« 10–16 nō ’Ātete. Alama 53-63 : « Fa’aorahia rātou i te mana ta’a ’ē o te Atua », Mai, pe’e mai—nō te Paraimere : Buka a Moromona 2020 (2020)
« 10–16 nō ’Ātete. Alama 53-63 », Mai, pe’e mai—nō te Paraimere : 2020
E piti tauatini fa’ehau ’āpī, nā Arnold Friberg
10-16 nō ’Ātete
Alama 53-63
« Fa’aorahia rātou i te mana ta’a ’ē o te Atua »
’A tai’o ai ’outou i te Alama 53–63, e feruri nāhea e ti’a ai ia ’outou ’ia fa’aora te mau ’ā’amu i roto i teie mau pene nō te mau tamari’i ’e ’ia tauturu ia rātou ’ia ’apo mai i te mau parau tumu o te ’evanelia tā te mau ’ā’amu e ha’api’i nei.
Pāpa’i i te mau mana’o e tae mai
Tītau i te mana’o
Nō te fa’aineine i te mau tamari’i ’ia ’apo mai nā roto mai i te Alama 53–63, e ani ia rātou ’ia fa’a’ite mai e aha tā rātou e ha’amana’o ra nō ni’a i te mau Aniti-Nephi-Lehi (hi’o Alama 23–24). Nō te tauturu, e fa’a’ite i te hō’ē hōho’a tā ’outou i fa’a’ohipa nō te ha’api’i i te ’ā’amu, ’e ’aore rā, e fa’aha’amana’o ia rātou i te hō’ē ’ohipara’a tā rātou i rave i roto i te piha ha’api’ira’a.
Ha’api’i i te ha’api’ira’a tumu : Mau tamari’i ’āpī
E nehenehe au e ha’apa’o maita’i i te parau a te Atua mai te mau fa’ehau taure’are’a.
E nehenehe te mau fa’ehau taure’are’a a Helamana (’oia ho’i « ’āpī ») e riro ’ei hi’ora’a rahi nō te mau tamari’i i roto i tā ’outou piha ha’api’ira’a. E fa’aitoito i te mau tamari’i ’ia tāmata i te riro mai ia rātou te huru.
Mau ’ohipa e nehenehe e rave
-
E ani i te hō’ē tamari’i ’ia tāpe’a i te hōho’a i roto i te arata’i ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare ’a ha’apoto ai ’outou i te ’ā’amu o te mau fa’ehau taure’are’a a Helamana. E ti’a ato’a ia ’outou ’ia fa’a’ohipa i te « Pene 34 : Helamana ’e nā 2 000 fa’ehau ’āpī Te mau ’ā’amu o te Buka a Moromona, 93–94). E vaiiho i te mau tamari’i ’ia fa’a’ite mai e aha tā rātou i ’ite ’e i au nō ni’a i te ’ā’amu nō nā fa’ehau taure’are’a e 2000.
-
E ani i te hō’ē tamāhine ’e i te hō’ē tamāroa ’ia fa’ahōho’a i te mau metua vahine ’e te mau metua tāne o te mau fa’ehau taure’are’a. ’A tai’o ai ’outou i te Alama 56:27 ’e te 47–48, e hōro’a i teie mau tamari’i i te mau tauiha’a e tāpe’a o te fa’ahōho’a i te huru o tō te mau metua vahine ’e te mau metua tāne tauturura’a i te mau fa’ehau, mai te hō’ē pūtē mā’a, nō te fa’ahōho’a i « te mau mā’a » tā te mau metua tāne i hāpono, ’e te mau pāpa’ira’a mo’a nō te fa’ahōho’a i te mau ha’api’ira’a a te mau metua vahine. E ani i te mau tamari’i ’ia fa’a’ite mai i te mau mea tā tō rātou mau metua e hōro’a nei nā rātou ’e ’aore rā, e ha’api’i nei ia rātou.
-
E tai’o i te Alama 53:20–21, ’e e tauturu i te mau tamari’i ’ia hāro’aro’a e aha te aura’a nō te mau ta’o ra te itoito, te pūai, ’e te parau mau. E fa’ata’a nāhea tō te mau fa’ehau taure’are’a fa’a’itera’a i teie mau huru maita’i. E hāmani i te mau tāreta i’oa ’ōhie nō te mau tamari’i ’ia tai’o, « ’Ia riro ana’e au , e riro vau mai te hō’ē fa’ehau taure’are’a ! » Tauturu i te mau tamari’i ’ia fa’a’ī i te mau vāhi vata i te hō’ē huru maita’i tā rātou i mā’iti mai i roto i te Alama 53:20–21.
-
E ani i te mau tamari’i ’ia fa’a’ī i te ’api ’ohipara’a o teie hepetoma. E tauturu ia rātou ’ia feruri i te mau rāve’a e nehenehe ai rātou e riro mai te nu’u a Helamana. E hīmene ’āmui « Proclamons la vérité » (Chants pour les enfants, 172–73).
’Ia hepohepo ana’e au, e nehenehe au e ti’aturi i te Atua.
I te fārereira’a ’oia ’e tōna mau nu’u i te mau taime fifi, ’ua ti’aturi Helamana i te Fatu. E aha tā te mau tamari’i tā ’outou e ha’api’i nei e ’apo mai nā roto mai i tōna hi’ora’a ?
Mau ’ohipa e nehenehe e rave
-
E pāpa’i i te hō’ē hōho’a mata tu’atu’a i ni’a i te tāpura ’ere’ere, ’e e parau nō ni’a i te huru nō tō Helamana ha’ape’ape’ara’a i te mea ē, ’aita i nava’i te mā’a nā tōna nu’u ’e ’aore rā, ’aita i nava’i te ta’ata nō te tāmau noa i te ’aro (hi’o Alama 58:32–41). E ani i te mau tamari’i ’ia fa’a’ite mai i te mau taime ’a ha’ape’ape’a ai rātou. E tai’o i te Alama 58:37 (’e ’aore rā e tauturu i te hō’ē tamari’i ’ia tai’o i te reira), ’e e tauturu i te mau tamari’i ’ia taui i te hōho’a mata i ni’a i te tāpura ’ere’ere ’ei hōho’a mata ’ata’ata nō te fa’a’ite ē, e aha te huru o Helamana i tōna ti’aturira’a i te Atua. E aha tā tātou e nehenehe e rave ’ia pe’ape’a ana’e tātou ? E hīmene ’āmui « Sourires » (Chants pour les enfants, 128).
-
E pāpa’i i ni’a i te tahi mau ’api parau tāpūpūhia i te tahi mau mea tā te mau tamari’i e nehenehe e ha’ape’ape’a. Vaiiho i te mau tamari’i te tahi i muri mai i te tahi ’ia mā’iti i te hō’ē ’api parau nā ’outou e tai’o, ’e e ani i te mau tamari’i ’ia fa’a’ite mai, nāhea te Atua i te tauturu ia rātou i roto i teie mau ha’ape’ape’ara’a tāta’itahi. E fa’a’ite i te hō’ē ’itera’a i reira te Atua i te tauturura’a ia ’outou ’a vai ai ’outou i roto i te pe’ape’a.
Ha’api’i i te ha’api’ira’a tumu : Mau tamari’i pa’ari
Alama 56:45–48; 57:21, 25–27; 58:39–40
E nehenehe au e ha’apa’o maita’i i te parau a te Atua mai te mau fa’ehau taure’are’a.
E aha te mau parau mau nō roto mai i te ’ā’amu o te mau fa’ehau taure’are’a (te aura’a « ’āpī ») a Helamana e nehenehe e tauturu i te mau tamari’i i roto i te mau tāmatara’a tā rātou e fārerei nei ?
Mau ’ohipa e nehenehe e rave
-
E ani i te mau tamari’i ’ia fa’a’ite mai e aha tā rātou i ’ite nō ni’a i te mau fa’ehau taure’are’a. E nehenehe ato’a ’outou e fa’a’ohipa i te « Pene 34 : Helamana ’e nā 2 000 fa’ehau ’āpī » (Te mau ’ā’amu o te Buka a Moromona, 93–94). Vaiiho i te mau tamari’i ’ia fa’a’ite mai e aha tā rātou i fa’ahiahia nō ni’a i te mau fa’ehau.
-
E tai’o ’āmui Alama 56:45–48; 57:21, 25–27; ’e 58:39–40. E ani i te mau tamari’i ’ia ’imi i te mau ta’o ’e te mau pereota nō roto mai i teie mau ’īrava ’o tē fa’ata’a nei i te mau fa’ehau taure’are’a. E aha te aura’a o teie mau ta’o ’e teie mau pereota ? Nāhea tātou e nehenehe ai e riro mai te mau fa’ehau taure’are’a ?
-
E tai’o Alama 56:46–48 i te mau tamari’i, ’e e ani ia rātou ’ia fa’aro’o e aha tā te mau metua vahine o te mau fa’ehau taure’are’a i ha’api’i i tā rātou mau tamari’i nō ni’a i te fa’aro’o. Nāhea te mau metua o teie mahana e tauturu i tā rātou mau tamari’i ’ia roa’a te fa’aro’o ? Nō te aha e mea faufa’a nō te mau tamari’i ’ia pe’e i te mau ha’api’ira’a parau-ti’a a tō rātou mau metua ’e a te feiā fa’atere o te ’Ēkālesia ma te « hapa ’ore »? (Alama 57:21).
Huero nō te fa’aro’o, nā Jay Ward
E nehenehe tā’u e tāpe’a i tā’u mau fafaura’a.
’Ua rave te mau fa’ehau taure’are’a ’e tō rātou mau metua i te mau fafaura’a o tā rātou e ha’apa’o maita’i. E nehenehe ’outou e fa’a’ohipa i teie ’ā’amu nō te ha’api’i i te mau tamari’i nō ni’a i te faufa’a o te mau fafaura’a.
Mau ’ohipa e nehenehe e rave
-
E vāhi i te mau tamari’i i roto e toru pupu : hō’ē nō te fa’ahōho’a ia Helamana, te tahi nō te fa’ahōho’a ia Amona, ’e te toru nō te fa’ahōho’a i te mau tamaiti o te nuna’a o Amona. E tai’o ’āmui i te Alama 53:10–17 ’e e vaiiho i te mau pupu ’ia fa’a’ite mai nāhea te mau ta’ata tā rātou e fa’ahōho’a ra i te ravera’a ’e te ha’apa’ora’a i te mau fafaura’a. E fa’a’ite i tō ’outou ’itera’a pāpū ē, e ha’amaita’i te Metua i te Ao ra ia tātou ’ia ha’apa’o ana’e tātou i tā tātou mau fafaura’a.
-
Pāpa’i i ni’a i te tāpura ’ere’ere i te mau pereota nō roto mai i te Mosia 18:8–10 ’e ’aore rā, i te Parau ha’api’ira’a ’e te mau Parau Fafau 20:37 ’o tē fa’a’ite ra i te mau mea tā tātou e fafau ’ia bāpetizo-ana’e-hia tātou. E pāpa’i ato’a i te tahi atu mau pereota ’aita e tū’ati ra i ni’a i te mau fafaura’a. E ani i te mau tamari’i ’ia ha’apuni i te mau mea tā tātou e fafau e rave (e vaiiho ia rātou ’ia fa’a’ohipa i te mau pāpa’ira’a mo’a mai te mea e hina’arohia). Nāhea tātou i te ha’amaita’ihia mai te mea e ha’apa’o tātou i tā tātou mau fafaura’a ? E fa’aitoito i te mau tamari’i ’ia pāpa’i i te mea tā rātou i fafau i te Atua ’ia rave ’e e pia i tā rātou tāpura i te vāhi e nehenehe rātou e ’ite pinepine.
-
E ani i te hō’ē tamari’i ’ia tai’o i te Alama 56:27. Nāhea te mau metua tāne i te tauturura’a i tā rātou mau tamaiti ma te ’ore e ’ōfati i tā rātou parau fafau ’eiaha e tama’i ? O vai te pāturu ia tātou i te ha’apa’ora’a i tā tātou mau parau fafau ?
E nehenehe tā’u e mā’iti ’eiaha e riri.
’Ua pari hape noa o Moroni ia Pahorana, ’aita rā o Pahorana i riri, ’ua parau rā ’oia ē, « tē ’oa’oa ra rā vau i te aroha rahi o tō ’ā’au na » (Alama 61:9).
Mau ’ohipa e nehenehe e rave
-
E ani i te mau tamari’i ’ia feruri i te hō’ē taime ’a pari hape-noa-hia ai rātou i te ravera’a i te hō’ē mea ’aita rātou i rave. E parau ia rātou nāhea te reira i te tupura’a i ni’a ia Pahorana (hi’o Alama 60–61). E nehenehe ’outou e fa’a’ohipa i te « Pene 35 : Te tāpena Moroni ’e ’o Pahorana » (Te mau ’ā’amu o te Buka a Moromona, 95-97). Nō te ’apo mai, e mea nāhea tō Pahorana pāhonora’a, e tai’o te tahi i muri mai i te tahi i te mau ’īrava nō roto mai i te Alama 61:3–14. E aha tā Pahorana i rave ’a pari ai o Moroni iāna ? E aha tā tātou i ’apo mai nō ni’a i te fa’a’orera’a i te hapa nā roto mai i te hi’ora’a o Pahorana ? Nāhea tātou e nehenehe ai e riro mai iāna te huru ?
-
E pāpa’i i ni’a i te tāpura ’ere’ere e aha tā’u e rave ’ia riri mai te hō’ē ta’ata iā’u ? E ani i te mau tamari’i te tahi i muri mai i te tahi ’ia pāpa’i i te tahi mau pāhonora’a i ni’a i te tāpura ’ere’ere. Nāhea Pahorana i te pāhonora’a i teie uira’a ? E ani i te mau tamari’i ’ia pāpa’i i teie mau pāhonora’a i roto i te hō’ē rata ia rātou iho o tā rātou e nehenehe e tai’o ’ia riri mai te hō’ē ta’ata ia rātou.
Fa’aitoito i te ha’api’ira’a mai i te fare
E fa’aitoito i te mau tamari’i ’ia fa’a’ite i tō rātou ’utuāfare i te hō’ē rāve’a tā rātou e hina’aro ’ia riro rātou mai te mau fa’ehau taure’are’a. E nehenehe ato’a tā rātou e ha’amāuruuru i tō rātou mau metua nō te ha’api’ira’a ia rātou mai tā te mau metua vahine o te mau fa’ehau taure’are’a i rave.
Haʼamaitaʼiraʼa i tā tātou haʼapiʼiraʼa
E fa’aō mai i te mau tamari’i i roto i te mau ’āparaura’a ’evanelia. Mai te mea ē, e tauiui-ri’i-hia te fa’anahora’a o te piha ha’api’ira’a, e nehenehe te reira e tauturu i te mau tamari’i i te tahi taime ’ia fa’aō maita’i mai a’e i roto i te mau ’āparaura’a ’evanelia. ’Ei hi’ora’a, e nehenehe ’outou i te tahi taime e ani i te mau tamari’i ’ia pārahi i roto i te hō’ē ha’amenemenera’a i ni’a i te tahua, ’eiaha rā i ni’a i tō rātou pārahira’a.