revelation manuscript book in display case

Hunyo 21–27

Doktrina ug mga Pakigsaad 67–70

“Labaw pa nga Bililhon … kay sa Katigayunan sa Tibuok Kalibutan”

Bisan daghan sa mga pagpadayag diha Doktrina ug mga Pakigsaad ang gipamulong ngadto sa piho nga mga tawo sa piho nga mga kahimtang, kini “mapuslanon alang sa tanan” (“Pagpamatuod sa Napulog Duha ka mga Apostoles sa Kamatuoran sa Basahon sa Doktrina ug mga Pakigsaad,” pasiuna sa Doktrina ug mga Pakigsaad). Samtang ikaw magtuon, pangitaa ang mga kamatuoran ug mga baruganan nga makatabang nimo.

Irekord ang Imong mga Impresyon

Gikan niadtong 1828 hangtud 1831, si Propeta Joseph Smith nakadawat og daghang mga pagpadayag gikan sa Ginoo, lakip na ang balaanong tambag alang sa mga indibidwal, mga instruksyon bahin sa pagdumala sa Simbahan, ug makapadasig nga mga panan-awon sa ulahing mga adlaw. Apan daghan sa mga Santos ang wala makabasa niini. Ang mga pagpadayag wala pa mamantala, ug ang pipila ka mga kopya nga anaa gisulat pinaagi sa kamot diha sa mga piraso sa papel nga gipang-apud-apod sa mga miyembro ug gidala-dala sa mga misyonaryo.

Dayon, pagka-Nobyembre 1831, mipatawag si Joseph og usa ka konseho sa mga lider sa Simbahan aron hisgutan ang pagmantala sa mga pagpadayag. Human magtinguha sa kabubut-on sa Ginoo, kining mga lider mihimo og mga plano sa pagmantala sa Basahon sa mga Sugo—ang nag-una sa Doktrina ug mga Pakigsaad karon. Sa wala madugay ang tanan makabasa na alang sa ilang kaugalingon sa pulong sa Dios nga gipadayag pinaagi sa usa ka buhi nga propeta, klaro nga ebidensya nga “ang mga yawe sa mga misteryo sa gingharian sa atong Manluluwas gisalig pag-usab ngadto sa tawo.” Alang niini ug sa daghan pang mga rason, ang mga Santos kaniadto ug karon mikonsiderar niining mga pagpadayag nga “labaw pa nga bililhon … kay sa katigayunan sa tibuok Kalibutan” (Doktrina ug mga Pakigsaad 70, ulohan sa seksyon).

Tan-awa sa Mga Santos, 1:159–63.

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 67:1–9; 68:3–6

Ang Dios misuporta sa Iyang mga sulugoon ug sa mga pulong nga ilang gilitok pinaagi sa Iyang ngalan.

Ang desisyon sa pagmantala sa mga pagpadayag nga nadawat ni Joseph Smith morag sayon ra, apan ang pipila sa nag-unang mga lider sa Simbahan dili sigurado kon maayo ba kadto nga ideya. Usa nga gikabalak-an adunay kalabutan sa mga diperensya sa pinulongan nga gigamit ni Joseph Smith sa pagsulat sa mga pagpadayag. Ang pagpadayag diha sa seksyon 67 miabut agig tubag niana nga kabalaka. Unsay imong nakat-unan mahitungod sa propeta ug pagpadayag gikan sa mga bersikulo 1–9? Unsa nga dugang nga mga panabut ang imong nabatunan gikan sa 68:3–6?

Doktrina ug mga Pakigsaad 68:1–8

Ang inspirasyon gikan sa Espiritu Santo nagpakita sa kabubut-on sa Ginoo.

Ang mga pulong niining mga bersikulo gipamulong samtang si Orson Hyde ug ang uban gitawag “sa pagpahayag sa walay katapusan nga ebanghelyo, pinaagi sa Espiritu sa buhi nga Dios, gikan sa mga katawhan ngadto sa mga katawhan, ug gikan sa yuta ngadto sa yuta” (bersikulo 1). Sa unsa kaha nga paagi nga ang deklarasyon diha sa bersikulo 4 makatabang sa usa ka tawo nga gipadala aron sa pagsangyaw sa ebanghelyo? Sa unsang paagi nga kining mga pulong magamit diha nimo? Paghunahuna og panahon sa dihang ikaw “nadasig pinaagi sa Espiritu Santo” (bersikulo 3) nga mosulti o mobuhat og usa ka butang. Unsay imong nakita niining mga bersikulo nga makahatag nimo og pagsalig nga mosunod sa espirituhanong mga pag-aghat?

Doktrina ug mga Pakigsaad 68:25–28

Ang mga ginikanan mao ang responsable sa pagtudlo sa ilang mga anak.

Si Sister Joy D. Jones, ang Kinatibuk-ang Presidente sa Primary, nagtudlo, “[Ang] yawe sa pagtabang sa mga kabataan nga mahimong makabatok sa sala mao ang pagsugod sa sayo kaayo nga mga edad aron sa mapinanggaong paagi motudlo kanila sa nag-unang mga doktrina sa ebanghelyo—gikan sa mga kasulatan, Mga Artikulo sa Hugot nga Pagtuo, ang Alang sa Kalig-on sa Kabatan-onan nga booklet, mga kanta sa Primary, mga himno, ug atong kaugalingong mga pagpamatuod—nga mogiya sa kabataan ngadto sa Manluluwas” (“Usa ka Henerasyon nga Makabatok sa Sala,” Liahona, Mayo 2017, 88).

Sumala sa Doktrina ug mga Pakigsaad 68:25–28, unsa man ang pipila sa “nag-unang mga doktrina sa ebanghelyo” nga gihisgutan ni Sister Jones nga kinahanglang itudlo sa mga ginikanan ngadto sa ilang mga anak? Nganong importante man kini nga responsibilidad nga gihatag ngadto sa mga ginikanan? Unsay imong isulti sa usa ka ginikanan kinsa mibati nga dili angayan nga motudlo niining mga butanga ngadto sa iyang mga anak?

Tan-awa usab sa Tad R. Callister, “Mga Ginikanan: Ang Nag-unang mga Magtutudlo sa Ebanghelyo sa Ilang mga Anak,” Liahona, Nob. 2014, 32–34.

pamilya nga nagtuon

Ang panimalay mao ang labing maayo nga dapit alang sa mga anak sa pagkat-on sa ebanghelyo.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 67:10–14.Sa unsang paagi nga ang atong mga kasina, kahadlok, ug garbo makapugong kanato nga mas mahiduol sa Ginoo? Nganong ang usa ka “kinaiyanhon nga tawo” dili man mahimong maanaa sa presensya sa Ginoo? (bersikulo 12; tan-awa usab sa Mosiah 3:19). Unsay atong makit-an dinhi niining mga bersikulo nga makapadasig kanato nga “[mag]padayon diha sa pagpailub hangtud [kita] mahingpit”? (bersikulo 13).

Isip usa ka pamilya, mahimo usab nimong ribyuhon ang mensahe ni Elder Jeffrey R. Holland “Busa, Kamo Kinahanglan Magmahingpit—sa Katapusan” (Liahona, Nob. 2017, 40–42).

Doktrina ug mga Pakigsaad 68:3–4.Ang mga sakop sa pamilya mahimong mopaambit og mga kasinatian nga nakapalig-on sa ilang pagtuo nga ang mga pulong sa mga sulugoon sa Ginoo mao “[ang] kabubut-on sa Ginoo,” “[ang] hunahuna sa Ginoo,” ug “[ang] gahum sa Dios ngadto sa kaluwasan” (bersikulo 4). O mahimo silang mangita sa bag-ohay lang nga mga mensahe sa kinatibuk-ang komperensya nga magamit sa usa ka hagit nga mahimong gisagubang sa inyong pamilya.

Doktrina ug mga Pakigsaad 68:25–35.Kining mga bersikulo naglangkob og importante nga tambag ngadto “sa mga lumulupyo sa Zion” (bersikulo 26). Unsay dinasig natong buhaton aron molambo human sa pagbasa niining mga bersikulo? Mahimong makalingaw ang paghimo og mga hulagway nga nagpakita sa pipila ka mga baruganan niining mga bersikulo ug itago kini bisan asa diha sa inyong panimalay. Dayon, sa umaabut nga mga adlaw kon adunay usa nga makakita sa hulagway, mahimo nimong gamiton kana nga oportunidad sa pagtudlo mahitungod niana nga baruganan. Nganong ang panimalay mao man ang labing maayo nga dapit alang sa mga bata nga makakat-on niining mga butanga?

Doktrina ug mga Pakigsaad 69:1–2.Si Oliver Cowdery gipadala ngadto sa Missouri nga adunay mga kopya sa mga pagpadayag sa Propeta aron maiimprinta, uban sa kwarta aron itabang pagtukod sa Simbahan didto. Unsa nga tambag ang gihatag sa Ginoo diha sa bersikulo 1 mahitungod sa biyahe ni Oliver? Nganong importante man nga makauban sa mga tawo “kinsa matinuoron ug matinud-anon”? (bersikulo 1). Kanus-a man nga ang mga higala nakaimpluwensya kanato sa paghimo og maayo ug dili maayo nga mga desisyon? Sa unsang paagi kita mahimong usa ka maayong impluwensya ngadto sa uban?

Doktrina ug mga Pakigsaad 70:1–4.Ang Ginoo mihatag sa pihong mga elder sa responsibilidad sa pagdumala sa pagmantala sa mga pagpadayag. Bisan tuod nga wala kita nianang piho nga responsibilidad, sa unsang paagi nga makonsiderar kita nga “mga tinugyanan sa mga pagpadayag ug sa mga sugo”? (bersikulo 3).

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Panimalay Mahimo nga Langit sa Yuta,” Mga Himno, nu. 186.

Pagpalambo sa Atong Pagtudlo

Paggamit sa mga kasulatan sa atong mga kinabuhi. Human makabasa og usa ka tudling sa kasulatan, hangyoa ang mga sakop sa pamilya sa paggamit niini sa ilang kinabuhi. Pananglitan, mahimo nimo silang dapiton sa paghunahuna og susamang mga sitwasyon nga mahimo nilang sagubangon nga naglambigit sa samang mga baruganan sa ebanghelyo.

imprintahanan ni Grandin

Ang Basahon sa mga Sugo, ang nag-una sa Doktrina ug mga Pakigsaad, giimprinta sa imprintahanan nga sama niini.