ha’apa’o maita’i i te mau fa’auera’a e ’oa’oa rātou ’e i te hō’ē mahana e ora rātou i pīha’i iho i te Atua.
’Ua parau te ari’i Beniamina ’aita e maoro roa e fānauhia mai Iesu Mesia i te fenua nei. Te i’oa o tōna metua vahine o Maria.
’Ua rave Iesu i te mau temeio. ’Ua fa’aora ’oia i tei ma’ihia ’e ’ua hōro’a i te feiā i pohe i te ora. ’Ua rave ’oia ’ia hi’o te matapō ’e ’ia fa’aro’o te turi.
’Ua māuiui Iesu ’e ’ua pohe nō te mau hara a te mau nuna’a ato’a. Te feiā ’o tei tātarahapa ’e e fa’aro’o tō rātou ia Iesu e fa’a’orehia tā rātou mau hara.
’Ua parau te ari’i Beniamina i te ’āti Nephi ē, e ta’iri te feiā ’ino ia Iesu. I muri iho e fa’asātauro rātou iāna.
Toru mahana i muri iho, e ti‘afa’ahou mai Iesu.
I muri a’e te paraparaura’a a te ari’i Beniamina, topa ihora te ’āti Nephi i ni’a i te repo. ’Ua hi’afa’ifa’i rātou nō tā rātou mau hara ’e ’ua hina’aro e tātarahapa.
E fa’aro’o ia Iesu Mesia tō te nuna’a, ’e ’ua pure rātou ’ia fa’a’orehia te hara.
’Ua fa’a’ī te Vārua Maita’i i tō rātou ’ā’au. ’Ua ’ite rātou ē ’ua fa’a’ore te Atua i tā rātou hara ’e ’ua here ’oia ia rātou. ’Ua ’ite rātou i te hau ’e te ’oa’oa.
’Ua parau te ari’i Beniamina i tōna nuna’a ’ia ti’aturi i te Atua. ’Ua hina’aro ’oia ia rātou ’ia ’ite ē, ’ua hāmani te Atua i te mau mea ato’a ’e e pa’ari ’e e mana rahi tōna.
’Ua parau te ari’i Beniamina i te nuna’a ’ia vai ha’eha’a ’e ’ia pure i te mau mahana ato’a. ’Ua hina’aro ’oia i tōna nuna’a ’ia ha’amana’o noa i te Atua ’e ’ia ha’apa’o maita’i.
’Ua parau ’oia i te mau metua ’eiaha e vaiiho i tā rātou mau tamari’i ’ia tātama’i ’aore rā ’ia maro.
’Ua parau ’oia ia rātou ’ia ha’api’i i tā rātou mau tamari’i ’ia ha’apa’o i te parau ’e ’ia here ’e ’ia tāvini i te tahi ’e te tahi.
’Ua fa’aara ’oia i te nuna’a ’ia ha’apa’o maita’i i te mea tā rātou e mana’o, e parau, ’e e rave. E ti’a ia rātou ’ia vai ha’apa’o noa ’e ’ia ha’apa’o i te mau fa’auera’a i te roara’a o tō rātou orara’a.
’Ua ani te ari’i Beniamina i te nuna’a ē ’ua ti’aturi ānei rātou i tāna mau ha’api’ira’a. ’Ua parau rātou pā’āto’a ’ē. ’Ua fa’ataui te Vārua Maita’i ia rātou, ’e ’aita rātou i hina’aro fa’ahou e rave i te hara.
’Ua fafau rātou pā’āto’a, ’aore rā ’ua parau fafau, e ha’apa’o i te mau fa’auera’a a te Atua. ’Ua māuruuru te ari’i Beniamina.
’Ua hōro’a te ari’i Beniamina i tāna tamaiti o Mosia te ti’ara’a ’ia riro ’ei ari’i ’āpī. Toru matahiti i muri mai, ’ua pohe te ari’i Beniamina.
E ari’i parau-ti’a o Mosia. ’Ua ’ohipa itoito ’oia ’e ’ua tāvini i tōna nuna’a, mai tā tōna metua tāne i rave.