dalan sa Independence Missouri

Independence, Missouri, ni Al Rounds

Mayo 24–30

Doktrina ug mga Pakigsaad 58–59

“Matinguhaon nga Moapil diha sa usa ka Maayo nga Katuyoan”

Si Presidente Dallin H. Oaks nagtudlo, “Ang mga kasulatan motabang kanato nga maresulbar ang tanan natong personal nga mga pangutana tungod kay pinaagi niini atong gidapit ug gihimong kwalipikado ang atong kaugalingon alang sa inspirasyon sa Espiritu Santo, nga mogiya kanato ngadto sa tanang kamatuoran” (sa David A. Edwards, “Are My Answers in There?” New Era, Mayo 2016, 42).

Irekord ang Imong mga Impresyon

Sa dihang unang nakita sa mga elder sa Simbahan ang luna sa siyudad sa Zion—Independence, Missouri—dili kadto maoy ilang gilauman. Ang uban naghunahuna nga ilang makit-an ang usa ka malambuon, makugihon nga komunidad nga adunay lig-on nga grupo sa mga Santos. Hinoon ilang nakita ang usa ka dapit nga gamay ra ang nagpuyo, kulang sa sibilisasyon nga ilang naandan ug gipuy-an sa bagis nga mga lumulupyo sa dapit sa kamingawan [frontier] imbis nga mga Santos. Nahitabo nga ang Ginoo wala mohangyo kanila nga moadto lamang sa Zion—gusto Niya nga sila motukod niini.

Kon ang atong mga gilauman wala mohaum sa reyalidad, mahimo natong hinumduman kon unsay gisulti sa Ginoo sa mga Santos niadtong 1831: “Kamo dili makakita uban sa inyong kinaiyanhon nga mga mata, alang karon nga panahon, sa paagi sa inyong Dios … ug ang himaya nga mosunod human sa daghan nga kalisdanan” (Doktrina ug mga Pakigsaad 58:3). Oo, ang kinabuhi puno sa kalisdanan, gani pagkadautan, apan kita mahimong “magpahinabo sa daghan nga pagkamatarung; kay ang gahum anaa [kanato]” (mga bersikulo 27–28).

Tan-awa usab sa Mga Santos, 1:146–52.

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 58:1–5, 26–33, 44; 59:23

Ang mga panalangin moabut sumala sa gitakdang panahon sa Dios ug sa atong kakugi.

Ang mga Santos mipahimutang sa pundasyon sa Zion didto sa Jackson County, Missouri, diin milahutay sila og daghang mga pagsulay. Sigurado nga naglaum sila nga sa panahon sa ilang tibuok kinabuhi kini nga lugar molambo ngadto sa usa ka dapit diin mahimong magpundok ang mga Santos. Hinoon, ang mga Santos gipapahawa gikan sa Lalawigan sa Jackson sulod sa pipila ka tuig, ug ang Ginoo mipadayag nga ang Iyang katawhan kinahanglang “mohulat sa mubo nga panahon alang sa katubsanan sa Zion” (Doktrina ug mga Pakigsaad 105:9).

Samtang magbasa ka sa mosunod nga mga tudling, pangitaa ang mga rason nga ang mga panalangin mahimong pugngan sulod sa usa ka panahon. Ang mga pangutana sa ubos makatabang kanimo sa pagpamalandong.

Doktrina ug mga Pakigsaad 58:1–5; 59:23. Unsa nga mga mensahe niining mga bersikulo ang makapalig-on sa imong abilidad sa paglahutay sa kalisdanan sa mas mapailubong paagi? Unsa nga mga panalangin ang imong nadawat human sa kalisdanan? Ngano kaha nga ang ubang mga panalangin moabut lamang pagkahuman sa kalisdanan?

Doktrina ug mga Pakigsaad 58:26–33. Unsa ang tahas nga gidala sa pagkahimong “matinguhaon nga moapil diha sa usa ka maayo nga katuyoan” diha sa katumanan sa mga saad sa Dios? Unsa ang tahas nga gidala sa imong pagkamasulundon?

Doktrina ug mga Pakigsaad 58:44. Unsa ang relasyon tali “sa pag-ampo diha sa hugot nga pagtuo” ug sa kabubut-on sa Ginoo alang kanato?

Doktrina ug mga Pakigsaad 59, ulohan sa seksyon

Kinsa si Polly Knight?

Si Polly Knight ug ang iyang bana, si Joseph Knight Sr., mao ang pipila sa unang mga mituo sa propetikanhong tawag ni Joseph Smith. Sila si Polly ug Joseph mihatag og mahinungdanong suporta ngadto sa Propeta diha sa buhat sa paghubad sa Basahon ni Mormon. Ang pamilyang Knight mibiya sa Colesville, New York, aron makigpundok uban sa mga Santos didto sa Ohio ug sa wala madugay gimanduan nga mobalhin ngadto sa Lalawigan sa Jackson, Missouri. Samtang nagbiyahe sila, ang kahimsog ni Polly nagsugod sa pagkunhod, apan determinado siya nga makakita sa Zion sa dili pa siya mamatay. Didto siya sa Missouri sulod lamang sa pipila ka adlaw sa dihang namatay siya (tan-awa sa Mga Santos, 1:145–46, 151–52). Ang Doktrina ug mga Pakigsaad 59 nadawat sa adlaw sa iyang pagkamatay, ug ang mga bersikulo 1 ug 2 morag pihong nagpasabut mahitungod kaniya.

Doktrina ug mga Pakigsaad 59:9–19

Ang pagbalaan sa Igpapahulay nagdala og temporal ug espirituhanong mga panalangin.

Human makasaad nga panalanginan ang mga Santos sa Zion “uban sa daghan nga mga sugo,” ang Ginoo mihatag og espesyal nga gibug-aton sa usa ka piho nga sugo: ang sugo nga tahuron ang Iyang “balaan nga adlaw” (Doktrina ug mga Pakigsaad 59:4, 9). Samtang magtuon ka sa Doktrina ug mga Pakigsaad 59:9–19, pamalandunga nganong ang pagtahud sa Igpapahulay importante man kaayo niining mga Santos samtang nagtinguha sila sa pagtukod sa Zion.

Mahimo usab nimong pamalandungan ang mga pangutana sama niini: Gigamit ba nako ang adlaw nga Igpapahulay sa paagi nga gitinguha sa Ginoo? Sa unsang paagi nga ang pagbalaan sa adlaw nga Igpapahulay makatabang nako nga magpabiling “walay buling gikan sa kalibutan”? (bersikulo 9). Unsay akong mabuhat aron makahatag sa akong “mga paghalad sa [akong] mga pag-ampo ngadto sa Labing Halangdon”? (bersikulo 10).

Human mabasa ang mosunod nga mga bersikulo, unsay dinasig nimong himoon aron mas mahingpit ang pagbalaan sa adlaw nga Igpapahulay? Genesis 2:2–3; Exodo 20:8–11; 31:13, 16; Deuteronomio 5:12–15; Isaias 58:13–14; Marcos 2:27; Juan 20:1–19; Mga Buhat 20:7.

Mahimo usab nga makabenepisyo ka gikan sa usa sa daghang mga video o ubang mga kapanguhaan mahitungod sa Igpapahulay nga makita diha sa sabbath.ChurchofJesusChrist.org.

Tan-awa usab sa Russell M. Nelson, “Ang Igpapahulay usa ka Kahimut-an,” Liahona, Mayo 2015, 129–32; Giya ngadto sa mga Kasulatan, “Adlaw nga Igpapahulay.”

pan ug mga sacrament cup

Ang pag-ambit sa sakramento usa ka bahin sa pagbalaan sa Adlaw nga Igpapahulay.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 58:26–29.Siguro ang mga sakop sa pamilya makahimo og lista sa pipila ka mga butang nga sila “matinguhaon nga moapil”. Ang tanan ba niini “maayo nga [mga] katuyoan”? Nganong gusto man sa Ginoo nga mobuhat kita og “daghan nga mga butang diha sa [atong] kaugalingon nga gawasnon nga kabubut-on”? Hangyoa ang matag sakop sa pamilya sa paghunahuna kon unsay ilang mabuhat karong semanaha aron “magpahinabo sa daghan nga pagkamatarung.” Human niana mahimo silang mo-report bahin sa unsay ilang gibuhat.

Doktrina ug mga Pakigsaad 58:42–43.Unsa ang gibati sa mga sakop sa pamilya sa dihang mibasa sila niining mga bersikulo? Sa unsang paagi nga kining mga bersikulo makatabang sa usa ka tawo kinsa kinahanglang maghinulsol?

Doktrina ug mga Pakigsaad 59:3–19.Unsa kaha ang gipasabut sa “pagakoronahan … sa mga sugo”? (bersikulo 4). Samtang magbasa ka sa mga sugo diha sa mga bersikulo 5–19, hisguti ang mga panalangin nga imong nadawat pinaagi sa pagsunod niining mga sugo.

Mabantayan usab nimo kon giunsa paggamit ang mga pulong sama sa “kalipay,” “paglipay,” “malipayon,” ug “pagmaya” aron sa paghulagway sa sugo nga motahud sa adlaw nga Igpapahulay. Unsaon nimo paghimo ang imong Igpapahulay nga mas malipayon? Siguro ang imong pamilya makahimo og usa ka matching game gamit ang mga kard nga nagpakita sa mga butang nga inyong mahimo sa pagbalaan sa adlaw nga Igpapahulay.

Doktrina ug mga Pakigsaad 59:18–21.Unsay atong mabuhat aron “mokumpisal … nga anaa ang kamot sa [Dios] diha sa tanan nga mga butang”? (bersikulo 21). Ikonsiderar ang paglakaw-lakaw o pagtan-aw sa mga hulagway, nga magbantay sa mga butang nga “[maka]pahimuot sa mata ug … [makapa]maya sa kasingkasing” (bersikulo 18). Mahimo kang molitrato o magdrowing og mga hulagway sa unsay imong makit-an ug dayon hisguti kon sa unsang paagi nimo mapakita ang imong pagpasalamat alang niining mga butang. Giunsa nato pagkakita sa kamot sa Dios diha sa atong kinabuhi?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Pilia ang Matarung,” Mga Himno, nu. 146.

Pagpalambo sa Atong Pagtudlo

Magpaambit og mga kasulatan. Hatagi og panahon ang mga sakop sa pamilya sa pagpaambit og mga tudling sa kasulatan nga ilang nakit-an sa ilang personal nga pagtuon nga makahuluganon ngadto nila.

batang babaye nga nag-ampo panahon sa sakramento

Paghulagway pinaagi ni Marti Major