te ataeinnaine e koroboki iaon te burakibooti

Karekean Kainnanoia Ataei aika a Uarereke

Ataei a tauraoi ao a ingainga n reiakina te euangkerio ngkana e karaoaki n te aro are a kona n oota iai. Riki ngkana ko reireiniia ataei ake a uarereke riki, iangoa kabonganaan te aekaki ni waaki ni kakukurei are e na buokiia n reirei mai iai.

• Anene. Anene n taromauri ao anene man Aia Boki n Anene Ataei anga reirei ma te mwaaka. Kabongana te intekiti ibukin atuun te rongorongo mai buki n aia Boki n Anene Ataei ni kakaei anene ake a irekereke ma reirein te euangkerio ake ko anga reirei iaona. Buokiia ataei ni karekerekea te rongorongo ma te anene nakon maiuia. Te katoto, ko kona n anga titiraki iaon taeka ke kibun te kuna. N raona te anene, ataei a kona ni karaoi mwakuri ake a airi ma te anene ke ti ongora n te anene bwa e tang mai buki ngkai a karaoi waaki ni kakukurei.

• Ongora nakon ke karaoa te kaotioti man te karaki. Ataei aika a uarereke a tatangiri karaki—man booki aika a tabu, man maium, man rongorongon te Ekaretia, ke man ana maekatiin te Ekaretia. Taratarai kawai ake ko na karekerekeia iai inanon te karaki. A kona n taui tamnei ke bwaai, korea tamnein te bwai are a ongora, karaoi kaotioti, ni buoka karakinan te karaki. Buokiia ataei n ataa koauan te euangkerio inanon karaki ake ko karakini.

• Wareki koroboki aika tabu. Ataei aika a uarereke a aki bati ni wareware, ma ko kona naba ni katabeia bwa a na reirei man koroboki aika tabu. Tao ko na riai ni kabotoa am iango iaon te kibu teuana, kibuntaeka, ke te taeka. Ngkai ko wareka te kibu ni kabaibati, ko kona ni kaoiia ataei bwa a na teirake ke n tabeki baia ngkana a ongo te taeka ae onoti ke te kibu are ko tangiria ni kabotoa am iango iaona. A kona naba ni kamatenanoi kibuntaeka aika kimototo man koroboki aika a tabu ngkana a kaokiokia tabeua te tai. Ngkai a ongo ana taeka te Atua, a na namakina te Tamnei.

• Ko na rangi ni kakamwakuri. Ibukina bwa ataei aika a tabe n rikirake n tabetai a rangi n takaremwa, bairei kawai bwa a na kona ni kakamwakuri—mwaati, kibakiba, tie, kabwaouaia, nakonako, ao mwakuri riki ake a kona ni kairekerekea nakon reirei ke karaki ake ko reireiniia. Mwakuri aikai a kona naba n rangi n nakoraoi ngkai kam ikotaki n anene.

• Matakuakin tamnei ke mataku n te witeo. Ngkana ko kaota te tamnei nakoia ataei ke witeo ake a irekereke ma reirein te euangkerio ke karaki man koroboki aika tabu, anganiia titiraki ake a kona n reiakinna man bwaai ake a noori. Te katoto, ko kona n titiraki, “Tera ae e riki n te tamnei aei ke te witeo?” ke “Tera am namakin iai?” Te Gospel Library app, medialibrary.ChurchofJesusChrist.org, ao children.ChurchofJesusChrist.org bon tabo aika raraoi ibukin witeo.

• Tibwai taneiai. Ataei aika a uarereke a kona ni karako mwaitin ae a na tibwauaia n aroia ataei ake a ikawai, ma ngkana ko anganiia kairi aika onoti, a kona n tibwaua aia namakin ao aia taneiai iaon te bwai are a reiakinna.

• Karaobwai. Ataei a kona ni kateitei, korotamnei, ke ni karana te bwai are e irekereke ma te karaki ke reirei ake a reikinii. Kaungaia bwa a na uota te bwai are a karaoi nakon mweengaia ao n tibwaia ma kaain aia utu ni buokiia ataei n uringi bwaai ake a tia n reiakin.

• Irii botoniango n te reirei. Te botoniango ae bebete e kona ni buokiia ataei ni kaotaia n reirein te euangkerio are e kaangaanga ataakina. Ngkana e kabongnaaki botoniango n reirei, kakaei kawai n anganiia ataei bwa a na irii. A reiakina ae mwaiti riki man te taneiai are a karaoi nakon are a ti mataku ni karaoana.

• Kaotioti. Ngkana a karaoi kataneiai ataei ni baika a kona n riki are a kona ni kaitarai ni maiuia, a na kona n oota riki bwa a kanga reirein te euangkerio ni uaana nakon maiuia.

• Kaokioki waaki ni kakukurei. Ataei aika a uarereke a na kainnanoia n ongoraeakin iango tabeua te tai bwa a aonga n oota iai. Tai maaku ni kaokioki karaki ke waaki ni kakukurei ni katoatai, riki inanon te reirei are ko a tia n reirei iaona. Te katoto, ko kona ni tibwa te karaki man koroboki aika a tabu tabeua te tai ni kawai aika a kakaokoro n tain te anga reirei—man warekan koroboki aika a tabu, kakimototoi n oin am taeka, kaotan te witeo, anganiia ataei bwa a na buoka te karaki, kaoiia bwa a na karaoa nanon te karaki, ao a mwaiti riki. Ngkana te waaki ni kakukurei are e karaoaki n te kiraati e karaoaki naba n te mweenga, okiokirana e na buokiia ataei n reiakin ao n uringnga.

• Kairekerekeko ma tabeman. Ataei a karikirakei aia konabwai n reitaki ao n angin te tai a kukurei n reirei ao n takakaro ma aika roroia. Karekei aia tai bwa a na tibwatibwa, onomwi, ao n reitaki ngkai a reirei.

• Karaoi waaki ni kakukurei aika a kakaokoro. Ataei aika a uarereke n etina e uarereke aia tai ni kakauongo, ao a kakaokoro aron reiakinaia. Kabonganai waaki ni kakukurei aika kakaokoro, ao taratarai kanikina are te ataei e kainnanoa te bitaki ni birin bwaai. Te katoto, ko kona ni kainnanoia ni bibitaki ni katoatai imarenan te kainabwabu ao waaki aika maiureirei.

Mwakoron tibwangam ngkai aia tia reirei ataei—n raonaki ma te anga reirei iaon reirein te euangkerio—bon buokaia ataei n reiakina aroia aika a raraoi inanon te kiraati n te Taromauri. Te katoto, a kona ni kainnanoia bwa a na reireinaki taekan te ikaruoruo, tibwatibwa, karineaia tabeman, ao a mwaiti riki. Tabeman taan reirei a karaoi tiati ma tibwangaia ataei n tatabemaniia bwa a na karaoi n te kiraati n te kawai ae onoti (n aron are te tataro, tauan tamnei, ke tibwatibwaan beeba). Mwakuri aika a na karaoaki a kona ni bibitaki ni katoa wiiki. Aio e buokiia ataei n onomwi ao ni kabotoa aia iango iaon anua aika a raraoi n te umwanreirei.

Ataei—riki ataei aika a uarereke riki—n tabetai a rangi ni buokaki riki ni bwaai aika okioki, waaki ake a kaman atai. Ibukina bwa ataei aika a uarereke e uarereke aia tai ni kan ongora ao n tabetai e kaangaanga bwa a na kona ni kakauongo inanon tain te kirati ni karokoa e bane, e tamaroa riki bwa e na kakaraoaki te bitaki man te waaki ni kakukurei teuana nakon teuana. Te katoto, bwaai aika ko kakaraoi n am kiraati e kona n rin inanona te motirawa ae uarereke ibukin te takakaro ae uarereke, karanakin te tamnei, anenei kuuna, ao a mwaiti riki.

ataei a takakaro ma taan reirei