Suba sa Missouri

Campfire sa Missouri, ni Bryan Mark Taylor

Mayo 31–Hunyo 6

Doktrina ug mga Pakigsaad 60–62

“Ang Tanan nga mga Tawo Ania sa Akong Kamot”

Si Presidente Ezra Taft Benson nagtudlo nga kon magtuon kita sa mga kasulatan, “ang mga pagpamatuod molambo. Ang pasalig malig-on. Ang mga pamilya malig-on. Ang personal nga pagpadayag madawat” (“The Power of the Word,” Ensign, Mayo 1986, 81).

Irekord ang Imong mga Impresyon

Niadtong Hunyo 1831, mipahigayon si Joseph Smith og usa ka komperensya uban sa mga elder sa Simbahan didto sa Kirtland. Didto, gi-organisar sa Ginoo ang pipila ka mga elder ngadto sa mga managkompanyon ug mipadala kanila sa Lalawigan sa Jackson, Missouri, uban niini nga mando: “Magsangyaw diha sa agianan” (Doktrina ug mga Pakigsaad 52:10). Daghan sa mga elder ang makugihong mihimo niini, apan ang uban wala. Busa sa dihang miabut ang panahon nga mobiyahe na pabalik ngadto sa Kirtland, ang Ginoo miingon, “Sa uban [mga elder] Ako wala mahimuot pag-ayo, kay sila dili mobuka sa ilang mga ba-ba, apan sila nagtago sa kahibalo nga Ako mihatag ngadto kanila, tungod sa kahadlok sa tawo” (Doktrina ug mga Pakigsaad 60:2). Daghan kanato ang mobati og simpatiya alang niining mga elder—mahimong mobati usab kita nga magduha-duha sa pag-abli sa atong mga ba-ba ug mopaambit sa ebanghelyo. Tingali kita usab napugngan gayud sa “kahadlok sa tawo.” Tingali nagduha-duha kita sa atong katakus o mga abilidad. Bisan unsa pa ang atong mga rason, ang Ginoo “nasayud sa kahuyang sa tawo ug unsaon sa pagtabang [kanato]” (Doktrina ug mga Pakigsaad 62:1). Sa kinatibuk-an niining mga pagpadayag ngadto sa nag-unang mga misyonaryo mao ang mga pasalig nga makatabang aron atong mabuntog ang atong mga kahadlok mahitungod sa pagpaambit sa ebanghelyo—o sa ubang mga kahadlok nga tingali atong masagubang: “Ako, ang Ginoo, nagmando sa ibabaw sa mga langit.” “Ako adunay katakus sa paghimo kaninyo nga balaan.” “Ang tanan nga mga tawo ania sa akong kamot.” Ug “pagmalipayon, mga bata; kay Ako anaa sa inyong taliwala.” (Doktrina ug mga Pakigsaad 60:4, 7; 61:6, 36.)

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 60; 62

Ang Ginoo mahimuot kon akong ablihan ang akong ba-ba aron sa pagpaambit sa ebanghelyo.

Kitang tanan adunay mga kasinatian nga makapaambit unta sa ebanghelyo ngadto sa laing tawo, apan tungod sa pipila ka rason, wala nato buhata. Samtang magbasa ka sa mga pulong sa Ginoo ngadto sa nag-unang mga misyonaryo kinsa napakyas sa “[pag]buka sa ilang mga ba-ba,” hunahunaa ang kaugalingon nimong mga oportunidad sa pagpaambit sa ebanghelyo. Sa unsang paagi nga ang imong pagpamatuod sa ebanghelyo sama sa usa ka “kahibalo,” o bahandi gikan sa Dios? Sa unsang mga paagi nga usahay kita “nagtago sa [atong] kahibalo”? (Doktrina ug mga Pakigsaad 60:2; tan-awa usab sa Mateo 25:14–30).

Gikorihian sa Ginoo kining nag-unang mga misyonaryo, apan misulay usab Siya sa pagdasig kanila. Unsa nga makapadasig nga mga mensahe gikan Kaniya ang imong nakita diha sa mga seksyon 60 ug 62? Sa unsang paagi nga kining mga mensahe nakapaugmad sa imong pagsalig sa pagpaambit sa ebanghelyo? Sa mga adlaw nga moabut, pangita og mga oportunidad sa pag-abli sa imong ba-ba ug pagpaambit sa unsay gisalig sa Dios kanimo.

Tan-awa usab sa Doktrina ug mga Pakigsaad 33:8–10; 103:9–10; Dieter F. Uchtdorf, “Misyonaryo nga Buhat: Pagpakigbahin sa Unsay Anaa sa Inyong Kasingkasing,” Liahona, Mayo 2019, 15–18.

mga misyonaryo diha sa usa ka bus

Gusto sa Dios nga ipaambit nako ang ebanghelyo ngadto sa uban.

Doktrina ug mga Pakigsaad 61:5–6, 14–18

Ang tanan bang katubigan gitunglo sa Ginoo?

Ang pasidaan sa Ginoo diha sa Doktrina ug mga Pakigsaad 61, kabahin niini, mao ang usa ka pasidaan mahitungod sa mga peligro nga atubangon sa Iyang katawhan samtang magbiyahe ngadto sa Zion diha sa Suba sa Missouri, nga nailhan na nianang panahona sa pagkadelikado. Kini nga pasidaan kinahanglang dili hubaron nga nagpasabut nga kinahanglan natong likayan ang pagbiyahe pinaagi sa tubig. Ang Ginoo aduna sa “tanan nga gahum,” lakip na ang gahum sa katubigan (bersikulo 1).

Doktrina ug mga Pakigsaad 61–62

Ang Ginoo gamhanan sa tanan ug makapreserbar kanako.

Sa dalan pabalik ngadto sa Kirtland, si Joseph Smith ug ang ubang mga lider sa Simbahan adunay makapahulga sa kinabuhi nga kasinatian diha sa Suba sa Missouri (tan-awa sa Mga Santos, 1:152–53). Gigamit sa Ginoo kining oportunidad sa pagpasidaan ug pagtudlo sa Iyang mga sulugoon. Unsay imong nakit-an diha sa Doktrina ug mga Pakigsaad 61 nga nagdasig kanimo nga mosalig sa Ginoo samtang nag-atubang ka sa kaugalingon nimong mga hagit? Pananglitan, nganong importante man nga masayud nga ang Dios “gikan sa walay katapusan ngadto sa walay katapusan”? (bersikulo 1).

Adunay susama nga mga ideya diha sa seksyon 62. Unsa ang gitudlo sa Ginoo kanimo mahitungod sa Iyang kaugalingon ug sa Iyang gahum niini nga pagpadayag?

Pamalandunga ang imong mga kasinatian nga makaugmad og pagtuo sa dihang ang Ginoo mitabang nimo nga mabuntog ang espirituhanon o pisikal nga kalisdanan.

Doktrina ug mga Pakigsaad 62

Ang Ginoo gusto nga mohimo ko og pipila ka mga desisyon “ingon sa makaayo [kanako].”

Usahay mohatag ang Ginoo kanato og piho nga direksyon, ug sa ubang mga butang Iya kitang pasagdan nga modesisyon. Sa imong tan-aw giunsa kini paghulagway nga baruganan diha sa Doktrina ug mga Pakigsaad 62? (tan-awa usab sa Doktrina ug mga Pakigsaad 60:5; 61:22). Sa unsang paagi nga ikaw nakakita niining baruganan sa imong kinabuhi? Nganong maayo man alang kanato nga mohimo og pipila ka mga desisyon nga walay pihong direksyon gikan sa Dios?

Tan-awa usab sa Ether 2:18–25; Doktrina ug mga Pakigsaad 58:27–28.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 60:2–3.Nganong ang ubang nag-unang mga misyonaryo nagduha-duha man sa pagpaambit sa ebanghelyo? Nganong usahay magduha-duha man kita? Ikonsiderar ang pagpa-role-play kon sa unsang paagi nga ang mga sakop sa pamilya makapaambit sa ebanghelyo sa nagkadaiyang mga sitwasyon.

Doktrina ug mga Pakigsaad 61:36–39.Unsa nga mga rason ang atong makita niining mga bersikulo aron “magmalipayon”? (tan-awa usab sa Juan 16:33). Tingali ang imong pamilya makasulat o makadrowing og mga hulagway sa mga butang nga nakapalipay kanila ug kolektaha kini diha sa usa ka “magmalipayon” nga jar. (Siguroa nga maglakip og mga hulagway sa Manluluwas ug mga pahinumdom bahin sa Iyang gugma alang kanato.) Sa tibuok semana kon ang mga sakop sa pamilya magkinahanglan og pahinumdom sa mga rason aron malipay, mahimo silang mopili og butang gikan sa jar.

Doktrina ug mga Pakigsaad 61:36.Unsaon man nimo pagtabang sa imong pamilya nga mahinumdom nga ang Manluluwas “anaa sa [atong] taliwala”? Mahimo kamong makadesisyon og dungan kon asa ibutang sa makita nga dapit ang usa ka hulagway Niya diha sa inyong panimalay. Unsaon nato pagdapit ang Manluluwas sa atong inadlaw-adlaw nga kinabuhi?

Doktrina ug mga Pakigsaad 62:3.Tingali makahimo kamo og usa ka miting sa pagpamatuod sa pamilya human mabasa niini nga bersikulo. Aron mapasabut kon unsa ang pagpamatuod, mahimo nimong ipaambit ang mga porsyon sa mensahe ni Presidente M. Russell Ballard nga “Lunsay nga Pagpamatuod” (Liahona, Nob. 2004, 40–43). Nganong maayo man nga irekord ang atong mga pagpamatuod?

Doktrina ug mga Pakigsaad 62:5, 8.Nganong dili man mohatag ang Ginoo og mga sugo mahitungod sa matag aspeto sa atong kinabuhi? Sumala sa bersikulo 8, unsaon man nato paghimo ang mga desisyon?

Alang sa dugang nga mga ideya sa pagtudlo sa mga bata, tan-awa sa latid [outline] karong semanahasa Dali, Sunod Kanako—Alang sa Primary.

Gisugyot nga Awit: “Pagpamatuod,” Mga Himno, nu. 81.

Pagpalambo sa Personal nga Pagtuon

Tuguti ang Espiritu nga mogiya sa imong pagtuon. Tuguti ang Espiritu Santo nga mogiya kanimo. Magmahimong sensitibo ngadto sa Iyang mga paghunghong samtang Siya mogiya nimo ngadto sa mga butang nga imong kinahanglang makat-unan matag adlaw, bisan kon ang Iyang mga paghunghong magsugyot nga ikaw magbasa o magtuon og laing hilisgutan kay sa kasagaran nimong buhaton o sa lain nga paagi.

si Jesus nga nagdala og usa ka nating karnero

Ang Maayong Magbalantay, ni Del Parson