lim-aw atol sa pagsubang sa adlaw

Mayo 10–16

Doktrina ug mga Pakigsaad 49–50

“Kana Nga Gikan sa Dios Mao ang Kahayag”

“Siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw sa kahayag hangtud sa hingpit nga adlaw” (Doktrina ug mga Pakigsaad 50:24). Pamalandunga kon giunsa nimo pagkadawat sa kahayag pinaagi sa pagpadayon diha sa Dios.

Irekord ang Imong mga Impresyon

Ang Manluluwas mao ang atong “maayo nga magbalantay” (Doktrina ug mga Pakigsaad 50:44). Nasayud Siya nga usahay ang karnero maglatagaw ug nga ang kamingawan adunay daghang peligro. Mao nga Siya mahigugmaong mogiya kanato paingon sa kahilwasan [safety] sa Iyang doktrina, layo sa mga kakuyaw sama sa “dili tinuod nga mga espiritu, nga nangadto sa nagkalain-lain nga dapit sa yuta, ug naglimbong sa kalibutan” (Doktrina ug mga Pakigsaad 50:2). Ang pagsunod Kaniya kanunayng nagpasabut nga mosalikway sa dili husto nga mga ideya o mga tradisyon. Tinuod kini alang kang Leman Copley ug sa uban didto sa Ohio kinsa midawat sa gipahiuli nga ebanghelyo apan mipabilin gihapon sa pipila ka gituohan nga dili husto. Diha sa Doktrina ug mga Pakigsaad 49, gipadayag sa Ginoo ang mga kamatuoran nga mikorihir sa mga gituohan kaniadto ni Leman mahitungod sa mga hilisgutan sama sa kaminyoon ug sa Ikaduhang Pag-anhi sa Manluluwas. Ug sa dihang ang mga kinabig didto sa Ohio “midawat … sa mga espiritu nga [sila] wala makasabut,” gitudloan sila sa Ginoo kon unsaon pag-ila sa tinuod nga mga manipestasyon sa Espiritu (Doktrina ug mga Pakigsaad 50:15). Ang Maayong Magbalantay mapailubon; nasayud Siya nga kining unang mga Santos—sama natong tanan—“gagmay nga mga bata” kinsa “kinahanglan motubo diha sa grasya ug diha sa kamatuoran” (Doktrina ug mga Pakigsaad 50:40).

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 49:5–23

Ang mga kamatuoran sa ebanghelyo makatabang kanako sa pag-ila sa sayop nga mga pagtulun-an.

Sa wala pa mopasakop sa Simbahan, si Leman Copley nahimo nang kabahin sa usa ka relihiyusong grupo nga nailhan isip United Society of Believers in Christ’s Second Appearing, nga nailhan usab isip Shakers. Human makaistorya si Leman, nangayo og katin-awan si Joseph Smith gikan sa Ginoo mahitungod sa pipila ka mga pagtulun-an sa Shakers, ug ang Ginoo mitubag pinaagi sa pagpadayag diha sa seksyon 49.

Makita nimo ang pipila sa mga gituohan sa Shakers nga gihisgutan diha sa ulohan sa seksyon 49. Ikonsiderar ang pagmarka o pagtimaan sa mga kamatuoran diha sa mga bersikulo 5–23 nga mikorihir niadtong mga gituohan. Hunahunaa ang ubang sayop nga mga pagtulun-an o mga tradisyon sa kalibutan karon. Unsa nga mga kamatuoran sa ebanghelyo ang makatabang kanimo aron mabantayan ang imong kaugalingon batok niini?

Doktrina ug mga Pakigsaad 49:15–17

Ang kaminyoon tali sa lalaki ug babaye mahinungdanon ngadto sa plano sa Dios.

Unsa nga mga kamatuoran mahitungod sa kaminyoon ang imong makat-unan gikan sa Doktrina ug mga Pakigsaad 49:15–17? Nganong gibati nimo nga ang kaminyoon tali sa usa ka lalaki ug sa usa ka babaye mahinungdanon ngadto sa plano sa Dios? Si Elder David A. Bednar mihatag og duha ka mga rason: “Rason 1: Ang mga kinaiya sa mga espiritu sa lalaki ug babaye nagkompleto ug naghingpit sa usag usa, ug, busa ang mga lalaki ug babaye gituyo nga mouswag og dungan ngadto sa kahimayaan. … Rason 2: Sa balaang plano, ang lalaki ug ang babaye gikinahanglan sa pagdala sa mga bata nganhi sa mortalidad ug sa paghatag sa pinakamaayo nga kahimtang sa pagpadako ug pag-amuma sa mga bata” (“Ang Kaminyoon Mahinungdanon sa Iyang Mahangturong Plano,” Liahona, Hunyo 2006, 51–52).

Tan-awa usab sa Genesis 2:20–24; 1 Mga Taga-Corinto 11:11; “Ang Pamilya: Usa ka Pamahayag ngadto sa Kalibutan,” Liahona, Mayo 2017, 145.

managtiayon nga anaa sa gawas sa templo

Ang kaminyoon tali sa usa ka lalaki ug usa ka babaye gi-orden sa Dios.

Doktrina ug mga Pakigsaad 50

Ang mga pagtulun-an sa Dios makapanalipod kanako gikan sa mga pagpanglingla ni Satanas.

Ang bag-ong mga kinabig didto sa Ohio matinguhaon nga makadawat og espirituhanong mga manipestasyon nga gisaad diha sa mga kasulatan, apan matinguhaon usab si Satanas sa paglingla kanila. Naghunahuna sila, Kon ang usa ka tawo mosinggit o makuyapan, mao ba kana ang impluwensya sa Espiritu?

Hunahunaa nga gihangyo ka nga motabang niining bag-ong mga kinabig nga masabtan kon unsaon pag-ila ang tinuod nga mga manipestasyon sa Espiritu Santo ug malikayan nga malingla pinaagi sa mga pagsundog ni Satanas. Unsa nga mga baruganan ang imong nakita diha sa Doktrina ug mga Pakigsaad 50 nga imong mapaambit? (tan-awa ilabi na sa mga bersikulo 22–25, 29–34, 40–46).

Tan-awa usab sa 2 Timoteo 3:13–17.

Doktrina ug mga Pakigsaad 50:13–24

Ang mga magtutudlo ug mga tigkat-on dungan nga malig-on pinaagi sa Espiritu.

Usa ka paagi nga mahimo nimong matun-an ang Doktrina ug mga Pakigsaad 50:13–24 mao ang pagdrowing og hulagway sa usa ka magtutudlo ug usa ka tigkat-on ug, tupad sa matag usa, paghimo og lista sa mga pulong ug mga hugpong sa mga pulong gikan niining mga bersikulo nga nagtudlo nimo og butang mahitungod sa pagkat-on ug pagtudlo sa ebanghelyo. Kanus-a ka nakabaton og mga kasinatian nga nagtudlo nimo sa kaimportante sa Espiritu diha sa pagkat-on ug pagtudlo? Ikonsiderar kon unsay imong mahimo sa pagpalambo sa imong mga paningkamot isip usa ka tigkat-on ug tigtudlo sa ebanghelyo.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 49:2.Unsa kaha ang gipasabut sa “nagtinguha nga masayud og tipik sa kamatuoran, apan dili sa tanan”? Tingali mahimo kang mopakita og hulagway nga adunay bahin nga gitabunan ug ipatag-an sa mga sakop sa pamilya kon unsa kini. Unsa ang mahitabo kon modawat kita og tipik lamang sa kamatuoran? (tan-awa sa 2 Nephi 28:29). Sa unsang paagi nga ang kahingpitan sa ebanghelyo usa ka panalangin alang kanato?

Doktrina ug mga Pakigsaad 49:26–28.Sa unsang paagi kita napanalanginan sa saad sa Ginoo nga “Ako anaa sa inyong atubangan ug anaa sa inyong luyo; ug Ako anaa sa inyong taliwala”? Ang mga sakop sa pamilya mahimong mopaambit og mga kasinatian sa dihang mibati sila nga ang Ginoo “anaa sa [ilang] atubangan” o mibati nga Siya “anaa sa [ilang] taliwala.”

Doktrina ug mga Pakigsaad 50:23–25.Mahimo kamong magpundok sa usa ka ngitngit nga kwarto aron mobasa sa Doktrina ug mga Pakigsaad 50:23–25 ug hinay-hinay nga mopuno og dugang nga kahayag pinaagi sa pagdagkot og mga kandila o pagpasiga tagsa-tagsa sa mga suga. Mahimo usab kamong mobasa niining mga bersikulo samtang magtan-aw sa pagsubang sa adlaw sa buntag. Unsa ang atong mabuhat sa paghimo sa kahayag sa atong ebanghelyo nga magpadayon sa pagsiga? Kon ang mga sakop sa pamilya makakat-on og bag-ong butang mahitungod sa ebanghelyo atol sa semana, dasiga sila sa pagpaambit niini ngadto sa pamilya pinaagi sa pagsulat og pahinumdom ug isukip kini sa usa ka lampara o laing suga diha sa balay.

Doktrina ug mga Pakigsaad 50:40–46.Human mabasa ang Doktrina ug mga Pakigsaad 50:40–46, mahimo nimong ipakita ang hulagway sa Manluluwas nga nag-uban niining outline ug pangutana og sama niini: Sa unsang paagi nga makasulti mo nga gihigugma sa Manluluwas ang karnero? Sa unsang paagi nga ang Manluluwas sama sa usa ka magbalantay ngari kanato? Unsa nga mga hugpong sa mga pulong gikan sa mga kasulatan nga nagpakita sa ideya nga ang Manluluwas usa ka magbalantay ug kita Iyang mga karnero?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Dan-ag,” Songbook sa mga Bata, 96.

Pagpalambo sa Atong Pagtudlo

Pagmapahiangayon. Ang labing mahinungdanong mga gutlo sa pagtudlo, ilabi na diha sa panimalay, kasagaran kalit ra ug wala damha: ang pagpangaon sa pamilya mahimong makapadasig og panaghisgutan mahitungod sa pagbusog sa pulong sa Dios, ug ang usa ka unos nga adunay ulan mahimong usa ka kahigayunan sa pagpamatuod bahin sa buhi nga tubig. Kon andam ka sa espirituhanong paagi, ang Ginoo mohatag kanimo “sa diha gayud nga higayon, unsa ang inyong isulti” (Doktrina ug mga Pakigsaad 100:6).

si Jesukristo uban sa nati nga karnero

Malumo nga Magbalantay sa Karnero, ni Kim Yongsung