« 14–20 nō Tetepa. 3 Nephi 8–11 : ‘’A ti’a mai i ni’a, ’e ’a ha’afātata mai iā’u’ » Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)
« 14–20 nō Tetepa. 3 Nephi 8–11 », Mai, pe’e mai—nō te ta’ata hō’ē ’e te ’utuāfare : 2020
’O vau te māramarama o te ao nei, nā James Fullmer
14–20 nō Tetepa
3 Nephi 8–11
« ’A ti’a mai i ni’a, ’e ’a ha’afātata mai iā’u »
I roto i te 3 Nephi 8–11, ’ua fa’aro’o te ta’ata i te reo o te Atua i te paraparaura’a ia rātou. ’Ia tai’o ’outou i teie mau pene, ’a fa’aro’o maita’i i tā tōna reo e parau mai ia ’outou.
Pāpa’i i te mau mana’o e tae mai
« Inaha, ’o vau nei, ’o Iesu Mesia, ’o tā te mau peropheta i fa’a’ite mai e tae mai i te ao nei » (3 Nephi 11:10). Nā roto i teie mau parau tē fa’a’ite nei te Fa’aora tei ti’afa’ahou iāna iho, ma te fa’atupu i te mau parau tohu tahito ra e 600 matahiti i roto i te Buka a Moromona. ’Ua pāpa’i Elder Jeffrey R. Holland : « Terā fāra’a ’e terā fa’aarara’a, ’o te taime hō’ē roa, te taime rahi hope ho’i, i roto i te ’ā’amu tā’āto’a o te Buka a Moromona. ’O te fa’a’itera’a ’e te fa’auera’a mana i ha’amāramaramahia ’e i fa’auruhia te mau peropheta ’āti Nephi ato’a… ’Ua paraparau pā’āto’a rātou nō ni’a iāna, ’ua hīmene nō ni’a iāna, ’ua moemoeā nō ni’a iāna ’e ’ua pure ’ia fā mai ’oia—i teienei rā tei reira mau ’oia. Te mahana rahi roa ’ino ! ’Ua tae mai te Atua e taui i te mau pō pōiri ato’a ’ei po’ipo’i māramarama » (Christ and the New Covenant [1997], 250–51).
Mau mana’o nō tā ’oe iho tuatāpapara’a pāpa’ira’a mo’a
’O Iesu Mesia te māramarama o te ao nei.
’Ua ’ite paha ’oe ē, ’ua parau ’e ’ua parau-fa’ahou-hia te mau tumu parau e au i te pōiri ’e te māramarama—i te pae tino ’e i te pae vārua—i roto i te 3 Nephi 8–11. E aha tā ’oe i ha’api’i mai i roto i teie mau pene nō ni’a i te pōiri ’e te māramarama pae vārua ? E aha tē hōpoi nei i te pōiri i roto i tō ’oe orara’a ? E aha tē hōpoi nei i te māramarama ? I tō ’oe mana’o, nō te aha te Fa’aora i mā’iti ai e fa’a’ite iāna iho ’ei « māramarama ’e te ora o te ao nei »? (3 Nephi 9:18; 11:11). E mea nāhea Iesu Mesia i te rirora’a ’ei māramarama i roto i tō ’oe orara’a ?
Mai te mea e tātarahapa vau, e ha’aputu, e pāruru ’e e fa’aora te Fa’aora iā’u nei.
I tō ’oe mana’o e aha te mana’o o te mau ta’ata i muri mai i te ’itera’a i te ha’amoura’a ’e te pōiri i fa’a’itehia i roto i te 3 Nephi 8 ? I tō ’oe mana’o e aha tō rātou mana’o i te fa’aro’ora’a rātou i te reo o te Fa’aora i te paraparaura’a nō ni’a i te māramarama ’e te aroha ’e te tāra’ehara i roto i te mau pene 9 ’e te 10?
Noa atu ā ’ua parau atu te Fa’aora ē, e fa’ahope’ara’a te ha’amoura’a ri’ari’a nō te mau hara o te ta’ata, ’ua parau ato’a rā ’oia ē, e fa’aora ’oia i te feiā e ho’i mai iāna ra ma te tātarahapa (hi’o 3 Nephi 9:2, 13). ’Ua parau ta’a ’ē Elder Neil L. Andersen ē : « ’Ua māere au i te rima hā’ati aroha o te Fa’aora ’e te here nō te ta’ata tātarahapa, noa atu e aha te huru o te hara i tātarahapahia. Tē fa’a’ite pāpū nei au ē e nehenehe ē e hina’aro rahi mau tō te Fa’aora i te fa’a’ore i tā tātou mau hara »(« ’A tātarahapa… ’ia fa’aora vau ia ’outou », Ensign ’aore rā Liahona, Novema 2009, 40).
E mā’imi i roto i te 3 Nephi 9–10 i te mau fa’a’itera’a nō te aroha o te Mesia ’e nō tōna hina’aro e fa’a’ore i te hara. ’Ei hi’ora’a, e aha tā ’oe e ’ite ra i roto i te 3 Nephi 9:13–22 ’e te 10:1–6 e tauturu nei ia ’oe ’ia putapū i te here ’e te aroha o te Fa’aora ? E feruri i te mau taime ’ua putapū ’oe iāna i te « ha’aputu » ’e i te « fa’a’amu » ia ’oe (hi’o 3 Nephi 10:4). E nehenehe e pāpa’i i te reira mau ’ohipa i roto i te hō’ē buka ’ā’amu ’aore rā e fa’a’ite i te reira i te feiā tā ’oe i here.
E ti’a iā’u ’ia ha’api’i ’ia fa’aro’o ’e ’ia māramarama i te reo o te Atua.
’Ua tupu a’enei tō ’oe mana’o ē, tē fifi ra ’oe i te māramarama i te hō’ē poro’i tā te Atua e fa’atae ra ia ’oe ? Penei a’e e nehenehe te ’ohipa i tupu nō te mau ta’ata i roto i te 3 Nephi 11:1–8 e tauturu ia ’oe ’ia māramarama i te tahi mau parau tumu nō te fa’aro’ora’a ’e te māramaramara’a i te reo o te Atua. E nehenehe ’oe e tāpa’o i te huru o te reo o te Atua tā te ta’ata i fa’aro’o ’e te mea ho’i tā rātou i rave nō te māramarama i te reira. Nāhea teie fa’ati’ara’a e tano ai i tā ’oe mau tauto’ora’a nō te fa’aro’o ’e nō te ta’a i te reo o te Atua i roto i tō ’oe orara’a nā roto i tā ’oe iho heheura’a ?
Tē tītau manihini nei Iesu Mesia iā’u ’ia roa’a tō’u iho nei ’itera’a pāpū nōna.
E 2 500 ti’ahapa ta’ata tei putuputu i Bounetifula i te fāra’a mai Iesu Mesia (hi’o 3 Nephi 17:25). Noa atu ā tō rātou nūmera rahi, ’ua tītau manihini te Fa’aora ia rātou tāta’itahi ’ia haere « ta’ihō’ē » mai e fāfā i te mau puta i tōna nā rima ’e i tōna nā ’āvae (3 Nephi 11:14–15). E aha te mana’o e tae mai ia ’oe nō ni’a i te faufa’a rahi e fāri’i i tāna iho ’ohipa patu fa’aro’o ia Iesu Mesia ? Mai te aha te Fa’aora e tītau manihini nei ia ’oe ’ia « ti’a mai i ni’a, ’e e ha’afātata mai » iāna ra? (3 Nephi 11:14). E aha te mau ’ohipa i tupu tei ha’anoa’a ia ’oe i te ’ite ē, ’o ’oia tō ’oe Fa’aora ? E nehenehe ato’a e feruri nāhea te hi’ora’a o te Fa’aora i roto i teie mau ’īrava e fa’auru nei i tā ’oe mau tauto’ora’a nō te tāvini iāna.
Ta’ihō’ē, nā Walter Rane
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.
3 Nephi 8–9
Nō te tauturu i tō ’outou ’utuāfare ’ia fa’aau ia rātou i te mau ’ohipa e fa’ahitihira ra i roto i te 3 Nephi 8–9, e nehenehe e fa’ati’a fa’ahou ā ’aore rā e fa’aro’o i te tahi tuha’a nō te mau haruharura’a o teie mau pene i roto i te hō’ē piha pōiri. E ’āparau e aha ra ïa te fa’aea-noa-ra’a i roto i te pōiri e toru mahana. I muri mai e nehenehe e paraparau nō ni’a nāhea ’o Iesu Mesia e riro ai ’ei « māramarama… o te ao nei » (3 Nephi 9:18).
3 Nephi 10:1–6
E ti’a i te hōho’a nō te moa e ha’aputuputu nei i tāna mau fanau’a ’ia riro ’ei rāve’a ha’api’ira’a pūai nō te tauturu i te mau tamari’i ’ia māramarama i te huru o te Fa’aora ’e tāna misiōni. E nehenehe tā ’oe e tai’o i teie mau ’īrava ’a ’imi ai tō ’outou ’utuāfare i te hōho’a nō te hō’ē moa ’e tāna mau fanau’a. Nō te aha te moa e ha’aputuputu ai i tāna mau fanau’a ? Nō te aha te Fa’aora e hina’aro ai e ha’aputuputu ia tātou i pīha’i iho iāna ? E aha te nehenehe e tupu ’ia mā’iti te hō’ē fanau’a ’eiaha e ha’aputuputu mai ’ia pi’ihia ’oia ?
3 Nephi 11:1–7
Penei a’e e nehene e tai’o vetahi o teie mau ’īrava nā roto i te reo marū ’e te « iti ha’iha’i » (3 Nephi 11:3). E aha tei tītauhia i te ta’ata ’ia rave nō te māramarama i te reo nō te ra’i mai ? E aha tā tātou e ’apo mai i roto i te ’ohipa tei tupu nō rātou ?
3 Nephi 11:21–38
Tē fa’aineine ra ānei te hō’ē i roto i te ’utuāfare ’ia bāpetizohia ? E nehenehe te tai’ora’a i te 3 Nephi 11:21–38 e tauturu ia rātou ’ia fa’aineine. E mea nāhea te ferurira’a i te mau ha’api’ira’a a te Fa’aora i roto i teie mau ’īrava e ti’a ai i te tauturu i te mau melo o te ’utuāfare tei bāpetizohia a’enei ?
3 Nephi 11:29–30
E aha tā teie mau ’īrava e haʼapiʼi mai nei ia tātou nō niʼa i te mārōra’a ? Nāhea tātou ’ia « fa’aru’ehia » te mārōra’a i roto i tō tātou ’utuāfare? (3 Nephi 11:30).
Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.
Ha’amaita’i i tā ’oe iho tuatāpapara’a pāpa’ira’a mo’a
Tāpa’o i te mau mana’o e tae mai. ’Ua nā ’ō Elder Richard G. Scott : « Te ’ite i tāpa’o-maita’i-hia e ’ite ïa e vai noa mai i te taime e hina’arohia… [Nā te tāpa’ora’a i te mau mana’o e tae mai] e fa’ati’a ia ’oe ’ia fāri’i i te tahi atu ā māramarama » (« Acquiring Spiritual Knowledge »,, Ensign, Nov. 1993, 88).
Hō’ē tīa’i māmoe, nā Howard Lyon