Independence, Missouri, ni Al Rounds

Mayo 24–30

Doktrina ug mga Pakigsaad 58–59

“Matinguhaon nga Moapil diha sa Usa ka Maayo nga Katuyoan”

Samtang magbasa ka sa Doktrina ug mga Pakigsaad 58–59, irekord ang espirituhanong mga impresyon nga imong nadawat. Kini nga mga impresyon makatabang nimo sa pagplano sa pagtudlo sa doktrina nga inyong nakat-unan ngadto sa mga bata. Mahimong ikaw makakita usab og mga ideya niini nga outline sa leksyon, sa Dali, Sunod Kanako—Alang sa mga Indibidwal ug mga Pamilya, o sa mga magasin sa Simbahan.

Irekord ang Imong mga Impresyon

Dapita ang Pagpaambit

Dapita ang pipila ka bata sa pagpakigbahin og butang nga ilang gihimo atol sa semana aron makat-on gikan sa mga kasulatan.

Itudlo ang Doktrina: Mas Gagmay nga mga Bata

Doktrina ug mga Pakigsaad 58:27–28

Ang Langitnong Amahan mihatag nako og gahum sa pagpili.

Tabangi ang mga bata nga makahibalo nga ang Langitnong Amahan gusto nga kita mohimo og maayong mga pagpili nga makahatag og mga kalipay sa atong kinabuhi ug sa uban.

Posible nga mga Kalihokan

• Basaha ang mga pulong sa Doktrina ug mga Pakigsaad 58:27–28 aron matabangan ang mga bata nga makasabut nga sila makapili sa pagbuhat og maayo. Pagbutang og malipayon nga nawong sa usa ka bahin sa kwarto ug masulub-on sa pikas bahin. Unsay atong bation kon kita mopili sa pagbuhat og maayo? Paghulagway og daghang mga sitwasyon sa maayo o dili maayo nga pagpili alang sa matag usa. Human makahulagway sa matag sitwasyon ug pagpili, hangyoa ang mga bata sa pagbarug tupad sa malipayon nga nawong kon ang pagpili maayo ug tupad sa masulub-on nga nawong kon kini dili maayo.

• Ipakita sa mga bata ang usa ka sudlanan sa daghang nagkalain-laing mga kolor sa mga krayola. Ipakita kanila ang ikaduhang sudlanan nga dunay usa lang ka krayola. Hangyoa ang mga bata hain niini nga mga sudlanan ang gusto nilang gamiton. Ngano? Ipasabut nga aron makahimo sa pagpili usa ka panalangin gikan sa Langitnong Amahan. Ipamatuod nga ang Langitnong Amahan ug si Jesukristo nahigugma kanato ug gusto nga kita mohimo og maayong mga pagpili.

• Sultihi ang mga bata mahitungod sa usa ka panahon sa dihang ikaw mihimo og maayo nga pagpili, ug ihulagway unsay imong gibati pagkahuman. Dapita ang mga bata sa pagdrowing og litrato sa imong istorya o sa istorya sa ilang kaugalingon. Dayon tuguti sila nga mopakigbahin sa ilang mga litrato uban sa klase ug mosulti unsay ilang nakat-unan gikan sa istorya.

Doktrina ug mga Pakigsaad 59:7

Ang Langitnong Amahan gusto nga ako mapasalamaton.

Unsaon nimo pagtabang sa mga bata nga makasabut sa kaimportante sa pagpasalamat sa Langitnong Amahan alang sa ilang mga panalangin?

Posible nga mga Kalihokan

• Sultihi ang mga bata sa butang nga ikaw mapasalamaton, ug hangyoa sila sa pagpakigbahin sa mga butang nga sila mapasalamaton. Basaha ang Doktrina ug mga Pakigsaad 59:7, ug tabangi ang mga bata nga maghunahuna og mga paagi nga sila makapasalamat sa Langitnong Amahan alang sa ilang mga panalangin. Unsa ang ilang mabuhat nga dad-on sa panimalay aron mapahinumduman sila sa pagpasalamat sa Langitnong Amahan alang sa ilang mga panalangin?

• Kantaha pagdungan ang awit mahitungod sa pasalamat, sama sa “Sa Kahimsog ug Kalig-on” (Songbook sa mga Bata, 18). Dapita ang mga bata sa pagpuli sa mga pulong sa kanta sa ubang mga butang nga sila mapasalamaton.

• Tuguti ang mga bata sa pagdrowing og mga litrato sa mga butang nga sila mapasalamaton.

Doktrina ug mga Pakigsaad 59:9–12

Ang Igpapahulay mao ang adlaw sa Ginoo.

Samtang imong ipakigbahin ang kalipay nga imong naangkon tungod sa pagbalaan sa Igpapahulay nga adlaw, ikaw makatabang sa mga bata nga makakita sa Igpapahulay isip adlaw nga kita mosimba sa Ginoo.

Posible nga mga Kalihokan

• Pagdala og mga litrato o mga butang nga nagpakita sa maayong mga butang nga atong mahimo sa Dominggo sa pagsimba sa Ginoo ug pagpangita og kalipay. Ang pipila ka ideya makita sa Doktrina ug mga Pakigsaad 59:9–12 ug “Pagtuman sa Adlaw nga Igpapahulay” (Alang sa Kalig-on sa Kabatan-onan, 30–31). Sama pananglit, sa pagrepresentar sa sakramento, mahimo nimong ipakita ang litrato 108 sa Libro sa Hulagway sa Ebanghelyo o usa ka kopa sa sakramento ug piraso sa pan. Sa unsa nga paagi nga matag usa niining mga butanga makatabang nato nga mas mahiduol sa Langitnong Amahan ug ni Jesukristo panahon sa Igpapahulay?

• Kompletuha ang pahina sa kalihokan niining semanaha uban sa mga bata aron sa paghatag nila og mga ideya sa paghimo sa Igpapahulay nga usa ka balaan nga adlaw.

  

  Ang pag-ambit sa sakramento makatabang nato sa pagpasidungog sa Igpapahulay nga adlaw.

Itudlo ang Doktrina: Mas Dagko nga mga Bata

Doktrina ug mga Pakigsaad 58:27–28

Ang kabubut-on mao ang gahum sa pagpili.

Ang Dios mihatag nato og gahum sa pagpili, ug uban niana nga gahum kita “magpahinabo sa daghan nga pagkamatarung” (bersikulo 27). Unsaon nimo sa pagtabang sa mga bata nga imong gitudloan nga makakita nga bisan adunay kadautan sa kalibutan, “ang gahum anaa kanila” nga “nagbuhat sa maayo”? (bersikulo 28).

Posible nga mga Kalihokan

• Ipakita sa mga bata ang usa ka piraso sa papel nga adunay pulong nga pagpili nga gisulat sa usa ka bahin ug ang pulong sangputanan gisulat sa pikas bahin. Ipasabut nga ang mga pagpili adunay mga sangputanan, o mga resulta nga natural nga mosnod ang mga buhat. Dapita ang usa ka bata sa pagpunit sa papel sa pagpakita nga kon ikaw mopunit sa papel, ikaw makakuha sa pagpili ug sa sangputan niana nga pagpili. Hangyoa ang usa ka bata sa pagbasa sa Doktrina ug mga Pakigsaad 58:27–28. Unsa nga mga pagpili ang atong mahimo nga “magpahinabo sa daghan nga pagkamatarung” o maayong mga sangputanan? (bersikulo 27). Kanus-a kita nakahimo og maayong mga pagpili nga adunay mga sangputanan nga nakapanalangin sa uban?

• Isulat ang mga pulong gikan sa Doktrina ug mga Pakigsaad 58:27–28 diha sa gilis sa papel, ug hatagi og usa ang matag bata. Dapita sila sa pagbasa sa mga bersikulo sa hilom ug mamalandong sa ilang mga pulong. Dapita ang mga bata sa paglingkod sa han-ay nga makita ang ilang mga pulong diha sa mga bersikulo 27–28 ug mopakigbahin sa usag usa unsay ilang nakat-unan. Unsa ang mensahe sa Ginoo kanato niini nga mga bersikulo?

• Kantaha ang awit mahitungod sa mga pagpili, sama sa “Pilia ang Matarung” (Mga Himno, no. 146). Pangutana aron matabangan ang mga bata nga mamalandong sa mga pulong sa kanta—pananglit, Kinsa ang motabang sa paggiya ninyo sa paghimo og matarung nga pagpili? Kinsa ang mopahimo ninyo og sayop nga mga pagpili? Unsay imong bation kon mopili og matarung?

Doktrina ug mga Pakigsaad 59:9–16

Ang Igpapahulay mao ang adlaw sa Ginoo.

Ang Ginoo miingon nga ang pagsunod sa Igpapahulay makatabang nato nga “moamping sa [atong] mga kaugalingon nga walay buling gikan sa kalibutan” (Doktrina ug mga Pakigsaad 59:9). Unsaon nimo sa pagtabang sa mga bata nga imong gitudloan sa pagtahud sa Igpapahulay ug mohimo niini nga timailhan sa ilang gugma alang sa Langitnong Amahan ug ni Jesukristo?

Posible nga mga Kalihokan

• Dapita ang mga bata sa pagbasa sa Doktrina ug mga Pakigsaad 59:9–16 nga magpares, ug hangyoa ang matag pares sa pagsulat og butang nga ilang nakat-unan mahitungod sa Igpapahulay nga adlaw gikan sa matag bersikulo. Human sa pipila ka minuto, hangyoa ang matag pares sa pagpakigbahin uban sa klase unsay ilang gisulat. Unsay buhaton nato nga lahi sa Igpapahulay tungod sa unsay atong nakat-unan?

• Pag-andam og yanong matching game diin ang mga bata mopatukma sa mga pulong gikan sa Doktrina ug mga Pakigsaad 59:9–16 ngadto sa sakto nga bersikulo. Pagpili og mga pulong nga nagtudlo unsa ang gusto sa Ginoo nga atong buhaton sa Igpapahulay. Hisguti unsa ang gitudlo niini nga mga pulong mahitungod sa adlaw sa Ginoo ug unsaon nato nga mas mahiduol ngadto Kaniya.

• Ang Igpapahulay nga adlaw mao “ang adlaw sa Ginoo” (Doktrina ug mga Pakigsaad 59:12)—usa ka adlaw sa pagpakita nga kita mahinumdom sa daghang mga buhat sa Ginoo samtang kita magsimba Kaniya (tan-awa sa Giya ngadto sa mga Kasulatan, “Igpapahulay”). Tabangi ang mga bata nga mamalandong niini nga mga buhat pinaagi sa pagdapit kanila sa pagbasa sa mosunod nga mga tudling sa kasulatan ug sa pagpakita nila kalabut sa mga litrato: Genesis 2:1–3 (tan-awa sa Libro sa Hulagway sa Ebanghelyo, nu. 3); Juan 20:1–19 (tan-awa sa Libro sa Hulagway sa Ebanghelyo, nu. 59). Unsa ang ubang talagsaong mga buhat sa Ginoo nga atong mahinumduman sa Igpapahulay? Unsa pay atong makat-unan mahitungod sa Igpapahulay gikan sa Doktrina ug mga Pakigsaad 59:9–16?

Awhaga ang Pagkat-on diha sa Panimalay

Dapita ang mga bata sa pagpakigbahin sa ilang pamilya og butang nga ilang mahimo sa pagbalaan sa Igpapahulay nga adlaw.

Pagpalambo sa Atong Pagtudlo

Lig-una ang pagsalig sa mga bata. Ang ubang mga bata tingali walay pagsalig nga makakat-on sa ebanghelyo sa ilang kaugalingon. Saari ang mga bata nga ang Espiritu Santo motabang nila sa pagkat-on.