Pene 4
Te mau ’api veo
’Ua parau o Lehi ia Nephi ē ’ua hina’aro te Fatu iāna ’e i tōna mau taea’e ’ia ho’i i Ierusalema. ’Ia haere rātou e ti’i i te mau ’api veo i te hō’ē ta’ata o Labana te i’oa.
E mau papa’a parau faufa’a rahi te mau ’api veo. E parau nei te reira nō ni’a i te mau huimetua o Lehi ’e tē vai ra te mau parau a te Atua i heheuhia mai e te mau peropheta.
’Aita Lamana ’e o Lemuela i hina’aro e ho’i nō te ti’i i te mau ’api veo. ’Ua parau rāua e mea tai’atā te reira nō te rave. ’Aita tō rāua e fa’aro’o i te Fatu.
’Ua hina’aro Nephi e ha’apa’o i te parau a te Fatu. ’Ua ’ite ’oia e tauturu te Fatu iāna ’e tōna mau taea’e ’ia ti’i i te mau ’api veo ia Labana ra.
’Ua rātere atu o Lamana, Lemuela, Samu ’e Nephi nō te ho’i i Ierusalema nō te ti’i mai i te mau ’api veo.
’Ua haere Lamana i ō Labana ’e ’ua ani iāna i te mau papa’a parau.
’Ua riri Labana ’e ’aita i hōro’a ia Lamana te mau ’api veo. ’Ua hina’aro o Labana e taparahi pohe ia Lamana, ’ua horo ’ē atura Lamana.
’Ua parau o Lamana i tōna mau taea’e i te ’ohipa tei tupu. ’Ua mata’u ’oia ’e ’ua hina’aro e fa’aru’e ’e e ho’i i tō rātou metua tāne i roto i te medebara.
’Ua parau Nephi ia rātou e’ita e ti’a ia rātou e hō’i ma te mau ’api veo ’ore. ’Ua parau ’oia i tōna mau taea’e ’ia fa’arahi atu ā te fa’aro’o i te Fatu ’e e roa’a ia rātou te mau ’api veo.
’Ua haere atu Nephi ’e tōna mau taea’e i tō rātou fare tahito i Ierusalema ’e ’ua ha’aputuputu i tā rātou ’auro ’e te ’ario nō te taui e te mau papa’a parau.
’Ua fa’a’ite rātou ia Labana i tā rātou mau tao’a ’e ’ua pūpū nō te taui e te mau papa’a parau. I tō Labana ’itera’a i tā rātou ’auro ’e te ’ario, ’ua hina’aro ’oia i te reira nāna iho ’e ’ua ti’avaru ia rātou i rāpae.
’Ua parau Labana i tōna mau ta’ata e taparahi pohe i te mau tamaiti a Lehi. ’Ua horo Nephi ’e tōna mau taea’e ’e ’ua tāpuni i roto i te ana. ’Ua tāpe’a Labana i tā rātou ’auro ’e te ’ario.
’Ua riri Lamana ’e o Lemuela ia Nephi. ’Ua tā’iri rāua ia Nephi ’e ia Samu i te rā’au.
’Ua fā mai te hō’ē melahi ’e ’ua parau ia Lamana ’e ia Lemuela e fa’aea. ’Ua parau ’oia e tauturu te Fatu ia rātou ’ia fāri’i i te mau papa’a parau. ’Ua parau ato’a ’oia e riro Nephi ’ei hō’ē fa’atere i ni’a i tōna mau taea’e.
’Ua parau Nephi i tōna mau taea’e ’ia tu’u i te fa’aro’o i te Fatu ’e eiaha e mata’u ia Labana ’e tōna mau ta’ata. ’Ua fa’aitoito Nephi i tōna mau taea’e ’ia ho’i i Ierusalema.
I te reira pō, ’ua tāpuni te mau taea’e o Nephi i rāpae i te patu o te ’oire, haere huna atura Nephi i roto. Haere atura ’oia i te fare o Labana.
’A piri atu ai Nephi i te fare o Labana, ’ua ’ite ’oia i te hō’ē ta’ata ’ua taero e tārava ra i ni’a i te repo. ’O Labana.
’Ua ’ite Nephi i te ’o’e a Labana ’e ’ua rave mai. ’Ua parau te Vārua Maita’i ia Nephi e taparahi pohe ia Labana, ’aita rā o Nephi i hina’aro e taparahi pohe iāna.
’Ua parau fa’ahou te Vārua Maita’i ia Nephi ’ia taparahi pohe ia Labana ’ia ti’a ia Nephi ’ia fāri’i i te mau ’api veo. ’Ua hina’aro te ’utuāfare o Lehi i te mau papa’a parau nō te ha’api’i mai i te ’evanelia.
’Ua ha’apa’o Nephi i te parau a te Vārua Maita’i ’e ’ua taparahi pohe ia Labana. ’Ua ’ō’omo ihora Nephi i te mau ’ahu o Labana ’e te mau ha’ana.
’Ua haere Nephi i te fare o Labana ’e ’ua fārerei atu ia Zorama, te tāvini o Labana. E au ra Nephi mai ia Labana te huru.
’Ua parau ’oia ia Zorama e ti’i i te mau ’api veo. ’Ua mana’o o Zorama ia Nephi o Labana, nō reira, ’ua hōro’a ’oia iāna te mau papa’a parau. ’Ua parau Nephi ia Zorama ’ia pe’e iāna.
’Ua ’ite Lamana, Lemuela, ’e o Samu ia Nephi i te haerera’a mai ’e ’ua ri’ari’a rātou ; ’ua mana’o rātou ē ’o Labana. ’Ua ha’amata rātou i te horo ’ua tāpe’a rā i tō Nephi ti’aorora’a ia rātou.
I tō Zorama ’itera’a ē ’o Nephi ’e ’ere ’o Labana, e ’ua tāmata ’oia i te horo. ’Ua haru mai Nephi ’ia Zorama ’e ’ua fafau iāna e’ita ’oia e rave-’ino-hia mai te mea e haere ’oia nā muri ia rātou i te medebara.
’Ua fāri’i Zorama. ’Ua rave Nephi ’e tōna mau taea’e ia Zorama ’e te mau ’api veo ’e ’ua ho’i atu ia Lehi ’e ia Saria.
’Ua hōro’a rātou i te mau ’api veo ia Lehi. ’Ua ’oa’oa ’oia ’e o Saria ’ua pāruruhia tā rāua mau tamaiti. ’Ua ’oa’oa rātou pā’āto’a ’e ’ua ha’amāuruuru i te Atua.
Tē tai’o ra Lehi i te mau ’api veo. E parau ra te reira nō ni’a ia Adamu ’e o Eva ’e te hāmanira’a o te ao nei. Tei roto te mau parau a te mau peropheta e rave rahi.
’Ua ’oa’oa Lehi ’e o Nephi nō te mea ’ua ha’apa’o rāua i te parau a te Fatu ’e ’ua ti’a ia rātou ’ia fāri’i i te mau ’api veo.
’Ua pū’ohu te ’utuāfare o Lehi i te mau ’api veo nō te ’āfa’i nā muri ia rātou i roto i tō rātou tere ’ia ha’api’ihia tā rātou mau tamari’i i te mau fa’auera’a i pāpa’ihia i ni’a i te mau papa’a parau.