mga tawo nga nagpundok sa may lim-aw

Ang Panagpundok diha sa Kampo, ni Worthington Whittredge

Mayo 3–9

Doktrina ug mga Pakigsaad 46–48

“Pangitaa sa Matinguhaon nga Paagi ang Labing Maayo nga mga Gasa”

Samtang magbasa ka sa Doktrina ug mga Pakigsaad 46–48, isulat ang mga impresyon nga imong madawat. Tingali mangutana ka, sama sa gisugyot ni Elder Richard G. Scott, “Aduna pa bay dugang nga kinahanglan nakong masayran?” (“Aron Makabaton og Espirituhanong Giya” Liahona, Nob. 2009, 8).

Irekord ang Imong mga Impresyon

Samtang sila si Parley P. Pratt, Oliver Cowdery, Ziba Peterson, ug Peter Whitmer Jr. mibiya sa Kirtland ug miadto sa laing mga dapit alang sa misyonaryo nga buhat, gibiyaan nila ang sobra sa usa ka gatus ka mga kinabig nga adunay dakong kadasig apan gamay ra og kasinatian o direksyon. Walay tamdanang mga basahon nga pang-instruksyon, walay mga miting sa pagbansay sa pagpangulo, walay mga sibya sa kinatibuk-ang komperensya—gani, wala kaayoy daghang mga kopya sa Basahon ni Mormon nga magamit. Daghan niining bag-o nga mga tumutuo naagni sa gipahiuli nga ebanghelyo tungod sa saad sa talagsaong mga manipestasyon sa Espiritu, ilabi na niadtong ilang nasayran gikan sa pagtuon sa Bag-ong Tugon (pananglitan, tan-awa sa 1 Mga Taga-Corinto 12:1–11). Sa wala madugay, ang pipila ka dili kasarangan nga mga pagpadayag sa pagsimba—naglakip sa pagkatumba diha sa yuta o pag-limbag-limbag sama sa usa ka bitin—gipaila ngadto sa miting sa Simbahan. Daghan ang naglisud sa pag-ila kon hain sa mga manipestasyon ang iya sa Espiritu ug unsa ang dili. Pagkakita sa kalibug, nag-ampo si Joseph Smith alang sa tabang. Ang tubag sa Ginoo sama gihapon kabililhon karon, kon ang mga tawo sa kasagaran mosalikway o mobaliwala sa mga butang nga may kalabutan sa Espiritu. Gipadayag sa Ginoo nga ang espirituhanong mga manipestasyon tinuod ug giklaro kon unsa kini—mga gasa gikan sa usa ka mahigugmaong Langitnong Amahan, “gihatag alang sa kaayohan niadto kinsa nahigugma [Kaniya] ug naghupot sa [Iyang] mga sugo” (Doktrina ug mga Pakigsaad 46:9).

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 46:1–6

Tanang matinguhaon nga mga nagpangita abi-abihon diha sa Simbahan sa Ginoo.

Ang mga miting sa Ang Simbahan ni Jesukristo sa mga Santos sa Ulahing mga Adlaw kinahanglang apil sa labing maabi-abihon ug makapadasig nga mga panagpundok dinhi sa kalibutan. Giunsa kita pagtambag sa Ginoo diha sa Doktrina ug mga Pakigsaad 46:1–6 sa pagdawat niadtong motambong sa atong mga miting? Ang inyong mga higala ug ang mga tawo sa inyong kasilinganan mibati ba nga giabi-abi sa mga tulumanon sa pagsimba diha sa inyong ward? Unsa ang inyong gibuhat aron mahimo ang inyong mga miting sa Simbahan nga mga dapit nga gustong balikan sa mga tawo? Pamalandunga kon sa unsang paagi nga ang inyong mga paningkamot sa pagsunod sa Espiritu Santo diha sa mga miting sa Simbahan makaapekto sa inyong kasinatian.

Tan-awa usab sa 3 Nephi 18:22–23; Moroni 6:5–9.

Doktrina ug mga Pakigsaad 46:7–33

Ang Dios mihatag og espirituhanong mga gasa aron sa pagpanalangin sa Iyang mga anak.

Ang unang mga Santos mituo sa espirituhanong mga gasa apan nagkinahanglan og giya mahitungod sa katuyoan niini. Samtang magtuon ka mahitungod sa mga gasa sa Espiritu gamit ang Doktrina ug mga Pakigsaad 46:7–33, pamalandunga kon nganong importante nga ikaw “kanunay [mahinumdom] alang sa unsa sila gihatag” (bersikulo 8). Ikonsiderar kon sa unsang paagi nga kining mga bersikulo magamit niining pamahayag gikan ni Elder Robert D. Hales: “Kini nga mga gasa ihatag ngadto niadtong kinsa matinud-anon kang Kristo. Kini makatabang kanato nga masayud ug motudlo sa mga kamatuoran sa ebanghelyo. Kini makatabang kanato sa pagpanalangin sa uban. Kini mogiya kanato balik ngadto sa atong Langitnong Amahan” (“Gifts of the Spirit,” Ensign, Peb. 2002, 16). Unsa pa ang imong nakat-unan gikan niini nga mga bersikulo mahitungod sa espirituhanong mga manipestasyon? Sa unsang paagi nga kining mga kamatuoran makatabang kanimo nga “dili malimbungan”? (bersikulo 8).

Pamalandunga kon unsa ang imong espirituhanong mga gasa—ug unsaon nimo paggamit niini “alang sa kaayohan sa mga anak sa Dios” (bersikulo 26). Kon ikaw adunay patriyarkal nga panalangin, posible nga miila kini sa espirituhanong mga gasa nga gihatag nganha nimo.

Tan-awa usab sa Giya ngadto sa mga Kasulatan, “Gasa sa Espiritu, Mga,” scriptures.ChurchofJesusChrist.org.

Doktrina ug mga Pakigsaad 47

Gusto sa Ginoo nga ang Iyang Simbahan magtipig og usa ka kasaysayan.

Ang calling ni John Whitmer sa pagtipig og usa ka kasaysayan sa Simbahan nagpadayon nga usa ka dugay na nga tradisyon sa mga tigtipig og mga rekord taliwala sa katawhan sa Dios (tan-awa sa 2 Nephi 29:11–12; Moises 6:5; Abraham 1:28, 31). Gani, ang posisyon sa Historian ug Recorder sa Simbahan anaa pa gihapon karon. Ngano kaha nga ang pagtipig og usa ka kasaysayan importante man kaayo ngadto sa Ginoo? Pamalandunga kini samtang magbasa ka sa Iyang mga instruksyon ngadto ni John Whitmer mahitungod niining buluhaton diha sa seksyon 47. Ikonsiderar usab kon unsa nga personal nga mga kasinatian ang kinahanglan nimong irekord. Pananglitan, unsa man ang gitudlo sa Ginoo kanimo nga gusto nimong mapreserbar?

Samtang mamalandong ka niining mga pangutana, ikonsiderar kini nga ideya gikan ni Elder Marlin K. Jensen sa Seventy, kinsa miserbisyo isip Historian ug Recorder sa Simbahan gikan niadtong 2005 hangtud sa 2012:

“Maghupot kita og mga talaan aron makatabang kanato nga mahinumdom. … Nagtinguha kami sa pagtabang sa mga miyembro sa Simbahan nga mahinumduman ang mahinungdanong mga butang nga nahimo sa Dios alang sa Iyang mga anak. … Ang mga leksyon gikan sa nangagi makatabang kanato nga makasugakod sa atong pagkakaron ug mohatag kanato og paglaum sa umaabut” (“Kinahanglan nga Adunay Talaan nga Gitipigan diha Kaninyo,” Liahona, Dis. 2007, 26, 31).

Aron makakat-on og dugang mahitungod sa buhat nga kasamtangang gihimo ubos sa direksyon sa Historian sa Simbahan, bisitaha ang history.ChurchofJesusChrist.org.

John Whitmer

Gitawag si John Whitmer sa pagtipig og usa ka kasaysayan sa Simbahan.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 46:2–6.Unsay atong mahimo isip pamilya sa pagsiguro nga ang uban mobati nga giabi-abi diha sa atong mga miting sa Simbahan? (tan-awa usab sa 3 Nephi 18:22–23). Ang hulagway nga nag-uban niining outline mahimong madugang niining panaghisgutan.

Doktrina ug mga Pakigsaad 46:7–26.Unsa nga espirituhanong mga gasa ang atong makita sa usag usa? Sa unsang paagi nga kadtong mga gasa makapanalangin sa atong pamilya?

Doktrina ug mga Pakigsaad 47.Unsaon nimo pag-awhag ang imong pamilya sa pagrekord sa ilang personal nga mga kasaysayan sa tibuok semana? Mahimo kang mopaambit og pipila ka mga sinulat gikan sa imong personal nga journal o mopaambit og istorya mahitungod sa usa ka katigulangan (tan-awa sa FamilySearch.org). Ang ubang mga pamilya mogahin og pipila ka mga minuto kada semana aron makasulat ang tanan diha sa ilang mga journal. Mahimo kang mohatag og pipila ka mga journal prompt, sama sa “Unsay nahitabo karong semanaha nga gusto nimong masayran sa imong mga apo?” o “Sa unsang paagi nga imong nakita ang kamot sa Ginoo diha sa imong kinabuhi karong semanaha?” Ang gagmay nga mga bata mahimong magdrowing og mga hulagway gikan sa ilang mga kasinatian, o mahimo nimo silang irekord nga nagsaysay sa ilang mga istorya. Unsa nga mga panalangin ang moabut tungod sa pagtipig “kanunay og kasaysayan”? (bersikulo 1).

Doktrina ug mga Pakigsaad 48.Ang mga Santos sa Ohio gimanduan nga mopaambit sa ilang yuta niadtong namalhin ngadto sa Ohio gikan sa silangang Estados Unidos. Unsa ang atong mapaambit aron matubag ang mga panginahanglan sa uban?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Nakabuhat Ba Ako og Maayo Karon?” (Mga Himno, nu. 135).

Pagpalambo sa Atong Pagtudlo

Gamita ang mga istorya ug mga ehemplo. Ang Manluluwas sa kasagaran migamit og mga istorya ug mga sambingay aron sa pagtudlo sa mga baruganan sa ebanghelyo. Hunahunaa ang mga ehemplo ug mga istorya gikan sa imong kaugalingong kinabuhi nga makapahimo sa usa ka baruganan sa ebanghelyo nga makapainteresado sa imong pamilya (tan-awa sa Pagtudlo sumala sa Pamaagi sa Manluluwas, 22).

mga tawo diha sa Simbahan

Ang Langitnong Amahan mihatag sa iyang mga anak og espirituhanong mga gasa aron mapanalanginan ang mga kinabuhi sa uban.