Pene 9

Hō’ē ’utuāfare ’āpī i te fenua i parauhia ra

’Ua ’āfa’i te pahī i te ’utuāfare o Lehi nā ni’a i te moana ’e ’ua tae i te fenua i parauhia ra. ’Ua fa’ati’a te mau ta’ata i tō rātou mau ti’ahapa.

1 Nephi 18:23

’Ua fa’aineine rātou i te repo ’e ’ua tanu i te mau huero tā rātou i ’āfa’i mai.

1 Nephi 18:24

’A rātere ai rātou nā ni’a i tō rātou fenua ’āpī, ’ua ’ite mai rātou e rave rahi huru animara. ’Ua ’ite ato’a mai rātou te ’auro, te ’ario, ’e te veo.

1 Nephi 18:25

’Ua parau te Atua ia Nephi ’ia hāmani i te mau papa’a i te metalo nō te pāpa’i i ni’a. ’Ua pāpa’i o Nephi nō ni’a i tōna ’utuāfare ’e tō rātou mau tere. ’Ua pāpa’i ato’a ’oia i te mau parau a te Atua.

1 Nephi 19:1, 3

’Ua pa’ari o Lehi. Hou ’oia ’a pohe ai, ’ua paraparau ’oia i tāna mau tamāroa ’e ’ua parau ia rātou ’ia ha’apa’o i te mau fa’auera’a a te Atua. ’Ua ha’amaita’i ato’a ’oia i tāna mau mo’otua.

2 Nephi 1:14, 16; 4:3–11

I muri a’e i te pohera’a o Lehi, ’ua ha’amata Lamana ’e o Lemuela i te riri ia Nephi ’e ’ua hina’aro e taparahi pohe iāna. ’Aita rāua i hina’aro ia Nephi, tō rāua teina, ’ia riro ’ei fa’atere nō rāua.

2 Nephi 4:13; 5:2–3

’Ua parau te Fatu ia Nephi ’ia arata’i i te feiā parau-ti’a i roto i te medebara. ’Ua rātere rātou e rave rahi mahana ’e ’ua fa’aea ihora i te hō’ē fenua tā rātou i pi’i o Nephi.

2 Nephi 5:5–8

’Ua ha’apa’o te mau ta’ata tei pe’e ia Nephi i te parau a te Atua. ’Ua ’ohipa itoito rātou ’e ’ua ha’amaita’ihia. ’Ua ha’api’i Nephi i tōna mau ta’ata ’ia hāmani i te mau rā’au ’e te metalo. ’Ua patu rātou i te hō’ē hiero nehenehe.

2 Nephi 5:10–11, 15–16

’Ua pi’ihia te mau ta’ata tei pe’e ia Lamana ’e Lemuela te mau ’āti Lamana.

2 Nephi 5:14

’Aita te mau ’āti Lamana i ha’apa’o i te parau a te Atua ’e ’ua tāpū-’ē-hia rātou mai mua atu i tōna aro. E’ita te Vārua ’o te Fatu e nehenehe e pārahi ia rātou ra ē tae roa atu ’ua tātarahapa rātou.

2 Nephi 5:20 ; Etera 2:15

’Ua ’ī te mau ’āti Lamana i te peu ’ī’ino ’e ’ua ’aro pinepine rātou i te mau ’āti Nephi.

2 Nephi 5:24, 34