17–23 nō ’Ātete

Helamana 1–6

« Te papa o tō tātou Ora »

’Ua ’ōpuahia te mau fa’a’ohipara’a i roto i teie arata’ira’a nō te fa’atupu i te mau mana’o ’e te fa’aurura’a i roto i tō ’outou ’ā’au ’e tō ’outou ferurira’a. E tae mai te mau mana’o maita’i a’e ’a feruri hōhonu ai ’outou nā roto i te pure i ni’a i te mau pāpa’ira’a mo’a ’e i te mau hina’aro o te mau tamari’i tā ’outou e ha’api’i ra.

Pāpa’i i te mau mana’o e tae mai

Tītau i te mana’o

Nō te pāturu i te mau tamari’i i roto i tā rātou ’apora’a mai i te ’evanelia i te fare, e ani i te tahi pae o rātou ’ia fa’a’ite mai i te hō’ē mea tā rātou i ’apo mai i teie hepetoma. E fa’ata’a e mea nāhea ’outou ’ia tuatāpapa i te ’evanelia i te fare, ’e e paraparau i ni’a i te mau rāve’a e nehenehe ai i te mau tamari’i ’ia tauturu i tō rātou ’utuāfare ’ia ’apo mai nā roto mai i te Buka a Moromona.

Ha’api’i i te ha’api’ira’a tumu : Mau tamari’i ’āpī

Helamana 5:12

E nehenehe au e patu i tō’u niu i ni’a ia Iesu Mesia.

’Ua ha’api’i Helamana i tāna nā tamari’i o Nephi ’e o Lehi ’ia patu i tō rāua orara’a i ni’a i te papa o tō tātou Fa’aora. E feruri, nāhea ’outou i te rave ato’a i te reira nō te mau tamari’i tā ’outou e ha’api’i ra.

Mau ’ohipa e nehenehe e rave

• E fa’a’ite i te hō’ē hōho’a o te hō’ē hiero ’e ’aore rā, o te tahi atu fare, ’e e fa’ata’a ē, e tītauhia ’ei mau niu pa’ari tō te mau fare ’ia ’ore rātou ’ia topa i raro i te mata’i ’e te vero. Nō te fa’ahōho’a i te reira, e ani i te mau tamari’i ’ia tāmata i te fa’anu’u i te hō’ē ’ōfa’i ma te pupuhi i te mata’i i ni’a iho. E tai’o i te tahi mau rēni mātāmua o te Helamana 5:12, ’e e ani i te mau tamari’i ’ia ’āfa’i i tō rātou rima i ni’a ’ia fa’aro’o ana’e rātou ē, ’o vai te « papa » e ti’a e riro ’ei niu nō tātou.

• E ani i te mau tamari’i ’ia rave i te mau ’ohipa ’a tai’o ai ’outou i te Helamana 5:12. ’Ei hi’ora’a, e nehenehe tā rātou e tāhirihiri i tō rātou rima ’a tai’o ai outou nō ni’a i te « vero ’ū’ana » a te diabolo ’e ’ia ti’a i ni’a i te hō’ē vāhi ’a tai’o ai ’outou nō ni’a i te « papa o tō tātou Fa’aora ».

• E ani i te mau tamari’i ’ia tauturu ia ’outou ’ia hāmani i te hō’ē patura’a ma te fa’a’ohipa i te mau tāpū rā’au ’e ’aore rā, i te tahi atu mau mātēria. E ha’amata nā roto i te hāmanira’a i te hō’ē « niu pāpū », ’e e parau ia rātou nāhea Iesu Mesia e riro ai ’ei niu nō tō tātou orara’a. E ani i te mau tamari’i ’ia fa’a’ite mai i te mau mea e ti’a ia rātou ’ia rave nō te pe’e ia Iesu Mesia, ’e e fa’aue ia rātou ’ia tu’u i te hō’ē tāpū rā’au i ni’a i te niu o te patura’a nō te ’ohipa tāta’itahi tā rātou e fa’a’ite mai.

• E ani i te mau tamari’i ’ia fa’a’ū i te ’api ’ohipara’a, ’e e tauturu ia rātou ’ia tāpū i te reira. E aha te ti’a ia tātou ’ia rave nō te patu i tō tātou orara’a i ni’a i te niu o Iesu Mesia ? E fa’a’ite i te tahi mau huru ravera’a ’a patu ai ’outou i tō ’outou orara’a i ni’a i te Fa’aora ’e nāhea te ravera’a i te reira i ha’amaita’i ai i tō ’outou orara’a.

Helamana 5:21–52

E muhumuhu mai te Vārua Maita’i ma te hō’ē reo iti ha’iha’i.

Te fa’ata’ara’a i roto i te Helamana 5:29–30, 45–47 nō te reo tā te mau ’āti Lamana i fa’aro’o, hō’ē ā ïa huru tā tātou e fa’ata’a pinepine nei e mea nāhea te Vārua Maita’i i te paraparau mai. E nehenehe ’outou e fa’a’ohipa i teie mau ’īrava nō te tauturu i te mau tamari’i ’ia ’ite i te reo o te Vārua.

Mau ’ohipa e nehenehe e rave

• E fa’a’ite i te ’ā’amu o Nephi ’e o Lehi i roto i te fare tāpe’ara’a. E nehenehe ’outou e fa’a’ohipa i te « Pene 37 : Nephi ’e ’o Lehi i roto i te fare tāpe’ara’a » (Te mau ’ā’amu o te Buka a Moromona, 99–102). ’Ia paraparau ana’e ’outou nō ni’a i te reo tā te ’āti Lamana i fa’aro’o, e paraparau ma te reo marū. E fa’ahiti fa’ahou i te ’ā’amu i te tahi mau taime, ’e e ani i te mau tamari’i ’ia muhumuhu mai nā muri ia ’outou. E parau i te mau tamari’i nō ni’a i te mau taime ’a muhumuhu mai ai te Vārua Maita’i ia ’outou ’e ’ua ha’apūai i tō ’outou ’itera’a pāpū.

• E tai’o i te Helamana 5:30, ’e ’a hīmene ’e te mau tamari’i i te hō’ē hīmene nō ni’a i te Vārua Maita’i, mai te « The Still Small Voice » (Children’s Songbook, 106–7). E fa’a’ite i te mau parau i roto i te ’īrava pāpa’ira’a mo’a ’e te hīmene o te fa’ata’a ra nāhea te Vārua Maita’i i te paraparau ia tātou (hi’o ato’a Helamana 5:45–47). E fa’a’ohipa Helamana 5:29 ’e i tō ’outou iho mau ’itera’a nō te fa’a’ite i te mau tamari’i i te tahi mau hi’ora’a o te mau mea maita’i tā te Vārua Maita’i e nehenehe e fa’auru mai ia tātou ’ia rave.

Ha’api’i i te ha’api’ira’a tumu : Mau tamari’i pa’ari

Helamana 1–6

’Ia ha’eha’a ana’e au, e ha’amaita’i mai te Metua i te ao ra iā’u.

Tē vai ra i roto i te Buka a Moromona e rave rahi mau hi’ora’a nō te mau fifi o te te’ote’o ’e te mau ha’amaita’ira’a o te ha’eha’a, ’e e ’itehia e rave rahi o teie mau hi’ora’a i roto i te Helamana 1–6. ’A tuatāpapa ai ’outou i teie mau pene, ’a feruri nāhea ’outou i te fa’a’ohipa i teie mau hi’ora’a nō te ha’api’i i te mau tamari’i i roto i tā ’outou piha ha’api’ira’a.

Mau ’ohipa e nehenehe e rave

• E fa’aue i te mau tamari’i ’ia tauturu mai ia ’outou ’ia pāpa’i i ni’a i te tāpura ’ere’ere i teie hōho’a nō te « ’ohura’a o te te’ote’o ». E tai’o ’āmui i te Helamana 3:24, 33–34 ’e 4:11–15, ’e e ani i te mau tamari’i ’ia fa’a’ite mai i te mau tuha’a o te ’ohura’a tā teie mau ’īrava e fa’ata’a nei.

• Pāpa’i i te mau ta’o Ha’eha’a ’e Te’ote’o i ni’a i te tāpura ’ere’ere. E pāpa’i i te tahi mau hi’ora’a o te ha’eha’a ’e ’aore rā, te mau ’ohipa te’ote’o i ni’a i te mau ’api parau tāpūpū, ’e e ani i te mau tamari’i hō’ē i muri mai i te tahi, ’ia mā’iti i te hō’ē ’api parau ’e ’ia tu’u i te reira i pīha’i iho i te ta’o i ni’a i te tāpura ’ere’ere ’o tē fa’ata’a ra i te reira ’ohipa. E aha te tahi mau rāve’a tā tātou e nehenehe e mā’iti ’ia vai ha’eha’a ?

Te « ’ohura’a o te te’ote’o ».

Helamana 5:5–14

E patu vau i tō’u niu i ni’a ia Iesu Mesia.

I roto i te Helamana 5:12 tē vai ra te mau hōho’a pūai nō ni’a i te patura’a i tō tātou niu i ni’a ia Iesu Mesia. Nāhea ’outou i te fa’a’ohipa i teie mau hōho’a nō te fa’ahōho’a i teie parau tumu i te mau tamari’i ? ’Ia nā reira ’outou, e tauturu te reira i te fa’aineinera’a i te mau tamari’i nō te mau fa’ahemara’a ’e te mau tāmatara’a tā rātou e fa’aruru atu.

Mau ’ohipa e nehenehe e rave

• E hōpoi mai i roto i te piha ha’api’ira’a i te tahi mau huru mātēria o te nehenehe e fa’ahōho’a i te niu paruparu ’e ’aore rā, pa’ari (mai te tahi pōpō vavai ’e ’aore rā, te hō’ē ’ōfa’i parahurahu ’e ’aore rā, hō’ē carreau). E ani i te mau tamari’i ’ia hāmani i te hō’ē patu ma te fa’a’ohipa i te mau tāpū rā’au ’e ’aore rā, i te tahi atu mau mātēria i ni’a i te mau huru niu ta’a ’ē. E aha te mea e fa’ariro i te tahi mau niu ’ei mea pa’ari a’e i te tahi ? E tai’o ’āmui i te Helamana 5:12, ’e e ani i te mau tamari’i nō te aha rātou e mana’o ai ē, ’ua riro Iesu Mesia ’ei « hō’ē niu pāpū ». Nāhea e ti’a ai ia tātou ’ia patu i tō tātou orara’a i ni’a iāna ? E ani ia rātou ’ia ’imi Helamana 3:27–29, 35 ’e i te Hiro’a fa’aro’o 1:4 nō te ’ite i te mau mana’o.

• E ani i te mau tamari’i ’ia hi’o i te Helamana 5:5–14 ’e ’ia tai’o e hia rahira’a taime e fa’ahitihia te ta’o « ha’amana’o ». E aha tā Helamana i ha’api’i i tāna mau tamaiti ’ia ha’amana’o ? Nāhea te ha’amana’ora’a i teie mau mea i te tauturu ia tātou ’ia fa’ariro ia Iesu Mesia ’ei niu nō tō tātou orara’a ?

Helamana 5:20–52

E mono te tātarahapa i te pōiri vārua ’e te māramarama.

Te mau ’āti Lamana tei haere i te fare tāpe’ara’a nō te tāparahi pohe ia Nephi ’e ia Lehi, ’ua hā’atihia rātou i te hō’ē pōiri ta’ota’o. ’Ia rave ana’e tātou i te hara, tei roto tātou i te pōiri pae vārua. Tē ha’api’i mai nei Helamana 5:20–52 ia tātou nāhea tō tātou « ata pōiri » i te pe’e ’ē atu (’īrava 41).

Mau ’ohipa e nehenehe e rave

• Ha’apōiri maita’i i te piha ha’api’ira’a ; i muri iho, e tai’o ’e ’aore rā, e ha’apoto i te ’ā’amu i roto i te Helamana 5:20–40 ma te fa’a’ohipa i te hō’ē mori pata na’ina’i. E aha te huru o te ’āti Lamana i roto i te pōiri ? E ani i te mau tamari’i ’ia fa’aro’o e aha tā Aminadaba i ha’api’i i te mau ta’ata ’ia rave ’ia ti’a i te pōiri ’ia pe’e ’ē atu, ’e i muri iho e tai’o i te ’īrava 41. I muri iho, e tu’ama i te mori, ’e e tai’o ’āmui i te mau ’īrava 42–48. E aha tā teie mau ’īrava e ha’api’i mai nei ia tātou nō ni’a i te mau ha’amaita’ira’a tā te tātarahapa e hōpoi mai i roto i tō tātou orara’a ?

• E ani i te mau tamari’i ’ia feruri ē, tē ha’api’i ra rātou i te hō’ē tamari’i ri’i nō ni’a i te Vārua Maita’i. Nāhea e ti’a ai ia rātou ’ia fa’a’ohipa i te Helamana 5:29–33, 44–47 nō te ha’api’i, mai te aha te huru o te reo o te Vārua, ’e e aha te tahi o te mau mea tā te Vārua e parau mai ia tātou ? Nāhea te Vārua Maita’i i te fa’aurura’a ia ’outou ’ia tātarahapa ? E ani i te mau tamari’i ’ia fa’a’ite mai i te mau ’itera’a ’a fāri’i ai rātou i te hau ’e te tāmāhanahana a te Vārua Maita’i.

Fa’aitoito i te ha’api’ira’a mai i te fare

E ani i te mau tamari’i ’ia ui i te mau melo o te ’utuāfare nāhea rātou i te patura’a i tō rātou orara’a i ni’a ia Iesu Mesia. ’E ’aore rā, e nehenehe rātou e fa’a’ite i tō rātou ’utuāfare nāhea rātou i te fa’anaho ’ia patu i tō rātou iho orara’a i ni’a iāna.

Haʼamaitaʼiraʼa i tā tātou haʼapiʼiraʼa

E faʼaʼite pāpū nō Iesu Mesia. E rāve’a mo’a tā ’outou nō te tauturu i te ha’apūaira’a i te mau ’itera’a pāpū o te mau tamari’i i roto i tā ’outou piha ha’api’ira’a. E tauturu ia rātou ’ia ’ite i te here o Iesu nō rātou, ’e e fa’a’ite pinepine nō ni’a iāna.