lim-aw sa pagsubang sa adlaw

Mayo 10–16

Doktrina ug mga Pakigsaad 49–50

“Kana nga Gikan sa Dios Mao ang Kahayag”

Samtang magbasa ka sa Doktrina ug mga Pakigsaad 49–50, pangitaa ang mga mensahe o mga baruganan nga imong gibati nga makahuluganon kaayo sa mga bata nga imong gitudloan. Ang pipila gisugyot niini nga outline.

Irekord ang Imong mga Impresyon

pagpaambit nga icon

Dapita ang Pagpaambit

Ipakita ang litrato gikan sa outline niining semanaha sa Dali, Sunod Kanako—Alang sa mga Indibidwal ug mga Pamilya, ug tabangi ang mga bata nga maghisgot mahitungod kon sa unsa nga paagi nga si Jesukristo sama sa usa ka maayong magbalantay.

pagtudlo nga icon

Itudlo ang Doktrina: Mas Gagmay nga mga Bata

Doktrina ug mga Pakigsaad 49:12–14

Makasunod ako ni Jesukristo.

Tabangi ang mga bata nga makasabut nga sila makasunod ni Jesukristo pinaagi sa pagtuo Kaniya, paghinulsol, pagpabunyag, ug pagdawat sa Espiritu Santo.

Posible nga mga Kalihokan

• Ipakita ang upat ka papel nga tunob sa tiil ug upat ka litrato nga nagrepresentar sa pagtuo ni Jesukristo, paghinulsol, pagpabunyag, ug pagdawat sa Espiritu Santo. Basaha ang Doktrina ug mga Pakigsaad 49: 12–14, ug hangyoa ang mga bata sa pagtudlo sa husto nga litrato kon ang matag usa gihisgutan diha sa mga bersikulo. Tuguti ang mga bata nga motabang nimo sa pagbutang sa mga tunob sa tiil diha sa salog nga ang mga litrato tupad niini, ug dapita ang mga bata sa pagpuli-puli sa paglakaw ibabaw sa mga tunob sa tiil. Ihatag ang imong pagpamatuod nga kon kita mobuhat sa mga butang niini nga mga litrato, kita nagsunod ni Jesukristo.

• Gamita ang pahina sa kalihokan niining semanaha sa paghimo og mga finger puppet nga makatabang sa mga bata nga makat-on unsaon nila sa pagsunod si Jesukristo pinaagi sa pagbaton og pagtuo, paghinulsol, pagpabunyag, ug pagdawat sa gasa sa Espiritu Santo.

Doktrina ug mga Pakigsaad 50:23–25

Ang akong esprituhanon nga kahayag magkahayag ug magkahayag.

Tulukibon nga mga konsepto sama sa kamatuoran ug espiritu lisud nga masabtan sa gagmayng mga bata, apan ang pagtandi niini ngadto sa kahayag, sama sa gibuhat sa Ginoo diha sa Doktrina ug mga Pakigsaad 50:23–25, makatabang.

Posible nga mga Kalihokan

• Gamita ang kalihokan nga naghulagway kon sa unsa nga paagi ang atong espirituhanon nga kahayag magkahayag ug magkahayag. Ikaw mahimong mopakita og mga litrato sa mga butang nga maghatag og kahayag (sama sa usa ka kandila, usa ka bombilya, ug ang adlaw) ug tuguti ang mga bata nga mohan-ay niini pinaagi sa nagkadako nga kahayag. O dapita ang mga bata nga magpakaaron-ingnon nga mao ang mga kahayag nga nagkahayag pinaagi sa pagpungko ug hinay nga mobarug ug pagtuyhad sa ilang mga bukton. Tabangi sila sa paghunahuna sa maayong mga butang nga ilang mahimo sa paghimo sa ilang espirituhanong kahayag nga mas mohayag pa.

• Kantaha uban sa mga bata ang usa ka kanta mahitungod sa ilang espirituhanong kahayag, sama sa “Dan-ag” (Songbook sa mga Bata, 96). Ipamatuod ang mahitungod kon sa unsa nga paagi ang Langitnong Amahan mitabang nga ang imong kahayag nga mas mohayag pa. Sultihi ang mga bata mahitungod sa kahayag nga imong nakita diha kanila.

Doktrina ug mga Pakigsaad 50:41–44

Si Jesukristo nahigugma kanako.

Si Jesukristo mao ang Maayong Magbalantay. Kita Iyang karnero, ug Siya nahigugma sa matag usa nato. Unsa ang makatabang sa mga bata nga imong gitudloan nga mobati sa Iyang gugma alang kanila?

Posible nga mga Kalihokan

• Ipakita ang litrato ni Jesukristo ngadto sa mga bata (tan-awa sa Libro sa Hulagway sa Ebanghelyo, nu. 47, 84, o 116), ug pangutan-a ang mga bata giunsa nila sa pagkahibalo nga si Jesus nahigugma sa mga bata. Ipakigbahin giunsa nimo pagkahibalo nga si Jesus nahigugma kanimo ug sa matag usa sa mga bata diha sa klase.

• Paghimo og karnero nga papel, isulat dinhi ang mga ngalan sa mga bata diha sa klase, ug tagoi kini libut sa kwarto. Ipakita ang litrato sa Manluluwas, ug basaha ang Doktrina ug mga Pakigsaad 50:41–42. Tabangi ang mga bata nga makasabut unsa ang gitudlo niini nga mga bersikulo mahitungod kon unsay gibati ni Jesukristo kanila. Tuguti sila nga mangita sa karnero libut sa kwarto ug ipabutang kini diha sa pisara duol sa litrato ni Jesus aron “walay usa kanila … nga mawala” (bersikulo 42).

pagtudlo nga icon

Itudlo ang Doktrina: Mas Dagko nga mga Bata

Doktrina ug mga Pakigsaad 49:12–14

Makasunod ako ni Jesukristo.

Ang Ginoo nagkinahanglan natong tanan sa pagtudlo sa uban nga sila makaduol ngadto Kaniya pinaagi sa pagbaton og pagtuo, paghinulsol, pagpabunyag, ug pagdawat sa gasa sa Espiritu Santo.

Posible nga mga Kalihokan

• Dapita ang mga bata sa pagtandi sa Doktrina ug mga Pakigsaad 49:12–14 sa unsay gitudlo ni Pedro sa Mga Buhat 2:38 ug sa ikaupat nga artikulo sa hugot nga pagtuo. Unsa nga mga pagkasusama ang ilang makit-an? Ngano nga kini nga mga kamatuoran importante?

• Dapita ang mga bata nga magtrabaho nga magpares ug magpakaaron-ingnon nga usa nila gusto nga makahibalo unsaon sa pagsunod ni Jesukristo. Ang laing bata sa parisan makatudlo kaniya gamit ang Doktrina ug mga Pakigsaad 49:12–14.

Doktrina ug mga Pakigsaad 49:15–17

Ang kaminyoon tali sa lalaki ug babaye mahinungdanon ngadto sa plano sa Dios.

Ang mga bata nga imong gitudloan mahimong mag-atubang og makalibug nga mga mensahe mahitungod sa kaminyoon. Ang Doktrina ug mga Pakigsaad 49:15–17 makatabang nila nga makasabut unsay gibati sa Ginoo mahitungod sa kaminyoon.

Posible nga mga Kalihokan

• Ipasabut nga ang mga Shakers mao ang grupo nga nagtuo nga ang mga tawo kinahanglang dili magminyo (tan-awa sa ulohan sa seksyon sa Doktrina ug mga Pakigsaad 49). Dapita ang mga bata sa pagpangita sa mga butang nga gitudlo sa Ginoo mahitungod sa kaminyoon diha Doktrina ug mga Pakigsaad 49:15–17.

• Tabangi ang mga bata nga makasabut unsa ang gipasabut sa mga pulong “ang kaminyoon gi-orden sa Dios”. Dapita sila nga magtrabaho nga magpares sa pagtandi sa Doktrina ug mga Pakigsaad 49:15–17 uban sa unang tulo ka parapo sa “Ang Pamilya: Usa ka Pamahayag ngadto sa Kalibutan.” Ngano nga ang kaminyoon importante kaayo ngadto sa Langitnong Amahan?

• Kantaha pagdungan ang ikaduhang bersikulo sa “Mga Pamilya Mahimong Manag-uban sa Kahangturan” (Songbook sa mga Bata, 98) o laing kanta mahitungod sa mga pamilya. Tabangi ang mga bata sa paghunahuna og mga paagi nga sila makaandam nga magminyo sa templo sa umaabut ug makabaton og mahangturong pamilya.

  magtiayon nga naa sa gawas sa templo

  Ang kaminyoon tali sa usa ka lalaki ug usa ka babaye gi-orden sa Dios.

Doktrina ug mga Pakigsaad 50:40–46

Si Jesukristo mao ang Maayong Magbalantay.

Ang Doktrina ug mga Pakigsaad 50:40–46 naglakip og imahe nga makatabang sa mga bata nga imong gitudloan nga makasabut kon unsay gibati sa Manluluwas kanila.

Posible nga mga Kalihokan

• Paghimo og dula sa pagpatukma [matching game] gamit ang mga pulong sa Doktrina ug mga Pakigsaad 50:40–46. Sama pananglit, ikaw makasulat sa “Ayaw kahadlok, gagmay nga mga bata,” diha sa kard nga motukma sa laing kard nga nag-ingon “kay kamo akò” (bersikulo 41). Basaha og dungan ang Doktrina ug mga Pakigsaad 50:40–46. Dayon sagula ang mga kard diha sa salog, sa usa ka lamesa, o sa tabla, ug hangyoa ang mga bata sa pagpatukma sa mga pulong. Unsa ang gitudlo niini nga mga pulong mahitungod ni Jesukristo?

• Aron matabangan ang mga bata nga makasabut kon sa unsa nga paagi nga ang Manluluwas sama sa usa ka maayong magbalantay, hangyoa sila sa pagbasa og dungan sa Doktrina ug mga Pakigsaad 50:40–46. Dayon ipasalida ang “Jesus Declares the Parable of the Lost Sheep” (ChurchofJesusChrist.org), ug hangyoa sila sa pagpangita og butang diha sa video nga nagpahinumdom nila unsay ilang gibasa. Giunsa kita pagluwas ni Jesus? Unsaon nga kita mahimong maayong mga magbalantay ngadto sa uban?

pagkat-on nga icon

Awhaga ang Pagkat-on diha sa Panimalay

Pag-andam og mubo nga sulat alang sa matag bata uban niini nga mga pulong: Pangutan-a ako mahitungod sa . Pabutangi sa mga bata ang blangko og butang nga ilang nakat-unan sa klase (tabangi sila kon gikinahanglan) ug ipilit ang mubo nga sulat sa ilang mga sinina aron sa pagpahinumdom sa paghisgot niini sa panimalay.

Pagpalambo sa Atong Pagtudlo

Ipahaum ang mga kalihokan sa edad sa mga bata nga imong gitudloan. Samtang magkadako ang mga bata, mas daghan sila og ikatampo sa klase. Sila makabaton og dugang nga kasinatian ug tingali mahimong mas maayo sa pagpakigbahin sa ilang mga hunahuna. Kon magtudlo sa gagmay nga mga bata, ikaw kinahanglan nga mopasabut og dugang kay sa mas dagko nga mga bata. Hatagi kanunay ang mga bata og oportunidad sa pag-apil sa ilang kaugalingon, ug dayon tabangi sila kon gikinahanglan.

pahina sa kalihokan: Ako makasunod ni Jesukristo