usa ka mag-uuma nga adunay baka

First Furrow [Unang Tudling], ni James Taylor Harwood

Mayo 17–23

Doktrina ug mga Pakigsaad 51–57

“Matinud-anon, Makiangayon, ug usa ka Maalamon nga Tinugyanan”

Ang pagtuon sa mga kasulatan makatabang nimo aron makaila sa tingog sa Ginoo, kay ang mga kasulatan gihatag Niya pinaagi sa Iyang Espiritu (tan-awa sa Doktrina ug mga Pakigsaad 18:34–36).

Irekord ang Imong mga Impresyon

Alang sa mga miyembro sa Simbahan niadtong mga 1830, ang panagpundok sa mga Santos ug ang pagtukod sa siyudad sa Zion espirituhanon ingon man usab nga temporal nga mga buhat, nga adunay daghang praktikal nga mga butang nga atimanunon: Usa ka tawo kinahanglang mopalit ug moapud-apod og yuta diin ang mga Santos mahimong mopuyo. Usa ka tawo kinahanglang moimprinta og mga libro ug ubang mga publikasyon. Ug usa ka tawo kinahanglang magdumala og tindahan aron makasangkap og mga butang niadtong anaa sa Zion. Diha sa mga pagpadayag nga narekord sa Doktrina ug mga Pakigsaad 51–57, ang Ginoo mitudlo ug misugo og mga tawo nga modumala niining mga buluhaton, ug Iyang giila ang Independence, Missouri, isip “ang tunga-tunga nga dapit” sa Zion (Doktrina ug mga Pakigsaad 57:3).

Apan samtang ang mga kahanas sa maong mga butang sama sa pagpalit og yuta, pag-imprinta, ug pagdumala og tindahan bililhon sa temporal nga buhat sa pagtukod sa Zion, kining mga pagpadayag nagtudlo usab nga ang Ginoo nagtinguha sa Iyang mga Santos nga mahimong takus sa espirituhanong paagi aron matawag nga usa ka katawhan sa Zion. Nanawagan Siya sa matag usa kanato nga mahimong “matinud-anon, makiangayon, ug usa ka maalamon nga tinugyanan,” nga adunay mahinulsulon nga espiritu, “[mo]barug nga malig-on” diha sa mga responsibilidad nga gisangun kanato (tan-awa sa Doktrina ug mga Pakigsaad 51:19; 52:15; 54:2). Kon ato kanang mabuhat—bisan unsa pa man ang atong temporal nga mga kahanas—magamit kita sa Ginoo sa pagtukod sa Zion, ug Siya “mopadali sa pagtukod sa dakbayan niana nga panahon” (Doktrina ug mga Pakigsaad 52:43).

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 51

Gusto sa Ginoo nga ako mahimong matinud-anon, makiangayon, ug maalamon nga tinugyanan.

Kon ikaw usa ka miyembro sa Simbahan niadtong 1831, mahimong gidapit ka nga motuman sa balaod sa pagpahinungod pinaagi sa pagtugyan sa imong kabtangan ngadto sa Simbahan pinaagi sa bishop. Kasagaran, iya dayong ibalik nganha kanimo, kon unsay imong gidonar, usahay adunay sobra. Apan dili na kini imo lamang gipanag-iya—imo kining pagkatinugyanan.

Karon ang mga pamaagi lahi, apan ang mga baruganan sa pagpahinungod ug pagkatinugyanan mahinungdanon gihapon sa buhat sa Ginoo. Ikonsiderar kining mga pulong gikan ni Elder Quentin L. Cook: “Nagpuyo kita sa mga panahon nga malisud diin daghan ang nagtuo nga kita walay tulubagon ngadto sa Dios ug nga kita walay personal nga responsibilidad o pagkatinugyanan alang sa atong mga kaugalingon o sa uban. Daghan sa kalibutan ang nakapokus sa pagtagbaw sa kaugalingon … [ug] wala sila motuo nga sila ang magbalantay sa ilang igsoon. Sa Simbahan, hinoon, kita nagtuo nga kining mga pagkatinugyanan usa ka sagrado nga pagsalig” (“Pagkatinugyanan—Usa ka Sagrado nga Pagsalig,” Liahona, Nob. 2009, 91).

Samtang magbasa ka sa seksyon 51, hunahunaa kon unsay gisalig sa Dios nganha kanimo. Unsay gipasabut sa mga pulong nga “tinugyanan” (bersikulo 19) ug “mipahinungod” (bersikulo 5), ug unsay gipasabut niini mahitungod sa mga gilauman sa Dios kanimo? Unsa nga mga baruganan ang imong nakita diha sa seksyon 51 ug sa mga pulong ni Elder Cook nga nagtudlo kanimo kon unsay gipasabut sa mahimong usa ka tinugyanan? (tan-awa ilabi na sa mga bersikulo 9, 15–20).

Tan-awa usab sa Mateo 25:14–30 .

Doktrina ug mga Pakigsaad 52:14–19

Mihatag ang Dios og usa ka sumbanan [pattern] aron malikayan nga malingla.

Kay daghang mga tawo ang nangangkon og espirituhanong mga manipestasyon, nabalaka ang unang mga Santos nga malingla. Sa unsang paagi sila makasulti kon kinsa ang “dawaton [sa Dios]”? (bersikulo 15). Diha sa Doktrina ug mga Pakigsaad 52:14–19, ang Ginoo mihatag og makatabang nga sumbanan. Unsaon nimo paggamit kining sumbanan aron makabantay sa sayop nga mga mensahe sa kalibutan? Mahimo usab nimong gamiton kini nga sumbanan sa pagtimbang-timbang sa imong kaugalingon: ikonsiderar ang paggamit sa mga hugpong sa mga pulong gikan niining mga bersikulo sa pagsulat og mga pangutana sama sa “Kon mosulti ko, ang akong espiritu mahinulsulon ba?”

Doktrina ug mga Pakigsaad 54

Makadangup ko sa Ginoo kon masakitan ko tungod sa mga pagpili sa uban.

Isip kabahin sa panagpundok sa Ohio, usa ka grupo sa mga Santos nga gipangulohan ni Newel Knight miabut gikan sa Colesville, New York, ug nagkinahanglan og dapit nga kapuy-an. Si Leman Copley adunay dakong uma duol sa Kirtland, ug mipakigsaad siya nga motugot sa mga Santos nga mopuyo diha sa iyang yuta. Hinoon, sa wala madugay human sila makapuyo didto, nahuyang ang pagtuo ni Copley, wala motuman sa iyang pakigsaad, ug gipapahawa ang mga Santos gikan sa iyang yuta (tan-awa sa Mga Santos, 1:143–46).

Sama sa girekord diha sa seksyon 54, gisultihan sa Ginoo si Newel Knight kon unsay buhaton sa mga Santos mahitungod sa ilang sitwasyon. Unsay imong nakita niining pagpadayag nga makatabang nimo kon ang usa ka tawo dili motuman sa iyang mga pasalig o ang ubang dili maayong mga pagpili makaapekto nimo?

lunhaw nga uma

Luna sa uma didto sa Ohio nga gisaad ni Leman Copley ngadto sa Simbahan.

Doktrina ug mga Pakigsaad 56:14–20

Bulahan ang mga putli og kasingkasing.

Niining mga bersikulo, namulong ang Ginoo ngadto sa mga adunahan ug ngadto sa mga kabus; siguro makapainteresado nga itandi ang Iyang tambag niining duha ka grupo. Unsa ang anaa niining mga bersikulo nga adunay kalabutan nimo sa peronal nga paagi? Sa unsang paagi nga ang pagpokus sa kabtangan “mokutkot” sa inyong kalag? (bersikulo 16). Unsa ang gipasabut niini nganha kanimo nga mahimong “putli og kasingkasing” (bersikulo 18) kalabut sa materyal nga mga butang?

Tan-awa usab sa Jacob 2:17–21.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 51:9.Mahimo kamong magdula og kanang makalingaw sa pamilya ug dayon hisguti kon unsa kaha kalahi ang dula kon adunay tawo nga nanikas. Nganong importante man nga “makig-angay sa matinuoron nga paagi” sa usag usa? Sa unsang paagi nga ang pagkamatinuoron makatabang kanato nga “magkahiusa”?

Doktrina ug mga Pakigsaad 52:14–19.Samtang maghisgot ka sa sumbanan nga gihulagway niining mga bersikulo, ang imong pamilya malingaw siguro nga magtan-aw sa ubang mga sumbanan nga imong gamiton—sama sa mga sumbanan alang sa pagtahi sa panapton o paghimo og usa ka butang. Mahimo kamong magtinabangay sa paghimo og butang gikan sa usa ka sumbanan samtang maghisgot mahitungod sa sumbanan nga gihatag sa Ginoo aron malikayan nga malingla.

Doktrina ug mga Pakigsaad 53:1.Ikonsiderar ang pagpaambit ngadto sa imong pamilya sa usa ka kasinatian sa dihang ikaw, sama ni Sidney Gilbert, nangutana sa Ginoo “mahitungod sa imong balaan nga tawag.”

Doktrina ug mga Pakigsaad 54:2; 57:6–7.Unsa man ang gipasabut sa “magbarug nga malig-on” (Doktrina ug mga Pakigsaad 54:2) sa unsay gihangyo sa Dios nga atong buhaton? Mahimo nimong dapiton ang mga sakop sa pamilya nga mobarug ug sa paghingalan og butang nga gihangyo sa Dios nga ilang buhaton.

Doktrina ug mga Pakigsaad 55.Giunsa paggamit sa Ginoo ang mga abilidad ni William Phelps isip usa ka manunulat ug tig-imprinta? (pananglitan, si William Phelps ang nagsulat sa teksto sa daghang mga himno, lakip na sa “Ang Espiritu sa Dios”, “Karon Kita Maglipay”, ug “Manunubos sa Israel”). Tingali ang mga sakop sa pamilya mahimong maghisgot mahitungod sa mga talento ug mga abilidad nga ilang nakita sa usag usa. Sa unsang paagi nga ang atong mga talento makatampo sa buhat sa Dios?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Sulti sa Gamay nga Sapa ‘Hatag’,” Songbook sa mga Bata, 116.

Pagpalambo sa Personal nga Pagtuon

Pagtipig og journal sa pagtuon. Siguro makatabang nimo ang paggamit og usa ka journal o notebook sa pagsulat sa mga hunahuna, mga ideya, mga pangutana, o mga impresyon nga moabut samtang magtuon ka.

mga miyembro nga naghatag og mga butang kang Edward Partridge

Si Bishop Partridge Nakadawat og Pagpahinungod, ni Albin Veselka