Unang Tudling, ni James Taylor Harwood

Mayo 17–23

Doktrina ug mga Pakigsaad 51–57

“Matinud-anon, Makiangayon, ug Maalamon nga Tinugyanan”

Agig dugang sa mga ideya nga gisugyot dinhi, ang Espiritu moaghat kaninyo sa pagtutok sa laing butang gikan sa Doktrina ug mga Pakigsaad 51–57 nga importante alang sa mga bata nga imong gitudloan.

Irekord ang Imong mga Impresyon

Dapita ang Pagpaambit

Tuguti ang mga bata kinsa gusto nga mopakigbahin og butang nga ilang nakat-unan nga mokuha og numero gikan sa usa ka sudlanan aron matino ang han-ay nga sila mopakigbahin.

Itudlo ang Doktrina: Mas Gagmay nga mga Bata

Doktrina ug mga Pakigsaad 51:9

Mahimo akong magmatinuoron.

Daghang gagmay nga mga bata nagkat-on gihapon unsay ipasabut sa pagsulti sa kamatuoran. Ikonsiderar unsaon nimo sa paglig-on sa kaimportante sa pagsulti ug paglihok sa matinuorong paagi.

Posible nga mga Kalihokan

• Basaha ngadto sa mga bata ang Doktrina ug mga Pakigsaad 51:9: “Tuguti nga ang matag tawo makig-angay sa matinuoron nga paagi” (tan-awa usab sa Ang mga Artikulo sa Hugot nga Pagtuo 1:13). Pangutan-a ang mga bata kon sila nakahibalo ba unsay gipasabut nga magmatinuoron. Aron matabangan sila nga mas makasabut, hatagi sila og mga ehemplo sa mga aksyon nga matinuoron.

• Ipakigbahin ang pipila ka yanong mga istorya sa mga bata kinsa nag-atubang og mga desisyon mahitungod sa pagkamatinuoron, sama sa desisyon sa pagdawat nga sila nakahimo og butang nga sayop. Gamita ang mga litrato, mga medyas nga puppet, o mga papel nga monyeka aron mas maikagon ang mga istorya. Pangutan-a ang mga bata kon kini nga mga tawo matinuoron ba o dili matinuoron.

• Kantaha ang awit mahitungod sa pagkamatinuoron, sama sa “Barugan ang Kamatuoran” (Songbook sa mga Bata, 81). Ihatag ang imong pagpamatuod mahitungod kon ngano nga importante nga magmatinuoron.

Doktrina ug mga Pakigsaad 52:10; 53:3; 55:1

Ang gasa sa Espiritu Santo madawat pinaagi sa pagpandong sa mga kamot.

Ang pagdawat sa Espiritu Santo pinaagi sa pagpandong sa mga kamot gihisgutan sa makadaghang higayon sa Doktrina ug mga Pakigsaad 51–57. Kini usa ka maayong oportunidad sa pagtudlo sa mga bata mahitungod niini nga ordinansa.

Posible nga mga Kalihokan

• Ipakita ang usa ka litrato sa usa ka bata nga gikumpirmahan (tan-awa sa Libro sa mga Hulagway sa Ebanghelyo, nu. 105). Dapita ang mga bata sa paghulagway unsay nahitabo sa litrato. Hangyoa sila sa pagpakpak sa ilang mga kamot kon sila makadungog sa “pagpandong sa mga kamot” o “magpandong sa mga kamot” samtang imong basahon ang usa o daghan sa mosunod nga mga bersikulo: Doktrina ug mga Pakigsaad 52:10; 53:3; 55:1.

• Sultihi ang mga bata sa dihang ikaw nakadawat sa gasa sa Espiritu Santo pinaagi sa pagpandong sa mga kamot human ikaw mabunyagi. Tabangi ang mga bata nga magtinguha sa pagdawat niini nga gasa sa ilang kaugalingon. Hisguti uban nila ang mga paagi nga kita makadapit sa Espiritu sa atong kinabuhi.

• Kantaha ang “Ang Espiritu Santo” (Songbook sa mga Bata, 56) o susama nga kanta. Ipasabut ang hugpong sa mga pulong nga nagtudlo mahitungod sa gasa sa Espiritu Santo.

  

  Paghulagway sa usa ka batang lalaki nga gikumpirmahan ni Dan Burr

Doktrina ug mga Pakigsaad 54:4–6

Kinahanglan nga akong tumanon kanunay ang akong mga saad.

Si Leman Copley nakigsaad nga tugutan ang mga Santos gikan sa Colesville, New York, nga mopuyo sa yuta sa Ohio. Apan sa nakaabut na sila, wala niya tumana ang iyang saad ug mipabiya kanila.

Posible nga mga Kalihokan

• Ipakigbahin ngadto sa mga bata unsay nahitabo sa mga Santos nga miabut aron mopuyo sa yuta ni Leman Copley (tan-awa sa ulohan nga seksyon sa Doktrina ug mga Pakigsaad 54; tan-awa usab sa “Kapitulo 21: Ang Propeta Miadto sa Missouri,” Mga Istorya sa Pagtulun-an [Doktrina] ug mga Pakigsaad, 81–83). Tabangi sila sa pagkonsiderar kon unsa kaha ang gibati sa mga Santos sa dihang si Leman wala motuman sa iyang saad.

• Tungaa sa paggunting ang papel nga kasingkasing, ug ihatag ang matag tunga ngadto sa duha ka lain-laing bata. Hangyoa sila sa paggunit sa ilang katunga nga magsumpay aron mahimong tibuok nga kasingkasing. Papulipuliha ang mga bata sa paggunit sa bahin sa kasingkasing. Tabangi ang mga bata sa pagtandi niini ngadto sa saad o mga pakigsaad nga atong gihimo sa Dios. Ang Dios kanunay nga motuman sa Iyang bahin sa pakigsaad kon kita motuman sa atoa.

• Pahinumdumi ang mga bata nga kon sila mabunyagan, sila makigsaad, o mosaad, sa pagsunod sa mga sugo sa Dios. Basaha ngadto kanila ang Doktrina ug mga Pakigsaad 54:6 giunsa sa pagpanalangin sa Ginoo ang katawhan kinsa nagtuman sa ilang mga pakigsaad.

Itudlo ang Doktrina: Mas Dagko nga mga Bata

Doktrina ug mga Pakigsaad 51:19; 55

Akong magamit ang mga panalangin nga gihatag sa Dios kanako sa pagpanalangin sa uban.

Ang Ginoo mihatag sa matag usa kanato og mga gasa ug mga panalangin nga atong magamit sa pagtukod sa Iyang gingharian.

Posible nga mga Kalihokan

• Tagoi ang mga pulong “matinud-anon,” “makiangayon,” ug “maalamon” libut sa kwarto. Dapita ang mga bata sa pagpangita sa mga pulong diha sa kwarto ug dayon pangitaon kini diha sa Doktrina ug mga Pakigsaad 51:19. Basaha pagdungan ang bersikulo, ug hisguti kon unsay gipasabut nga mahimong usa ka tinugyanan. Kon gikinahanglan, basaha pagdungan ang unang parapo sa “Tinugyanan, Pagkatinugyanan” diha sa Giya ngadto sa mga Kasulatan (scriptures.ChurchofJesusChrist.org).

• Sultihi ang mga bata mahitungod ni William W. Phelps, kinsa usa ka tigmantala og pamantalaan sa wala pa makadungog sa ebanghelyo ug makabalhin ngadto sa Kirtland. Hangyoa ang mga bata sa pagbasa sa Doktrina ug mga Pakigsaad 55:1–4 ug ilista unsa ang gusto sa Dios nga buhaton ni William. Hain niining mga butanga ang magamit natong tanan, ug hain ang alang lang ni William tungod sa iyang mga talento? Hangyoa ang mga bata sa pag-ila sa mga talento nga ilang makita sa usag usa, ug sa paghisgot unsaon nila sa paggamit kadto nga mga talento aron makaserbisyo sa Dios ug sa Iyang mga anak.

Doktrina ug mga Pakigsaad 52:14–19

Ang Dios adunay sumbanan sa pagtabang nako nga dili ko malimbungan.

Niini nga mga bersikulo, ang Ginoo mihatag og usa ka sundanan aron “nga [kita] dili malimbungan” (Doktrina ug mga Pakigsaad 52:14) pinaagi sa mini nga mga magtutudlo ug mga mensahe.

Posible nga mga Kalihokan

• Ipakita sa mga bata ang ehemplo sa usa ka sundanan (sama sa usa ka sumbanan sa pagtahi og mga sinina o paghimo og bisan unsa), ug hisguti ngano nga ang mga sundanan makatabang. Aron matabangan ang mga bata nga makat-on mahitungod sa usa ka sundanan gikan sa Ginoo, isulat diha sa pisara ang mga pulong sama sa Siya nga , ang mao , Siya nga mahimo nga , ug Siya nga wala . Dapita ang mga bata sa pagbasa sa Doktrina ug mga Pakigsaad 52:15–18 ug isulat diha sa mga blangko. Ngano nga kini nga sundanan makatabang nato? (tan-awa sa mga bersikulo 14, 19).

• Pagdrowing og butang nga yano, ug dapita ang mga bata sa pagsunod sa imong sundanan aron makahimo og sama nga drowing. Dayon suhira uban nila ang sundanan sa Ginoo nga narekord sa Doktrina ug mga Pakigsaad 52:14–19.

Doktrina ug mga Pakigsaad 54

Akong tumanon kanunay ang akong mga pakigsaad.

Bisan og ang atong mga pakigsaad personal, ang atong pagkamatinud-anon sa pagtuman niini makaapekto sa kinabuhi sa uban. Ang istorya ni Leman Copley ug sa mga Santos sa Colesville, New York, naghulagway niini nga kamatuoran.

Posible nga mga Kalihokan

• Ipakigbahin sa mga bata unsay nahitabo sa dihang ang mga Santos gikan sa Colesville, New York, mipuyo sa yuta ni Leman Copley (tan-awa sa ulohan nga seksyon sa Doktrina ug mga Pakigsaad 54; tan-awa usab sa “Kapitulo 21: Ang Propeta Miadto sa Missouri,” Mga Istorya sa Pagtulun-an [Doktrina] ug mga Pakigsaad, 81–82). Unsay bation nga kamo usa niadtong mga Santos ug nakahibalo nga si Leman wala motuman sa iyang pakigsaad sa pagpakigbahin sa iyang yuta? Unsa ang gitudlo niini nga istorya kanato mahitungod sa pagtuman sa atong mga pakigsaad? Basaha pagdungan ang Doktrina ug mga Pakigsaad 54:6 aron makahibalo sa panalangin nga ihatag sa Ginoo niadtong kinsa motuman sa ilang mga pakigsaad.

• Pahinumdumi ang mga bata sa mga pakigsaad nga ilang nahimo sa dihang sila gibunyagan (tan-awa sa Mosiah 18:8–10). Tabangi sila nga maghunahuna og mga paagi nga sila nagtuman niadto nga mga pakigsaad, ug tabangi sila nga makakita sa unsa nga paagi kini makaandam nila sa paghimo og dugang nga mga pakigsaad sa umaabut.

Awhaga ang Pagkat-on diha sa Panimalay

Kon ang mga bata ingon og nalingaw sa usa sa mga kalihokan karon, isugyot nga ilang balikon kana nga kalihokan didto sa panimalay uban sa ilang mga pamilya.

Pagpalambo sa Atong Pagtudlo

Buhata ang imong gitudlo. Ang imong pagtudlo mahimong mas gamhanan kon ikaw makapamatuod gikan sa personal nga kasinatian mahitungod sa mga panalangin sa pagpuyo sa ebanghelyo. Samtang ikaw magpili og mga baruganan nga itudlo sa mga bata, palandungi unsaon nimo nga masunod sa mas hingpit kadto nga mga baruganan. (Tan-awa usab sa Pagtudlo sumala sa Pamaagi sa Manluluwas, 13–14.)