« 7–13 nō Tetepa. 3 Nephi 1–7: ‘’A fa’ateitei i tō upo’o i ni’a, ’e ’a fa’aitoito’ », Mai, pe’e mai—nō te Paraimere : Buka a Moromona 2020 (2020)
« 7–13 nō Tetepa. 3 Nephi 1–7 », Mai, pe’e mai—nō te Paraimere : 2020
Hō’ē mahana, hō’ē pō, ’e hō’ē mahana, nā Jorge Cocco
7–13 nō Tetepa
3 Nephi 1–7
« ’A fa’ateitei i tō upo’o i ni’a, ’a fa’aitoito »
Mai te mea e hina’aro ’outou i te tahi atu mau mana’o ’a fa’aineine ai ’outou i te ha’api’i, e hi’o « te tahi atu mau rāve’a tauturu nō te ha’api’i i te mau tamari’i » ’e « Te pāhonora’a i te mau hina’aro o te mau tamari’i ’āpī » i te ōmuara’a o teie rāve’a tauturu.
Pāpa’i i te mau mana’o e tae mai
Tītau i te mana’o
E ani i te mau tamari’i ’ia fa’a’ite mai e aha tā rātou e ha’amana’o ra i ’apo mai i te hepetoma i ma’iri a’e nei nō ni’a i te mau tāpa’o tā Samuela te ’āti Lamana i parau tei tauturu i te ta’ata ’ia ’ite ē, ’ua fānauhia Iesu. E parau i te mau tamari’i ē, i teie mahana e paraparau rātou nō ni’a i te mau ta’ata tei ’ite i taua mau tāpa’o ra i te tupura’a.
Ha’api’i i te ha’api’ira’a tumu : Mau tamari’i ’āpī
’Ua fā mai te hō’ē feti’a ’āpī i te taime ’a fānauhia ai Iesu Mesia.
’Ua mātaro-maita’i-hia te ’ā’amu i roto i te faufa’a ’āpī nō ni’a i te fānaura’a o te Fa’aora, e te mau tamari’i ato’a. E taime faufa’a roa teie hepetoma nō te ha’api’i i te mau tamari’i i roto i tā ’outou piha ha’api’ira’a nō ni’a i te mau temeio tā te ’āti Nephi i ’ite i te taime ’a fānauhia ai Iesu.
Mau ’ohipa e nehenehe e rave
-
Hou te ha’api’ira’a, e tu’u i te hō’ē feti’a i ni’a i te papa’i. E ani i te mau tamari’i ’ia ’imi i te hō’ē mea i ni’a i te papa’i tei mātarohia e ’ere rā nō reira. E parau i te mau tamari’i ē, ’ua ’ite te ’āti Nephi i te hō’ē feti’a ’āpī i ni’a i te ra’i i te fānaura’ahia Iesu. ’A ha’apoto i te ’ā’amu i roto i te 3 Nephi 1:4–15, ’e 19–21. E nehenehe ato’a ’outou e fa’a’ohipa « Pene 41 : Te mau tāpa’o nō te fānaura’a o te Mesia » (Te mau ’ā’amu o te Buka a Moromona, 114–16).
-
E fa’a’ite i te mau tamari’i i te hō’ē hōho’a o te fānaura’a o te Fa’aora (hi’o i te Buka hōho’a o te ’evanelia, nūmera 30), ’e e hīmene i te hō’ē hīmene noela auhia, mai te « C’est l’heureux temps » (Chants pour les enfants, 32–33). E tauturu i te mau tamari’i ’ia hāro’aro’a ē, tei te ātea ’ē roa te ’āti Nephi i te vāhi i fānauhia ai Iesu, ’ua ’ite rā rātou ē, ’ua fānauhia ’oia nō te mea ’ua ’ite rātou i te mau tāpa’o. E fa’a’ite pāpū ē, noa atu ’aita tātou i ’ite i te fānaura’a o te Fa’aora, e nehenehe te Vārua Maita’i e tauturu ia tātou ’ia ’ite ē, e parau mau te mau ’ā’amu nō ni’a i te reira i roto i te mau pāpa’ira’a mo’a.
E tupu iho ā te mau parau a te mau peropheta.
’Ua parau te Fatu ia Nephi, « e fa’a’ite [au] i tō te ao nei ē, e fa’ati’a vau i tā’u i fa’a’ite nā roto i te vaha o tā’u mau peropheta mo’a ra » (3 Nephi 1:13).
Mau ’ohipa e nehenehe e rave
-
E fa’a’ite i te mau hōho’a e fa’a’ite ra e mea nāhea tō te Atua paraparaura’a nā roto i te mau peropheta, mai ia Noa (Buka hōho’a o te ’evanelia, nūmera 7–8; hi’o Genese 6-7) ’e Samuela te ’āti Lamana (Buka hōho’a o te ’evanelia, nūmera 81; hi’o Helamana 14:1–7). E ani i te mau tamari’i ’ia fa’a’ite mai e aha tā rātou i ’ite nō ni’a i teie mau ’ā’amu.
-
E tai’o i te mau tamari’i 3 Nephi 1:20, ’e e fa’a’ite i tō ’outou ’itera’a pāpū ē, e tupu iho ā te mau parau a te mau peropheta. E ani i te mau tamari’i ’ia fa’aro’o i te peropheta i roto i te ’āmuira’a i muri nei.
E nehenehe au e pe’e ia Iesu Mesia.
’Ua parau o Moromona ē, « E pipi au nā Iesu Mesia ». Nāhea e ti’a ia ’outou ’ia tauturu i te mau tamari’i ’ia hi’o ia rātou iho ’ei mau pipi ato’a ?
Mau ’ohipa e nehenehe e rave
-
E tai’o 3 Nephi 5:13, ’e e ani i te mau tamari’i ’ia fa’ahiti fa’ahou i te pereota ra « E pipi au nā Iesu Mesia ». E ha’api’i ia rātou ē, e tāmata te hō’ē pipi a Iesu Mesia i te pe’e iāna. E fa’a’ite i te tahi mau ’ohipa tā Moromona i rave nō te riro mai ia Iesu te huru, mai te ha’api’ira’a i te parau a te Atua ’e te ha’apa’ora’a i te mau fa’auera’a a te Atua (hi’o 3 Nephi 5:13–18). E tauturu i te mau tamari’i ’ia feruri i te mau rāve’a e nehenehe rātou e riro ’ei pipi.
-
I ni’a i te hō’ē tuha’a ’api parau, e tauturu i te mau tamari’i ’ia pāpa’i i te hōho’a o tō rātou rima ’e ’ia tāpūpū i te reira. E pāpa’i « E pipi au nā Iesu Mesia » i ni’a i te hō’ē pae, ’e i te tahi pae, e ani ia rātou ’ia pāpa’i i te hōho’a o te hō’ē ’ohipa tā rātou e rave nō te riro ’ei pipi (e tītauhia paha ia ’outou ’ia tauturu ia rātou ’ia feruri nō te mau mana’o). E hīmene ’āmui i te hō’ē hīmene nō ni’a i te pe’era’a i te Fa’aora, mai te « Jésus-Christ est mon modèle » (Chants pour les enfants, 40–41).
Ha’api’i i te ha’api’ira’a tumu : Mau tamari’i pa’ari
E tupu mai iho ā te mau fafaura’a a te Atua, tei hōro’ahia mai nā roto i tāna mau peropheta.
E nehenehe te ’ā’amu i roto i te 3 Nephi 1:4–21 e tauturu i te patura’a i te fa’aro’o o te mau tamari’i ē, e tāpe’a iho ā te Atua i tāna mau fafaura’a.
Mau ’ohipa e nehenehe e rave
-
E ani i te mau tamari’i ’ia fa’aau i te tohura’a a Samuela te ’āti Lamana i roto i te Helamana 14:1–7 i tōna tupura’a i roto i te 3 Nephi 1:19–21. E fa’a’ite pāpū ē, e tupu iho ā te mau fafaura’a a te Atua tei parauhia nā roto mai i tāna mau peropheta.
-
E tai’o ’e te mau tamrii i te ’ā’amu e ’itehia i roto i te 3 Nephi 1:4–10. E ani i te mau tamari’i e aha tō rātou mana’o ’āhiri, ’o rātou te hō’ē o te mau ta’ata tei ti’aturi i ora nā i taua taime ra. E ani i te mau tamari’i ia tai’o i te toe’a o te ’ā’amu i roto i te mau ’īrava 11–15 ’e ’ia fa’a’ite mai i te mau rāve’a nō te fa’a’ī i teie pereota : « Te ha’api’ira’a o teie ’ā’amu ’oia ho’i… » Nāhea e ti’a ai ia tātou ’ia fa’a’ite i tō tātou ti’aturi i te Atua, ’ia hepohepo ’e ’aore rā, ’ia tō’aru’aru ana’e tātou ?
-
E fa’a’ite i te tahi mea tā tō tātou peropheta ora i fafau mai ia tātou. E aha te ti’a ia tātou ’ia rave nō te fa’a’ite i tō tātou fa’aro’o ē, nō ō mai i te Atua ra te mau parau a te peropheta ?
3 Nephi 2:11–12; 3:13–14, 24–26
E mea pūai a’e tātou ’ia ’āmui ana’e tātou.
’Ua tītauhia i te ’āti Nephi ’ia ha’aputuputu mai rātou nō tō rātou pārurura’a i te tino nei. Nāhea e ti’a ai ia ’outou ’ia tauturu i te mau tamari’i ’ia ’ite ē, e nehenehe ato’a te ha’aputuputura’a mai ’e te mau hoa parau-ti’a e hōro’a ia rātou i te pūai pae vārua ?
Mau ’ohipa e nehenehe e rave
-
E tai’o ’e te mau tamari’i i teie mau ’īrava i muri nei, ’e e ani ia rātou ’ia ’imi i te mau tumu i ha’aputuputu mai ai te ’āti Nephi ’e ’ua fāri’i rātou i te mau ha’amaita’ira’a : 3 Nephi 2:11–12 ’e 3:13–14, 24–26. Nō te aha e mea faufa’a nō tātou ’ia « ha’aputuputu mai » i teie mahana i roto i tō tātou mau ’utuāfare ’e i te ’ēkālesia ? Nāhea e ti’a ai i te ha’aputuputura’a mai e hōro’a ia tātou i te pūai pae vārua ?
-
E fa’a’ohipa i te hō’ē ha’api’ira’a tao’a nō te ha’api’i ē, e mea pūai a’e tātou ’ia ’āmuihia i te vai ta’a ’ē noa te tahi i te tahi. ’Ei hi’ora’a, e ani i te mau tamari’i ’ia tāmata i te ’ōfati i te hō’ē rā’au ’e i muri iho i te hō’ē ruru rā’au ’e ’aore rā, hō’ē ’api parau ’e i muri iho, hō’ē ’āpapara’a ’api parau. Nāhea tātou e riro ai ’ei ruru rā’au ’e ’aore rā, ’ei ’āpapara’a ’api parau ? Nāhea e ti’a ai ia tātou ’ia ha’apūai i te tahi ’e te tahi ’ia ha’aputuputu ana’e mai tātou i roto i tō tātou ’utuāfare ’e ’aore rā, i te ’ēkālesia ?
-
E fa’ata’a ē, tē ha’aputuputu nei Iesu i tōna mau ta’ata i roto i te ’Ēkālesia i teie mahana nā roto i te ’ohipa misiōnare (hi’o 3 Nephi 5:24–26). E ani i te hō’ē misiōnare rave tāmau ’e ’aore rā, i te hō’ē misiōnare pāroita ’ia fa’a’ite mai i te mau ’itera’a e fa’a’ite ra e mea nāhea te mau ta’ata i te ha’apūaira’ahia nā roto i te ha’aputuputura’a mai rātou i roto i te ’Ēkālesia.
3 Nephi 4:30–33; 5:12–26; 6:14; 7:15–26
E pipi au nā Iesu Mesia.
Nāhea e ti’a ai ia ’outou ’ia tauturu i te mau tamari’i ’ia hi’o ia rātou iho ’ei mau pipi nā Iesu Mesia, mai tā Moromona i nā reira ? (hi’o 3 Nephi 5:13).
Mau ’ohipa e nehenehe e rave
-
E fa’a’ite i te hō’ē hōho’a nō Moromona (mai te Buka hōhoʼa nō te ʼEvanelia, nūmera 73). E ani i te tamari’i tāta’itahi, te tahi i muri mai i te tahi, ’ia fa’ahiti fa’ahou i te mea tā Moromona i parau i roto i te 3 Nephi 5:13 : « E pipi au nā Iesu Mesia ». E aha te aura’a ’ia riro ’ei pipi nā Iesu Mesia ? (hi’o PH&PF 41: 5).
-
E vāhi i te piha ha’api’ira’a nā roto i te mau pupu na’ina’i, ’e e fa’aue i te pupu tāta’itahi ’ia tai’o i te hō’ē o teie mau hi’ora’a o te mau pipi : te ’āti Lamana tei fa’afāriuhia (hi’o 3 Nephi 4:30–33; 6:14), Moromona (hi’o 3 Nephi 5:12–26), ’e o Nephi (hi’o 3 Nephi 7:15–26). Nāhea teie mau ta’ata i te rirora’a ’ei mau pipi mau nā Iesu Mesia ? E aha tā tātou e nehenehe e rave nō te pe’e i tō rātou mau hi’ora’a ?
Fa’aitoito i te ha’api’ira’a mai i te fare
E ani i te mau tamari’i ’ia feruri i te tahi mea tā rātou e rave i teie hepetoma nō te riro ’ei mau pipi nā te Mesia. E fa’aitoito ia rātou ’ia pāpa’i i te reira ’e ’ia fa’a’ite atu i tō rātou ’utuāfare.
Haʼamaitaʼiraʼa i tā tātou haʼapiʼiraʼa
Pia i te hō’ē pāpa’ira’a mo’a. E mā’iti i te hō’ē ’īrava tā ’outou e mana’o ra ē, e mea faufa’a (’e ’aore rā, e ani i te mau tamari’i ’ia mā’iti i te hō’ē), ’e ’a pia i te reira i roto i tā ’outou piha ha’api’ira’a i te vāhi e ’ite pinepine te mau tamari’i i te reira. E ti’a paha ia ’outou ’ia pia i te reira nō te roara’a e rave rahi hepetoma ’e ’ia fa’a’ite i te reira i terā ’e terā taime.