Hō’ē mahana, hō’ē pō ’e hō’ē mahana, nā Jorge Cocco

7–13 nō Tetepa

3 Nephi 1–7

« Fa’ateitei i tō upo’o i ni’a »

’Ua ’ite te mau ’āti Nephi i te mau tāpa’o temeio, ’a he’e noa ai rā ho’i te tau, ’ua mo’ehia ia rātou te mau ’ohipa i tupu (hi’o 3 Nephi 2:1). E riro te tāpa’opa’ora’a i te mau mana’o e tae mai i te tauturu ’ia ’outou ’ia ha’amana’o i te mau ’ohipa pae vārua e tupu ’a tuatāpapa ai i te 3 Nephi 1–7.

Pāpa’i i te mau mana’o e tae mai

E nehenehe e parau ē, e taime ’ana’anatae roa nō te rirora’a ’ei ta’ata fa’aro’o ia Iesu Mesia. Tē tupu ra te mau parau tohu—tē fa’a’ite ra te mau tāpa’o rahi ’e te mau temeio i rotopū i te mau ta’ata ē, ’ua fātata roa te Fa’aora i te fānauhia. I te tahi pae, e taime pe’ape’a ato’a nō te feiā fa’aro’o inaha, noa atu ā te mau temeio ato’a, ’ua onoono noa te feiā fa’aro’o ’ore i te parau ē « ’ua ma’iri na te tau » nō te fānaura’a o te Fa’aora (3 Nephi 1:5). ’Ua fa’atupu teie mau ta’ata « i te ti’arepu rahi i te fenua e ’ati noa a’e » (3 Nephi 1:7) ’e ’ua fa’ata’a ato’a rātou i te hō’ē tai’o mahana e taparahi-pohe-hia ai te feiā fa’aro’o ’ia ’ore noa atu te tāpa’o i tohuhia e Samuela te ’āti Lamana—hō’ē pō ’aita e pōiri—e tupu.

I roto i terā vaira’a fifi mau, ’ua « ti’aoro ’ū’ana atura [te peropheta Nephi] i tōna Atua i tōna ra ta’ata » (3 Nephi 1:11). E mea fa’auru mau te pāhonora’a a te Fatu nō te ta’ata e fa’aruru i te hāmani-’ino-ra’a ’aore rā te fē’a’a ’e ’o tē tītauhia ’ia ’ite ē e upo’oti’a te māramarama i ni’a i te pōiri : « ’A fa’ateitei i tō upo’o i ni’a, ’a fa’aitoito… e fa’ati’a vau i tā’u i fa’a’ite nā roto i te vaha o tā’u mau peropheta mo’a ra » (3 Nephi 1:13).

Mau mana’o nō tā ’oe iho tuatāpapara’a pāpa’ira’a mo’a

3 Nephi 1:4–21 ; 5:1–3

E fa’atupu te Fatu i tāna mau parau ato’a.

’Ia feruri ’oe, e aha tō ’oe mana’o ’āhani tei roto ’oe i te feiā fa’aro’o i terā tau i fa’a’itehia i roto i te 3 Nephi 1–7 ? ’Ei hi’ora’a, e aha ïa te mana’o e tupu mai i te tīa’ira’a i te pō ma te pōiri ’ore e fa’aara i te fānaura’a o te Fa’aora, e ’ua ’ite ’oe ē, e pohe ’oe ’ia ’ore te reira e tupu mai ? ’Ia tai’o ’oe i te 3 Nephi 1:4–21 ’e te 5:1–3, ’a ’imi i te mea tā Nephi ’e te tahi atu feiā fa’aro’o i rave nō te tāpe’a noa i te fa’aro’o i roto i terā mau taime fifi. Nāhea te Fatu i te ha’amaita’ira’a ia rātou ? E aha tā ’oe e ’apo mai ’o tē nehenehe e tauturu ia ’oe i te taime ’ua tīa’i ’oe i te mau ha’amaita’ira’a i parauhia e te Fatu ?

3 Nephi 1:22 ; 2:1–3

’Ia ha’amo’e au i te mau ’ohipa pae vārua i tupu nō’u, e ’ore au e pāruruhia i mua i te mau fa’ahemara’a a Sātane.

E mana’o paha ’oe ē, te ’itera’a i te hō’ē ’ohipa māere mai te hō’ē pō pōiri ’ore e vai maoro ïa te reira ’e e riro mai ho’i ’ei tūtau nō tō ’oe ’itera’a pāpū. E au rā ē, ’ua mōrohi atu te mēharo nō te mau tāpa’o ’e te mau ’ohipa māere tā te mau ’āti Nephi i ’ite i te roara’a o te tau. E aha te tumu i mo’e ai ia rātou, ’e e aha te mau fa’ahope’ara’a nō te ha’amo’era’a ? (hi’o 3 Nephi 1:22 ; 2:1–3).

E aha tā ’oe e rave nei nō te ha’amana’o ’e nō te fa’a’āpī i tō ’oe ’ite nō te mau parau mau pae vārua ? ’Ei hi’ora’a, e feruri na e nāhea te pāpa’ira’a i te mau ’ohipa pae vārua tei tupu e nehenehe e tauturu ia ’oe. Nāhea ’oe ’ia fa’a’ite atu i tō ’oe ’itera’a i te mau ta’ata piri ia ’oe nō te tauturu ia rātou ’ia ti’aturi ?

Hi’o ato’a Alama 5:6 ; Henry B. Eyring, « ’A ha’amana’o na, ’a ha’amana’o na », Ensign ’aore rā Liahona, Nov. 2007, 66–69 ; Neil L. Andersen, « ’Aita te fa’aro’o e topa noa mai, e au rā i te mā’itira’a », Ensign ’aore rā Liahona, Nov. 2015, 65–68.

3 Nephi 2:11–12 ; 3:1–26 ; 5:24–26

E ha’apūai te Fatu i tōna feiā mo’a i mua i te mau ataatara’a pae vārua.

I tō tātou nei tau, ’aita te rahira’a o tātou e fa’aruru nei i te mau pupu ’eiā ’o tē fa’ahepo nei ia tātou ’ia vaiiho i tō tātou fare nō te putuputu atu i te hō’ē vāhi. Tē fa’aruru nei rā tātou i te mau ataatara’a pae vārua, ’e tē vai ra paha i roto i te ’ohipa i tupu nō te mau ’āti Nephi te tahi mau ha’api’ira’a e tauturu ia tātou. E ’imi i te reira mau ha’api’ira’a ’a tai’o ai ’oe i te 3 Nephi 2:11–12 ’e te 3:1–26.

I roto i te 3 Nephi 5:24–26 tē tai’o nei tātou nō ni’a i te ha’aputuputura’a te mau ta’ata o te Fatu i te mau mahana hope’a nei. E aha tā teie mau ’īrava e ha’api’i nei nō ni’a e nāhea te Fatu e ha’aputuputu ai i tōna mau ta’ata i teie mahana ?

Hi’o ato’a « Purera’a ’ati ti’a i te ao nā te feiā ’āpī : Poro’i nā te peresideni Russell M. Nelson ’e te tuahine Wendy W. Nelson », 3 nō Tiunu 2018, ChurchofJesusChrist.org ; « ’Īserā’ela—Te ha’aputuputura’a o ’Īserā’ela », Arata’i nō te mau pāpa’ira’a mo’a, scriptures.ChurchofJesusChrist.org.

3 Nephi 5:12–26 ; 7:15–26

E pipi au nā Iesu Mesia.

I tō ’oe mana’o, e aha te aura’a ’ia riro ’ei pipi nā Iesu Mesia ? (hi’o PH&PF 41:5). I roto i te 3 Nephi 5:12–26, ’ua fa’aea ri’i Moromona i te ha’apotora’a i te mau pāpa’a parau ’āti Nephi nō te fa’a’ite ē, e pipi ’oia nā Iesu Mesia. I muri mai, i roto i te 3 Nephi 7:15–26, ’ua fa’ata’a ’oia i te tāvinira’a a te tahi atu pipi—’o te peropheta Nephi. E aha tā ’oe e ’ite ra i roto i teie nā tuha’a ’īrava e piti ’o tē tauturu ia ’oe ’ia māramarama i te aura’a nō te ti’ara’a pipi nā te Mesia ?

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

3 Nephi 3:13–14, 25–26

E aha tā te mau ’āti Nephi e rave nei nō te pāruru ia rātou i te ’enemi i mua ia rātou ? E aha tā tātou e rave nei nō te fa’ariro i tō tātou fare ’ei vāhi hau ’e te pāruru i te mau ’ino o te ao nei ?

3 Nephi 2:1–3 ; 6:15–17

Nō te tauturu i tō tātou ’utuāfare ’ia ’ite nāhea Sātane e fa’ahema ai ia tātou, e pāpa’i i te hōho’a o te hō’ē tino, ’e ’a tai’o noa ai te ’utuāfare i te 3 Nephi 2:1–3 ’e te 6:15–17, e tāpa’o i te vāhi o te tino e fa’ahitihia. ’Ia au i teie mau ’īrava, e aha te tahi mau rāve’a tā Sātane nō te fa’ahema ia tātou ’ia ha’amo’e i te Atua ’e ’ia fāriu i ni’a i te hara ?

3 Nephi 4:7–12, 30–33

E aha tā te mau ’āti Nephi i rave i te ’itera’a rātou i te feiā ’eiā nō Gadianetona i te haerera’a mai ? E aha tā tō tātou ’utuāfare e nehenehe e ’apo mai nā roto mai i te mau ’āti Nephi, ’ia fa’aruru ana’e tātou i te mau ’ohipa fifi ? E aha tā tātou e nehenehe e ’apo mai i roto i te mau parau a te mau ’āti Nephi i muri iho i tō te Fatu tauturura’a ia rātou i roto i tō rātou taime fifi ?

3 Nephi 5:13 ; Te Parau Ha’api’ira’a ’e te mau Parau Fafau 41:5

E tai’o i te 3 Nephi 5:13 ’e Te Parau Ha’api’ira’a ’e te mau Parau Fafau 41:5, ’e e ’āparau i te aura’a nō te rirora’a ’ei pipi nā te Mesia. Penei a’e e nehenehe te mau melo o te ’utuāfare e paraparau nō te mau taime ’ua ’ite rātou i te tahi i te rirora’a ’ei pipi. Mai te peu e mau tamari’i ri’i tā ’outou, e nehenehe e hāmani i te hō’ē tāreta e parau nei : « E pipi au nā Iesu Mesia », ’ia tu’u rātou i te reira tāreta i ni’a ia rātou i te mau taime ato’a e ’ite ’outou ’ia rātou i te pe’era’a i te Fa’aora.

Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Haʼamaitaʼiraʼa i tā tātou haʼapiʼiraʼa

E tauturu i tō ’outou ’utuāfare ’ia fa’aau i te mau pāpa’ira’a mo’a ia rātou iho. ’Ua parau Nephi ē « ’Ua fa’aau ho’i au i te mau parau pāpa’i mo’a ato’a ia mātou, ’ia riro te reira ’ei maita’i ’e ’ei ha’api’ira’a ho’i nō mātou » (1 Nephi 19:23). Nō te tauturu i tō ’outou ’utuāfare ’ia fa’aau i te mau pāpa’ira’a mo’a ia rātou iho, e nehenehe tā ’outou e ani ia rātou ’ia feruri i te mea tā rātou e rave ’āhani tei rotopū rātou i te feiā fa’aro’o e parauhia ra i roto i te 3 Nephi 1:4–9. (Hi’o Ha’api’ira’a mai tā te Fa’aora, 21.)

Hō’ē mahana, hō’ē pō ’e hō’ē mahana, nā Walter Rane